Народна банка: Се очекува раст на цените на нафтата и на храната

Народната банка го објави извештајот за новите макроекономски показатели во кои е извршена нагорна ревизија за движењето на цената на нафтата и на цените на прехранбените производи.

„Во услови на договорено зголемување на производството на нафта од страна на земјите членки на ОПЕК+7 , ваквата корекција главно се должи на воведувањето забрана за увоз на руска нафта од страна на Европската Унија (со одредени исклучоци) поради конфликтот во Украина, како и зголемувањето на продажните цени на нафта од страна на Саудиска Арабија. За 2023 година се очекува помал пад на цената на нафтата во однос на оцените во април“, соопшти Народната банка.

Bloomberg

Кај цените на прехранбените производи се извршени нагорни ревизии за целиот период на проекции.

„Така, во 2022 година се очекува поголем раст на цената на пченицата и пченката, во услови на прекин во синџирите на снабдување со овие производи во Црното Море поради воениот конфликт помеѓу Украина и Русија, како и очекувањата за пониско производство на житните култури кај дел од другите поголеми производители заради неповолни временски услови. За 2023 година, се очекува дека цената на пченицата ќе остане иста како во 2022 година, наспроти претходните очекувања за нејзин пад, додека цената на пченката би забележала помал пад, во однос на априлската проекција“, се вели во извештајот на Народната банка.

Bloomberg

Оттаму укажуваат и дека последните макроекономски показатели упатуваат на остварување на ризиците во одредени сегменти од економијата, што создава понеповолен макроекономски амбиент за спроведување на монетарната политика.

„Нагорните придвижувања кај домашните цени во периодот април ‒ мај 2022 година се посилни од проектираните, при посилен раст од очекуваниот и кај увозните цени, коишто и натаму во најголем дел придонесуваат за домашната инфлација, а неизвесноста од идната динамика на цените на енергијата и на храната на берзите постојано расте поради воените случувања во Украина и ги подгрева инфлациските очекувања“, велат од Народната банка.

Во однос на домашната економска активност, остварувањата во првиот квартал од 2022 година се малку подобри од проектираните, но структурата на остварениот раст е во склад со очекувањата.

„Од друга страна, расположливите високофреквентни податоци за економската активност за вториот квартал се недоволни за согледување на состојбите во целина, но засега упатуваат на ризици за индустрискиот сектор поради воениот конфликт во Украина и неговиот силен одраз врз пазарите на примарните производи, пред сѐ на цените на енергијата и синџирите на снабдување. Податоците за прометот во трговијата покажуваат натамошни релативно солидни остварувања во услужниот сектор“, соопшти Народната банка.

Оттаму додаваат дека девизните резерви се одржуваат на соодветното ниво и во сигурната зона, со значително намалена потреба од присутност на Народната банка на девизниот пазар во периодот април ‒ мај, за разлика од првиот квартал од годината кога беа поизразени притисоците од енергетската криза и имаше привремени шпекулативни притисоци. Во монетарниот сектор, годишниот раст на депозитите и кредитите засега главно е во согласност со проектираниот за вториот квартал на 2022 година, според априлската проекција.

Во моментов нема коментари за веста. Биди прв да коментира...

Остави коментар