Забави растот на македонската индустрија во јуни

Раст на индустриското производство во јуни од 3,7 проценти регистрира Државниот завод за статистика. Ова е забавување на растот откако во мај годинава растот на индустријата беше 6,1 процент, секако по многу полош период, а по месеци во кои производството или паѓаше или стагнираше.

Ако се анализира по сектори, најголем раст има во секторот снабдување со електрична енергија, гас, пареа и климатизација, каде што стапката на раст е 39,9 проценти во однос на истиот месец лани. Во секторот рударство и вадење камен има пад од 1,6 проценти, додека преработувачка индустрија пораснала за 1,4 проценти.

Од Државниот завод за статистика информираа дека зголемувањето во секторот преработувачка индустрија е резултат, пред сѐ, на зголеменото производство во одделите: производство на пијалаци, производство на тутунски производи, производство на текстил, основни фармацевтски производи и фармацевтски препарати, производство на други неметални минерални производи, производство на метали...

Според главните индустриски групи, производството во јуни 2023 година, во однос на јуни 2022 година, бележи пораст кај енергијата за 17,7 проценти и капиталните производи за 15,6 отсто, додека опаѓање бележи кај интермедијарните производи, освен енергија, за 1,4 проценти и трајните производи за широка потрошувачка за 7,2 проценти. 

Инаку, во текот на минатата година сите земји од регионот Адрија, освен Македонија, забележаа раст на индустриското производство, иако со побавно темпо. Податоците покажуваат дека земјите во регионот произведуваат повеќе отколку во претпандемиската 2019 година, а Македонија, како единствен исклучок, објави за 8,5 проценти помало производство во однос на таа година.

Аналитичкиот тим на „Блумберг Адрија“ го оценува индустриското производство во Македонија како „и натаму болно“, поради тоа што аутпутот во 2022 година е за 8,5 проценти помал во однос на претпандемиската 2019 година.

„Откако лесно закрепна во првата половина од минатата година, со раст од 2,3 проценти, индустриското производство во последното тримесечје од 2022 година премина во црвената зона, со пад од 3,4 проценти споредено со истиот период од 2021 година“, велат нашите аналитичари, истакнувајќи дека текстилното производство го поддржа вкупното производство, објавувајќи раст од 10,8 проценти само во четвртиот квартал лани.

„По значајниот пад во текот на повеќегодишен период, откако се намали побарувачката за текстил, оваа индустрија го промени правецот во втората половина од минатата година“, забележуваат нашите аналитичари.

Во моментов нема коментари за веста. Биди прв да коментира...

Остави коментар