.webp){kind=icon}
За Владата, барем во Македонија, растот на минимално загарантираната плата беше еден од обидите да се влијае и политички, можеби и да се соберат политички поени. Несомнено, како и за повеќето други „бенефиции“ за граѓаните. Со последното зголемување, минималната плата во земјава практично од март изнесува 18.000 денари во нето-износ. Тоа се секако околу 300 евра или 429 евра во бруто-износ. На ниво на регионот Адрија, ова не е најниската плата иако анализа на просечните плати меѓу петте земји што веќе ја објавивме покажа дека Македонците имаат најниски просечни примања. Покачувањето на минималната плата во земјава сепак беше механизам со кој властите се обидуваа да го зголемат тој државен просек. И навистина успеаја во тоа. Во „Блумберг Адрија“ правиме анализа за растот на минималната плата во земјава и висината на гарантираниот приход во другите земји од регионот. Друг е аспектот што во услови на веќе почнат тренд на зголемување на инфлацијата, за експертите, последното зголемување е и дополнителен притисок на потрошувачката и на цените.
Минималната плата во Македонија низ годините порасна за 9.200 денари, од 8.800 денари во март 2014 година на 9.590 денари во 2015 година, додека во 2016 година стана 10.080 денари. Постепеното зголемување доведе до раст на минималната плата во земјава на 18.000 денари за сите сектори од март годинава. Дополнително, Владата одлучи да дава субвенции од државниот буџет на работодавците што не можат да ја исплатат целосно. За тоа време растеше и просечната плата, ама излегува дека голем дел од растот всушност се должи на зголемувањето на минималецот.
Така, во јануари 2014 година просечната исплатена нето-плата во земјава изнесува 21.327 денари (347 евра), додека во март 2014 година просекот е 21.007 денари (342 евра). По пет години или во март 2019 година, просечната нето-плата во Македонија е 24.590 денари (400 евра).
Годинава, во третиот месец изнесува 31.080 односно 505 евра. Од тој месец почна да важи и новиот износ на минималната плата.
Регионални трендови
Од земјите во регионот Адрија, Босна и Херцеговина во моментов има најниска минимална плата или 208 евра во бруто-износ. Во Република Српска, пак, Владата во мај донесе одлука да се зголеми најниската плата од досегашните 590 на 650 конвертабилни марки.
Во Хрватска минималната плата е 624 евра, во Србија 400, а во Црна Гора 532 евра. Од земјите од овој регион најголема минимална плата има во Словенија, каде што минималецот е 1.074 евра.
Инаку, во Европската Унија највисока минимална плата има во Луксембург или 2.256 евра во бруто-износ. Од земјите во регионот, во Бугарја минималната плата е 332 евра и е најниска во Унијата.
Анализа на ефектите од зголемувањето на минималната плата во земјава пред пандемијата и пред воениот конфликт во Украина покажа дека минималната плата нема статистички значајни негативни ефекти врз профитабилноста на фирмите во Македонија. Истовремено, повисоката минимална плата е следена со пораст на продуктивноста, што потенцијално упатува на веројатноста дека фирмите апсорбирале дел од повисоките трошоци за плати преку зголемување на продуктивноста.
