Во вторник ќе се замрзне цената на лебот и нема да биде над 33 денари и за белиот и полубелиот леб, изјави на денешната прес-конференција министерот за економија Крешник Бектеши. Тој додаде дека ова е само прв чекор и дека ќе следат нови одлуки за замрзнување на цените.
„Не може да има разлика во цената од 28 до 38 денари за истиот леб. Дополнително ќе се утврди и количината и Државниот пазарен инспекторат ќе провери не само за цената, туку и за количината бидејќи е утврдено дека одредени производители, трговци ги намалуваат цените, но ги намалуваат паралелно и количините на тој производ. Затоа, под 450 грама бел и полубел леб не може да се продаде и тоа ќе биде со утврдена цена за највисока можна цена. Под тоа може да биде, над тоа не може да биде“, информира Бектеши.
Toj појасни дека цените нема да се зголемат по завршување на мерката, освен ако не се зголемат цените на суровините. Мерката ќе важи се додека e во интерес за граѓаните.
Бектеши додаде дека за цените на овошјето и зеленчукот се чека предлог од Министерството за земјоделство, додека за другите производи неделно ќе се прават поединечно анализи и ако има злоупотреба ќе се донесат соодветни одлуки.
Инаку, како што информира тој, Министерството за економија ги заврши сите анализи за мерките за субвенционирање на електрична енергија за индустријата односно за прехранбениот сектор во нашата држава и веќе е пратена предлог-одлука за укинување на истата мерка бидејќи компаниите кои добиле субвенционирана струја не го почитувале договореното со Владата.
Моментално, рече Бектеши, чекаат одговор од страна на законодавството во Владата дали оваа одлука ќе почне да се применува од 1 март, односно веднаш од наредната недела или од 1 април. Тој рече дека месечно за оваа мерка се трошеле 500 илјади евра.
„Со тие 500 илјади евра што ги имаме моментално како трошок преку Буџетот, ние ќе направиме и ќе дизајнираме други мерки кои ќе бидат во корист на потрошувачите“, рече Бектеши.
Со мерката, што се применува веќе три месеци, беа опфатени компании што произведуваат - масло за јадење, леб и пекарски производи, брашно, млеко и млечни производи, како и месната и живинарската индустрија.
.webp){kind=icon}
