Народна банка: Европските банки ќе останат недопрени од кризата со СВБ

Повеќе од 190 компании низ светот што добиле заеми од пропаднатата „Силикон валеј банк“ (Silicon Valley Bank) - СВБ (SVB) би можеле да бидат во потрага по нови кредитори.

Оваа банка има повеќе од 70 милијарди долари во синдицирани заеми, но повеќето се во САД, покажуваат податоците на „Блумберг“. Банката била вклучена и во околу 18 зделки во Азија и 10 во Европа. Специфичната посветеност на СВБ за секоја од нив е непозната во овој момент. Македонски компании не можат да имаат каков било однос со оваа банка поради забраната домашни компании да отвораат сметки во странство, што за „Блумберг Адрија“ го потврдија и од Народната банка. Нема потврда за каква било поврзаност на некои странски компании-мајки на фирми што егзистираат овде (пред сè странски инвеститори). Со Народната банка анализираме каков е евентуалниот глобален ефект на ова случување. 

Bloomberg Mercury

Оттаму велат дека, според процените на релевантните меѓународни институции, а пред сè регулаторите во САД, станува за збор за настан што не се очекува да има ефекти врз финансиската стабилност во САД, со оглед на тоа што банкарскиот систем на САД е висококапитализиран, отпорен и работи на цврста основа. 

„Ова во голем дел е резултат на реформите што беа направени по финансиската криза, кои обезбедија подобри заштитни механизми за банкарскиот сектор. Во случајот со пропаднатата СВБ, станува збор за специфичен деловен модел во голема мера концентриран во ИТ стартап-индустријата“, велат од НБРМ.

Од Народната банка го нагласуваат брзиот одговор на американскиот ФЕД, со кој се создаде план за клиентите на банката, а во насока да се спречат преносни ефекти. Дополнително, обезбеден е извор на ликвидност односно фонд од каде што банките ќе имаат можност да користат ликвидност од централната банка со хартии од вредност како обезбедување, но вреднувани по номинална, а не по пазарна вредност. 

„Сите овие активности, како и објавата за успешното преземање на подружницата на СВБ во Велика Британија од страна на ХСБЦ ,придонесоа за одредени позитивни сигнали на пазарите во текот на денешниот ден, а секако значат минимизирање на какви било ризици за глобалниот финансиски систем. Во однос на европскиот банкарски систем, дополнително е важно да се нагласи неговата солидна кондиција, во смисла на добри заштитни капитални бафери и капитализираност поголема од онаа на американските банки“, велат од НБРМ за „Блумберг Адрија“.

Bloomberg Mercury

Инаку, вчера во текот на денот компани низ Европа известуваа за поврзаноста со СВБ. ПЦИ-ПАЛ (PCI-PAL Plc) и „Трастпилот груп“ (Trustpilot Group Plc) соопштија дека имаат готовина на сметките на СВБ. Од компанијата „Венчр лајф“ (Venture Life), со седиште во Велика Британија, изјавија дека СВБ учествувала во нејзиниот револвинг кредитен капацитет, кој обезбедува заеми до 30 милиони фунти (36 милиони американски долари). 

Оваа година СВБ се приклучи на околу пет заеми, вклучувајќи ги оние за фирмата за решенија базирани на облак „Рингцентрал“ (RingCentral Inc.), софтверската компанија „Ебикс“ (Ebix Inc.) и давателот на технолошки решенија ПТЦ (PTC Inc.). Третина од учеството на заемите на СВБ е во технолошкиот сектор.

Политиката на ФЕД и на ЕЦБ

В четврток е закажан состанок на кој Европската централна банка (ЕЦБ) треба да одлучи за дополнителното зголемување на каматните стапки. Во текот на вчерашниот ден анализиравме дека има мало, речиси никакво, противење на планот за зголемување на стапката на депозитите за уште половина поен оваа недела. Сите сомнежи беа отфрлени со жешката базична инфлација во еврозоната во февруари, која ги отстранува нестабилните компоненти како што се храната и енергијата. 

Какви ќе бидат потезите на ЕЦБ и на ФЕД по ова случување, од Народната банка велат дека засега е рано да се каже. 

„Досега и двете централни банки јасно комуницираа дека ќе продолжат со затегнувањето на финансиските услови, за да го стабилизираат растот на цените и да превенираат дестабилизација на инфлациските очекувања. Но, секако, нивните одлуки се условени од конкретните податоци за макрофинансиските услови во економиите, кои се следат внимателно и се вградуваат при одлучувањето на секој поединечен состанок. Како што посочивме, информациите одат во прилог на тоа дека не се очекува затворањето на американската банка да има поголеми ефекти на зараза врз американскиот и европскиот банкарски систем. Евентуалните ефекти врз однесувањето на субјектите во овие економии, во смисла на промени во склоноста за трошење, инвестирање, задолжување и со тоа влијание врз економските параметри, секако ќе дејствуваат и врз поставеноста на политиките на овие централни банки“, велат од Народната банка. 

Bloomberg Mercury

Влијанија - досега

Сепак СВБ е најголемиот американски заемодавец што пропаднал во повеќе од една деценија и тоа, секако, создаде стравови од зараза во технолошкиот и финансискиот сектор во САД и светот. Иако американските регулатори презедоа вонредни мерки за да ја зајакнат довербата во финансискиот систем, дел од избезумениот викенд, во кој ненадејно беше затворена и њујоршката „Сигначур банк“ (Signature Bank), донесе загриженост за последиците од прелевање на другите регионални кредитори и пошироката економија.

Шведска
„Алекта“: Најголемиот пензиски фонд во Шведска ќе загуби дури 1,1 милијарда долари на облозите што ги направил во банките што се погодени од колапсот на СВБ. Инвеститорот одржа кризен состанок рано во понеделникот, за да разговара зошто инвестирал 2 милијарди долари во „Сигначур банк“ (Signature Bank), „Фрст рипаблик банк“ (First Republic Bank) и СВБ. Финансискиот надзорник на Шведска ги повика „Алекта“ и другите финансиски фирми да разговараат за кризата, но од Управата за финансиски надзор изјавија дека финансискиот систем на нордиската нација има „значителна издржливост“ и може да се движи низ сегашните турбуленции.

Јапонија
„Софтбанк груп “(SoftBank Group Corp): Групацијата се смета за една од потенцијално најекспонираните фирми, со оглед на нејзините огромни инвестиции во технологијата. Стартапите во кои има инвестирано „Софтбанк вижн фонд“ имаат депозити и заеми кај СВБ. Постои загриженост дека би можеле да бидат тешко притиснати за готовинскиот тек поради колапсот.

„Сумитомо митсу“ (Sumitomo Mitsui Trust Holdings Inc.): Јапонскиот фонд имаше 0,29 отсто удел во „СВБ фајненшл груп“ на крајот на четвртиот квартал минатата година.

Холандија
„Фарминг груп НВ“ (Pharming Group NV): Холандската биотехнолошка компанија соопшти дека поседува 26 милиони долари во СВБ во САД и 19 милиони долари во СВБ во Обединетото Кралство. Иако најголемиот дел од парите е неосигурен, компанијата рече дека е уверена дека нејзината изложеност нема да влијае материјално на оперативните планови или на обврските. Акцијата на компанијата падна дури за 8,4 отсто во понеделникот.

Германија
„БаФин“ (BaFin): Германскиот финансиски регулатор ја замрзна филијалата на СВБ во земјата, која нема да смее да кредитира или да врши плаќања. Регулаторот рече дека единицата е изложена на ризик да не може да ги исполни обврските кон доверителите. Германските операции не претставуваат опасност за финансиската стабилност, соопштија од „БаФин“.

Данска
„Зиланд фарма А/С“ (Zealand Pharma A/S): Данскиот развивач на лекови имаше околу 163 милиони круни (23,5 милиони долари) во СВБ заклучно со 10 март, или околу 15 отсто од својата вкупна готовина, парични еквиваленти и пазарни хартии од вредност на тој датум. Очекува да ги врати сите свои депозити што се чуваат во затворената банка.

Норвешка
„Норгес банк инвестмент менаџмент“ (Norges Bank Investment Management): Норвешкиот суверен богат фонд од 1,3 трилион долари рече дека очекува да врати некои пари поврзани со кредитната изложеност, иако е „прерано да се каже колку“. Фондот соопшти дека има акции и во „Сигначур банк“ (Signature Bank) и во „Фрст рипаблик банк“ (First Republic).

Австралија
„Ксеро“ (Xero Ltd.): Провајдерот на сметководствен софтвер рече дека неговата вкупна изложеност на СВБ била околу 5 милиони долари заклучно со 10 март.

„Сајтмајндер“ (SiteMinder Ltd.): Производителот на софтвер изјави дека има изложеност на готовина од 10 милиони австралиски долари (6,6 милиони американски долари) на СВБ и СВБ во ОК, вклучувајќи ги очекуваните плаќања од клиенти и партнери.

Во моментов нема коментари за веста. Биди прв да коментира...

Остави коментар