„Стандард и Пурс“ ја задржа оценката за Македонија на ББ-

Македонија го задржа кредитниот рејтинг ББ-со стабилен изглед од Агенцијата „Стандар и Пурс“. Агенцијата очекува забрзан економски раст, умерено ниво на јавен долг и фискална консолидација и покрај неповолните надворешни влијанија, соопшти Министерствто за финансии.

„Во најновиот извештај „Стандард и пурс“ очекува растот на БДП да забрза во 2024 година на 2,9 отсто (од два отсто во 2023) поттикнат од посилната лична потрошувачка, поддржана од реалниот раст на платите, тековните инфраструктурни проекти, вклучително Коридорите 8 и 10д, како и растот на извозот“, се наведува во соопштението.

Според Агенцијата, потенцијалите за раст во земјата ги неутрализираат неповолните влијание од случувањата кај главните трговски партнери, пред се Германија. Јавниот долг се нотира во Извештајот дека ќе остане на умерено  ниво и ќе се стабилизира на ниво од околу 53 отсто од БДП  во периодот 2024-2027 година. Агенцијата оценува дека се преземени активности за соодветно управување и со каматните плаќања и дека тие се пониски во однос на многу други земји со сличен кредитен рејтинг.

Агенцијата посочува и на напорите за фискална консолидација. Со усвоениот Буџет за 2024 година буџетскиот дефицит кој е проектиран на 3,4 отсто и покажува намалување во однос на дефицитот од 2023 година од 4,6 отсто од БДП. Агенцијата очекува тој тренд на буџетска консолидација да продолжи со фокусот на Владата врз економскиот раст и реализација на инфраструктурните проекти. Клучно за фискалната конслидација, според „Стандард и Пурс“ е строго придржување до правилата од новиот Закон за буџети.

Членството во ЕУ го посочуваат како клучен фактор за долгорочен структурен и институционален развој, поддршка на економскиот раст и справување со емиграциските предизвици. Клучно е спроведувањето на структурните реформи, а меѓу ризик факторите е нотирано надворешното влијание, изборниот циклус и условите на финансиските пазари. Во однос на инфлацијата посочуваат на наглото забавување во декември 2023 година и очекуваат нејзино стабилизирање.

Од страна на „Стандард и пурс“ е посочена важноста на добиената потврда од ММФ за првиот преглед на ПЛЛ програмата и достапноста на средства од оваа Програма, како и до други извори на финансирање.

Монетарното затегнување причина за забавувањето на инфлацијата

„Поставеноста на монетарната политика е еден од факторите за значителното намалување на инфлацијата во текот на минатата година. Девизните резерви бележат висок, двоцифрен раст и се во комфорната зона. Банкарскиот сектор и натаму е стабилен, што се согледува преку клучните показатели за неговото работење“, наведува Агенцијата во последниот извештај, пренесе Народната банка.

Од „Стандард и Пурс“ забележуваат дека во декември 2023 година инфлацијата значително забавила сведувајќи се на 3,6 отсто, во споредба со истиот месец претходната година кога изнесувала 18,7 отсто што се должи на поставеноста на монетарна политика, забавувањето на растот на цените на храната и енергијата, како и високата споредбена основа.

„Како резултат на истите фактори, од Агенцијата очекуваат дека годинава инфлацијата ќе изнесува во просек четири отсто, односно во рамките и на последните очекувања на Народната банка. Сепак, Агенцијата оценува и одредени ризици за идната динамика на цените, поврзани со состојбите на пазарот на труд и евентуален неповолен развој на геополитичките случувања“, соопшти НБРМ.

Во извештајот се потврдува и високиот раст на девизните резерви коишто на крајот на 2023 година се зголемени за 17,5 отсто во однос на минатата година и достигнаа 4,5 милијарди евра. Од „Стандард и Пурс“ очекуваат дека девизните резерви и натаму ќе се задржат на стабилно ниво, поддржани од странските инвестиции и финансирањето на државата на меѓународниот пазар.

„Во извештајот се наведува дека како резултат на макропрудентните мерки преземени од страна на централната банка, банкарскиот сектор и натаму е стабилен и неговата отпорност е дополнително зајакната, со историски ниско ниво на нефункционални кредити коешто изнесува 2,8 отсто од вкупните кредити и стабилно ниво на адекватност на капиталот од 18,2 отсто, што е највисоко ниво во последните 17 години“, соопшти НБРМ.

 

Во моментов нема коментари за веста. Биди прв да коментира...

Остави коментар