Цените на авионските билети стигнаа до облаците. По две години пандемија, сè што сакаа луѓето е да ги реализираат своите долго одложувани патувања. Во овој период речиси е и невозможно да се најдат авионски билети со прифатливи цени. Анализираме кои се причините за големото поскапување на воздухопловниот патнички транспорт.
Патувањето во Европа и во Азија чини најмногу. Според податоците на глобалната агенција за патување „Хопер“ (Hopper), авионските билети на овие континенти достигнаа и над 1.100 евра за лет во еден правец.
Во првата половина од оваа година раст се забележува и во земјава. Цените на воздухопловниот транспорт само во јули се зголемиле за 30,9 отсто споредено со претходниот месец.
Но кои се причините за толкав раст на цените на билетите?
Понуда и побарувачка
Минатото лето побарувачката беше првенствено фокусирана на домашни патувања, бидејќи ограничувањата за патување и барањата за тестирање од ковид го ограничија пристапот до некои земји, додека во други туризмот остана целосно затворен. Во текот на претходната година, според „Хопер“, 32 отсто од пребарувањата за летни патувања биле за меѓународни патувања, а во оваа година се забележува раст од 19 отсто на тие патувања. Од друга страна, понудата од авиокомпаниите не може да ја достигне побарувачката. Капацитетите на седиштата на авиокомпаниите остануваат под нивото од 2019 година. Помалата понуда во комбинација со високата побарувачка годинава ќе продолжи да врши нагорен притисок врз цените. Со оглед на тоа дека летната сезона е во тек, во моментов најбарани дестинации се Италија, Франција, Турција, Јапонија и Кина
Цена на авионското гориво
Еден од клучните фактори за цената на билетите е трошокот на авиокомпаниите за гориво. Оваа година цената на авионското гориво се зголеми за 45 отсто, на 3,29 долари за галон. Во април беа забележани највисоки цени регистрирани од 2008 година, кога цената за галон достигна 4,07 долари. Иако трошоците за гориво се значително пониски во последните 15 месеци, цените остануваат највисоки од крајот на 2014 година. Во моментов цената на авионското гориво изнесува 3,0 долари за галон.
Декарбонизација на авијацијата
Нова реалност во авиосообраќајот е декарбонизацијата, со суштински промени во Системот за тргување со емисии на Европската Унија (ЕУ EТС). Авиокомпаниите мора да имаат доволно дозволени емисии за да го покријат секој тон јаглерод диоксид испуштен во атмосферата на летовите што започнуваат и завршуваат во Европската економска област, Британија и Швајцарија. За оваа промена очекувањата се дека до 2027 година авиокомпаниите ќе платат околу пет милијарди евра, што претставува дополнителен товар.
Bloomberg
Нарушени патувања
Европската авиоиндустрија во последните месеци е оптоварена со хаотично работење, главно поради недостиг од аеродромски персонал во секторите за безбедност и контрола, како и во одделот задолжен за грижа за багажот на патниците, па додека да се вработи дополнителен персонал, сегашните вработени вршат притисок за поголеми плати во услови на инфлација. Одложувањето на летовите предизвикува дополнителен стрес кај патниците. Наместо да ги менуваат плановите или да изберат да не патуваат, многу клиенти трошат малку повеќе за да ги заштитат своите патувања. Денес речиси секој петти патник што резервира летови додава гаранција за прекин на летот, со што се заштитува од доцнење или откажување на летот.
Очекувањата се дека цените на авионските билети нема да се вратат на нивото пред пандемијата, но сепак, по завршувањето на летната сезона, се прогнозира пад на цените на билетите.
.webp){kind=icon}
