Третина од вкупното население во земјава живее во Скопје и околината. Тоа создава близу половина од бруто-домашниот производ (БДП) во земјава. Државната статистика уште еднаш објави поразителни бројки за рамномерниот развој на регионите во земјава. И во 2021 година, Скопскиот Регион бил далеку пред другите седум плански региони во Македонија.
БДП во 2021 година (според претходни податоци, конечните сè уште не се готови) изнесувал 11,7 милијарди евра, од нив 5,1 милијарди се создадени во главниот град и неговата околина. Најмалку создава Североисточниот Регион (Куманово, Кратово, Крива Паланка и околината), нешто над 500 милиони евра или девет отсто од тоа што се создава во Скопје.
Кога ќе се распредели БДП по жител, просекот изнесува 6.377 евра, но во Скопје е за 2.000 евра повисок. Најмал БДП по жител има во Полошкиот Регион (Тетово Гостивар и околината), нешто над 3.400 евра.
Просечната плата во Скопскиот Регион уште од лани била повисока од сегашната просечна плата на државно ниво. Платата во овој регион била за 10.000 денари повисока во споредба во просекот во Југоисточниот Регион, каде што работниците се најмалку платени (Гевгелија, Струмица, Валандово, Радовиш и околината).
Во Североисточниот Регион, секој трет работоспособен е невработен. И додека секаде стапката на невработеност се намалува, во овој регион – расте.
И податоците за увоз и извоз ја покажуваат предноста на Скопскиот Регион. Над половина од вкупниот извоз и над две третини од вкупниот увоз се во овој регион.
Иако Полошкиот Регион е најсиромашен, статистиката покажува дека таму има најмногу километри изградени локални патишта.
Во најсиромашниот регион има и најмногу домаќинства што имаат пристап до интернет.
Кога станува збор за туризмот, половината од вкупниот број соби во земјава се во Југозападниот Регион (Охрид, Струга) и таму е забележан најголем број туристи. Сепак, кога ќе се одвојат странските туристи, излегува дека тие почесто престојувале во Скопје отколку во Охрид.
.webp){kind=icon}
Во моментов нема коментари за веста. Биди прв да коментира...