Фирма од Кипар со понуда за целосно преземање на „Еуроникел индустри“?

„К.А.Д менаџмент сервисес“ (K.A.D Management Services), моментално деловен партнер на „Еуроникел индустри“, сака да ја преземе домашната компанија, дознава „Блумберг Адрија“. Нашите наводи ги потврдуваат лица што се упатени во процесот, но засега сакаат да останат анонимни.

Според информациите, „К.А.Д менаџмент“ треба да инјектира ликвидност во компанијата, но и техничка експертиза, сигурен и остварлив извор на руда и снабдување со електрична енергија, како и пристап до европските и глобалните пазари.

Нашите извори велат дека  „К.А.Д менаџмент“ веќе дале понуда за преземање и спас на „Еуроникел“. Понудата е доверлива, а деталите не се познати. Сепак тврдат дека понудата е за преземање на компанијата во целост, заедно со долговите.

На нашето прашање, зошто се прави ова и во каква кондиција е сега кавадаречката компанија нашиот соговорник тврди дека ако „Еуроникел“ не добие нов сопственик, ќе мора да се затвори, а дека во оваа ситуација е поради последиците од енергетската криза, моментално неповолниот пазар на фероникел, кој е дополнително влошен од бројни азиски производители на челик, кои преминуваат на користење железен никел со потекло од Индонезија, кој што многу понеквалитетен, но и поевтин производ.

Нашиот извор вели дека „К.А.Д менаџмент“ досега му обезбедувал технички консултантски услуги на „Еуроникел индустри“ но дека немаат должничко-доверителски односи. .

Информацијата за преземањето доаѓа во време кога тешката индустрија низ Европа е под притисок поради енергетската нестабилност. Во моментов, според информациите, „Еуроникел индустри“ не може да обезбеди доволно средства, и покрај задолжувањето кај една голема домашна банка, а загрозена е егзистенцијата на над 2.000 лица - над 850 вработени и нивните семејства. 

Во јуни годинава вработените протестираа пред компанијата во Кавадарци со барања да им се исплати втората рата од регресот за годишен одмор и зголемување на бодовите за плата.

„Блумберг Адрија“ испрати прашања и до „К.А.Д менаџмент“ кои попладнево во одговорот не ја демантираа информацијата.

„Нашата политика е да не коментираме јавно за шпекулации. Меѓутоа, ние ги проценуваме различните можности на Балканот за да ја употребиме нашата единствена технологија за производство на никел сулфат што ја развивме во изминатите неколку години“, велат оттаму.

Потврдуваат дека членови на нивни тимови и претходно ги советувале финансиските инвеститори на компанијата на актуелниот сопственик ГСОЛ (GSOL) за техничките и процесните аспекти - особено во времето кога швајцарскиот фонд сакал да ја прошири својата изложеност на „Фени“ во 2017-2018 година.

Оттаму велат дека енергетската криза и растот на цените на фероникелот до 13.000 долари по тон (како директен резултат на слабиот пазар од нерѓосувачки челик и општата светска економија) создале голем стрес на компаниите за фероникел на запад. „Целата тешка индустрија, особено енергетско интензивните металуршки процеси, треба да ги прифатат „новите норми“ односно високите цени на енергијата и да најдат начини да станат помалку енергетски интензивни додека се осигураат дека се прилагодуваат на новите регулативи за ЕСГ (ESG).

„Неинтегрираните производители ќе имаат потешкотии да се натпреваруваат со индонезиската и кинеската конкуренција кои што влегоа на пазарот во последниве години, прилично агресивно. Консолидација или затворање на производството е неизбежна“, додаваат.

Инаку, „Еуроникел индустри“ е рангирана на 15-то место меѓу најголемите компании во Македонија за 2022 година, со приход од 12,4 милијарди денари и добивка од 26,7 милиони денари. Компанијата придонесува со три проценти во националниот БДП.

Во моментов, според нашите информации, фабриката има проблем во редовното сервисирање на финансиските обврски, најмногу со сметките за струја.

Поранешниот кавадаречки комбинат „Фени“ е еден од најголемите потрошувачи на струја во земјава, а во текот на минатата година, кога струјата драстично поскапе, фабриката работеше со минимален капацитет или воопшто не работеше.

Актуелен сопственик на компанијата е швајцарскиот фонд ГСОЛ, кој во 2018 година ја презеде фабриката „Фени“.

К.А.Д e компанија за менаџмент и технички советодавни услуги со седиште во Никозија, Кипар. Специјализирана е за финансиско управување и обезбедување технички советодавни услуги за индустриски клиенти низ целиот свет, со посебен фокус на природните ресурси и металуршкиот сектор.

 

Во моментов нема коментари за веста. Биди прв да коментира...

Остави коментар