По благиот пад, повторно зголемување на цената на нафтата

Цената на нафтата се зголеми додека трговците ги одмеруваат шансите за глобално економско забавување наспроти силниот пазар за сурова нафта и рафинирано гориво.

Цената на нафтата „Брент“ се зголеми за 1,5 проценти во Лондон, ,а зголемување имаше и кај најактивните среднорочни договори за „West Texas“. На пазарот имаше обновен пораст на премијата за рафинирани горива во однос на суровата нафта, што укажува на континуиран недостиг на снабдување со нафтени деривати како дизелот.

Претседателот на САД, Џо Бајден рече дека оваа недела ќе одлучи дали да го суспендира федералниот данок на бензин.

Нафтениот пазар е ранлив на какви било знаци на нарушување на снабдувањето откако руската инвазија на Украина ги потресе светските пазари на стоки.

„Petroecuador“ вчера соопшти дека можеби ќе треба да го запре извозот на нафта поради штрајкови, додека либискиот министер за нафта објави многу нестабилни бројки на производство досега овој месец.

Суровата нафта се движи кон квартален раст бидејќи трговците ги одмеруваат конфликтните сили што ја поттикнаа нестабилноста. Во петокот цените паднаа за неколку долари бидејќи расте загриженоста дека свртувањето на ФЕД кон построга монетарна политика ќе доведе до економско забавување.

„Се чини дека по падот на цената во петокот предизвикан од зголемените грижи за инфлацијата, вниманието се врати на проблемите со снабдувањето и нафтениот комплекс започна со закрепнување предводено од дестилати“, рече Тамас Варга, аналитичар во брокерската компанија „PVM Oil Associates“.

Тој додаде дека продожените слаби економски перформанси во светот ќе го земат „данокот на побарувачката“ за нафта кон последниот квартал од годината.