Трошењата пред избори по забрзан бројчаник, а нема кој да ги контролира

За три месеци од 2024 година државната каса е во минус за 14,5 милијарди денари, соопшти Министерството за финансии. Според буџетот за годинава, планот за 2024 година беше буџетскиот дефицит да изнесува 33,5 милијарди денари.

Дали трошењето пред избори се интензивира? Според податоците на Министерството за финансии, во првиот квартал од 2024 година се собрани за 4,8 отсто повеќе пари на приходната страна во буџетот споредно со лани. На расходната, пак, се потрошени за 20,1 отсто повеќе пари од 2023 година.

Сепак, од Министерството велат дека буџетот е ликвиден и редовно се сервисираат сите обврски. „Финансирањето на дефицитот е обезбедено и се одвива во согласност со планираното со усвоениот буџет за 2024 година во Собранието“.

Извори од Фискалниот совет, тело што има советодавна улога во Министерството за финансии, за „Блумберг Адрија“ велат дека индикативно е зголемување на динамиката во трошењето на буџетските пари. Таа тенденција била видлива уште во првите два месеца од годинава. Кварталните податоци сè уште не се официјално објавени, но растот на трошоците продолжува, велат нашите извори и додаваат дека тоа не е за изненадување пред избори, но дека треба да се зголеми претпазливоста.

Што е исплатено во првиот квартал?

Во првите три месеци од оваа изборна година се потрошени близу 25 отсто повеќе пари за антикризни мерки споредено со лани. Социјалните трансфери се зголемени за околу 17 отсто. Ставката за исплата на пензии на квартална основа се зголемила за над 21 отсто. Зголемени се и трошоците за активни мерки за вработување, потоа блок дотациите до општините.

Во истиот период трошоците за камати кон домашни и странски кредитори се зголемиле за 100 отсто во однос на периодот јануари-март 2023 година.

Забрзувањето на динамиката во трошењето продолжува и во април. Податоците на Министерството за финансии покажуваат дека за четири дена од овој месец дефицитот се продлабочил за 10 милијарди денари. На 4 април минусот во буџетот изнесувал 24,2 милијарди денари (394 милиони евра). Дополнителната заменик-министерка за финансии Елена Петрова, која ја имаа оваа функција во техничката влада во земјава, вели дека заклучно со 7 април дефицитот стигнал до 404,9 милиони евра.

Какви се законските ограничувања?

Изборниот законик предвидува предизборни ограничувања за функционерите, јавните претпријатија и буџетските трошоци во период од 20 дена пред почнувањето на изборната кампања.

Во тој период законот забранува одржување јавни настани за започнување изградба или пуштање во употреба на објекти изградени со буџетски пари или пари од јавните фондови, претпријатија и други субјекти каде што има доминантно државен капитал.

Исто така, во согласност со Изборниот законик, не може да се вршат исплати на надоместоци од буџетски средства или од средства на јавните фондови ако тие не се редовни месечни исплати. Не може ниту да се почнуваат постапки за вработување нови лица во државни и јавни институции, а започнатите постапки се ставаат во мирување.

Министерството за финансии, пак, во истиот период (во случајов од 14 февруари годинава) на својата веб-страница на дневна основа ги објавува реализираните трошоци.

Државната комисија за спречување на корупцијата во предизборниот период собира податоци и води евиденција за бројот, видот, регистарската табличка и состојбата на возилата со кои располагаат јавните фондови, јавните претпријатија и сите други правни лица со државен капитал. Целта е да се види дали има злоупотреба на службените возила во партиски цели за време на кампањата.

Државниот завод за ревизија во овој период ги чешла сметките на политичките партии, односно води сметка за донациите. Сите други извештаи се прават по завршувањето на изборниот процес.

Во моментов нема коментари за веста. Биди прв да коментира...

Остави коментар