Енергетската криза предизвика големи проблеми за светската метална индустрија, а најдобар пример за тое е „Еуроникел индустри“, една од најголемите компании во Македонија која неодамна ги испрати работниците дома и за која постои интерес за преземање, за што веќе пишуваше „Блумберг Адрија“. Анализираме какви се трендовите на пазарот за клучните метални суровини и дали може да се очекува овој производствен сектор повторно да стане златна кокошка како во минатото.
Тешки времиња
Според „Блумберг“, светските трговци со метал преживуваат еден од најтешките периоди иако истовремено меѓународната трка за минерали ја стави оваа индустрија во геополитичкиот центар на вниманието како никогаш досега.
Прочитај повеќе
„Еуроникел“ не работи, комбинатот индиректно коментира и за преземањето
„Блумберг Адрија“ веќе објави дека К.А.Д Менаџмент сервисес“ со седиште во Никозија веќе доставила понуда за преземање
14.10.2023
Фирма од Кипар со понуда за целосно преземање на „Еуроникел индустри“?
Според сознанијата, „КАД менаџмент“ треба да инјектира ликвидност во компанијата, но и техничка експертиза.
10.10.2023
Врвниот трговец со бакар „Трафигура“ (Trafigura Group), најголемиот хеџ-фонд за метали и повеќе други големи играчи од оваа индустрија во изминатиов период го намалија персоналот или претрпеа загуби. Ова се случува во период кога владите ширум светот ја истакнуваат загриженоста за идната достапност на метали како бакарот, никелот и кобалтот, кои ќе бидат клучни за енергетската транзиција. Сепак, во изминатата година, слабата индустриска побарувачка ги држеше цените под притисок, оставајќи ги трговците да се борат да извлечат профит од слабите пазари на метали.
Фондот за стоки „Орион“, најголемиот хеџ фонд фокусиран на метали годинава до август имаше пад за четири проценти. Средствата со кои управува овој фонд се намалија за повеќе од една третина во изминатата година на милијарда долари.
Оперативниот профит на металната единица на „Трафигура“ е намален за 68 проценти на годишно ниво заклучно со март, бидејќи забележа загуба од речиси 600 милиони долари од наводна измама со никел. Нејзиниот оддел за метали се очекува да има дополнителни удари кога ќе ги објави резултатите за работењето заклучно со септември, годинава.
Некои од големите играчи во индустријата продолжија да остваруваат солидни добивки, но и тие признаа пад на профитабилноста.
„Станува збор за сложена година со помали маржи во тргувањето со метали“, рече недоамнат Гери Нагл, извршен директор на „Гленкор“ (Glencore Plc), која се бори со „Трафигура“ за титулата најголем светски трговец со метали. Заработката пред камата и данок во единицата за тргување со метали и минерали на „Гленкор“ е намалена за 36 проценти на годишно ниво на 1,5 милијарди долари во 12-те месеци до јуни, што е најслабиот 12-месечен период од 2019 година.
Што велат нашите аналитичари?
Илија Нешиќ, корпоративен финансиски аналитичар во „Блумберг Адрија“ вели дека цените на металите беа исклучително нестабилни во периодот зад нас. Тој додава дека цената на никелот го достигна врвот во 2022 година поради прекините во синџирот на снабдување, понудата и несигурноста на пазарот. Нешиќ укажува дека никелот е и најскапиот метал во набљудуваната група (никел, бакар, алуминиум и железо), што се должи на неговата многу широка примена и што резултира со побарувачка којашто е почувствителна на цената.
Блумберг Адрија
„Кина е главниот двигател на цените на никелот (и другите материјали „поврзани со метал“) на глобално ниво. Цените на сите метали се намалија од врвовите постигнати во 2021 и 2022 година. Затоа, не е чудно што се намалуваат приходите на играчите вклучени во производството/преработката на овие метали. Очекуваме цените да останат околу сегашните нивоа поради нормализацијата на синџирот на снабдување, но спорадичните зголемувања поради непредвидливи настани никогаш не се исклучени“, вели Нешиќ.
Тој додава дека во сегментот на индустриски метали (алуминиум, бакар) се забележува помала побарувачка, особено од Кина, главно поради тоа што економското закрепнување е бавно.
„Исто така, инвеститорите ги ротираа своите портфолија кон нециклични средства или одбранбени средства. Бакарот во моментов е еден од најбараните метали, бидејќи од него зависи идната енергетска транзиција и електрификација. Поради ова, побарувачката на бакар е надежна, но само ако процесот на електрификација оди според планираното и ако побарувачката од Кина биде подобра од очекуваното“, вели Нешиќ.
Кога станува збор за цените на алуминиумот, Нешиќ вели дека корекцијата на цената досега во 2023 година беше блага и дека поради поради повисоките цени на енергијата, производството е сè уште поскапо и понестабилно отколку во предвоениот период.
„Иако цените на железната руда се зголемија само малку во 2023 година, тие значително закрепнаа во јуни 2023 година, поттикнати од можните стимулации во кинескиот сектор за недвижности и други области од економијата кои ја зголемуваат побарувачката. Кинескиот извоз на метал го понесе товарот на слабата глобална побарувачка за произведени метали“, вели Нешиќ.
Тој додава дека извозот на кинески производи од челик падна за 28 проценти во првиот квартал од 2023 година во споредба со четвртиот квартал од 2022 година. Нешиќ потенцира дека ПМИ (од англиски: Purchasing Managers' Index) во челичната индустрија забележа пад на нарачките, како и подиндексот на новите нарачки бидејќи глобалната перспектива и натаму слабее.
Со помош на Арчи Хантер, Џек Фархи, Ивон Је Ли (Блумберг)
.webp){kind=icon}