Македонија ја губи пченицата: Сееме исто, жнеемe помалку

Секоја година во Македонија се сее пченица на површина од околу 70.000 хектари, но од година во година се намалува произведеното количество. Статистичките податоци покажуваат дека последен пат годишното производство на пченица во земјава било над границата од 300.000 тони во 2016 година. Оттогаш, годишното производството никогаш не ја надминало границата од 250.000 тони.

Климатските промени земаат данок

Според земјоделците, климатските промени си го земаат данокот и се одразуваат и врз земјоделското производство. На почетокот на годинашната жетва, Перо Стојкоски од Асоцијацијата на земјоделци во изјава за „Блумберг Адрија“ соопшти дека посевите на пченица годинава се зголемени за 13 отсто, но дека тоа не значи дека ќе има и зголемено произвдство. 

„За годинава има посеано отприлика околу 70.000 хектари. Наша анализа како Асоцијација на земјоделци е дека може годинава може да очекуваме наше производство околу 250.000 килограми, што не е доволно за нашата држава да може да биде независна од увоз на пченица“, рече Стојкоски.

Тој додаде дека климатските промени влијаат и дека годинава имало премногу влажни површини поради дождовите.

„Ако очекувавме пример околу четири до четири и пол тони по хектар, тоа сега е намалено. Верувам дека годинава просекот ќе биде околу три и пол тони по хектар. Уште поважно е тоа што самите дождови го испраа житото и неговата хектолитарска тежина веќе е помала од она што требаше да биде реална“, вели Стојкоски. 

За храна зависиме од увоз

Иако земјавa важи за земјоделска, посевите и приносите не ги задоволуваат основните потреби на населението на годишно ниво. Тоа особено дојде до израз минатата година, кога војната меѓу Русија и Украина предизвика многу турбуленции во светот, особено истакнувајќи ја зависноста од храна.

Податоците покажуваат дека Македонија во просек произведува под 250.000 тони пченица, а годишните потреби налагаат од 320.000 до 330.000 тони. Според тоа, земјава мора остатокот да го обезбеди од увоз. Увозот на пченица и на брашно најчесто се обезбедува од Србија.

Податоците на Државниот завод за статистика покажуваат дека вредноста на вкупниот увоз на земјоделски производи само за една година порасна речиси за 13 отсто, а за период од шест години, односно од 2017 до 2022 година се зголеми за 30 отсто.

 

 

Во моментов нема коментари за веста. Биди прв да коментира...

Остави коментар