Бавен пад: Во јули инфлација од 8,4 проценти

Втор месец по ред едноцифрена инфлација во Македонија покажуваат податоците на Државниот завод за статистика од понеделникот. Индексот на трошоците на животот во јули се зголемил за 8,4 проценти во однос на истиот месец минатата година, додека цените на мало на годишно ниво се зголемиле за 4,9 проценти. Во јуни стапката на инфлација во Македонија беше 9,3 проценти. 

На месечно ниво цените исто така се зголемиле, па месечниот раст на трошоците за живот изнесува еден процент, додека цените на мало се зголемени за 1,6 отсто.

Ако се анализира по производи, месечен раст е забележан кај свежото и разладеното овошје, и тоа за 12,6  проценти, додека лебот и житата поскапеле за 3,8 отсто. Растот на цените на сирењето и урдата и на рибата и морските плодови, млекото и шеќерот е помал. 

Државниот завод за статистика објави дека во јули исто така има пораст на индексите на трошоците на животот и кај воздухопловниот патнички транспорт, и тоа дури за 30,9 проценти, а електричната енергија поскапела за 4,3 отсто. 

Намалување на индексите на трошоците на животот во јули 2023 година, во споредба со претходниот месец, е забележано кај свежиот и разладениот зеленчук, освен компирите и другите коренести плодови, за 4,8 проценти, маслото и маснотиите за 3,6 отсто, жестоките пијалаци за 0,9 отсто, кафето, чајот, какаото за 0,6 проценти. Пониски цени има и гасот - за 7,1 отсто.

Од 2000 година инфлацијата во земјава се движи на највисока стапка од 4 отсто, со исклучок на финансиската криза во 2008 година, кога стапката на инфлација беше 6 отсто. Но со кризите што последователно дојдоа по пандемијата и војната, Македонија лани заврши со рекордна инфлација од 14,2 отсто.

Во последниот извештај објавен во април од страна на Светската банка, Македонија се најде на врвот на листата по високата инфлација и нискиот раст на економијата споредено со земјите од регионот. „Иако цените на храната и енергијата сега покажуваат знаци на олеснување, при што надворешните двигатели сега исчезнуваат поради забавувањето на глобалниот раст, сепак, инфлаторните притисоци остануваат вкоренети и бараат дополнително затегнување на монетарната политика“, потенцираат од Светската банка.

 

Во моментов нема коментари за веста. Биди прв да коментира...

Остави коментар