Црни прогнози: Забрзан раст на цените до крајот на 2022 година

Во однос на патеката на стапката на инфлација во наредниот период, очекувањата на домашните и меѓународните институции се дека ќе има забрзан раст на потрошувачките цени во 2022 година, со изгледи за постепено стабилизирање и надолен тренд во наредните две години, соопшти Народната банка во новиот квартален извештај.

„Споредено со претходните проекции, тие се повисоки, пред сè поради фактори на страната на понудата и продолжениот притисок од цените на примарните производи, при очекувања за поумерен раст на економската активност, како во глобални рамки, така и во домашната економија“, информираат  од Народната банка.

Очекувањата на анкетираните економски аналитичари искажани во рамките на анкетата за инфлациските очекувања и очекувањата за движењето на реалниот БДП спроведена во јуни се во иста насока и според неа тие предвидуваат стапка на инфлација од 9,5 проценти во 2022 година, 5,5 проценти во 2023 година и 3,9 проценти во 2024 година (во март се очекуваше стапка на инфлација од 6,5 проценти за 2022 година, 4,2 проценти во 2023 година и 3,3 проценти во 2024 година).

Слични се и краткорочните очекувања на потрошувачите и раководителите на претпријатијата за ценовните движења искажани во анкетните истражувања во вториот квартал на 2022 година.

„Подолготрајните притисоци од високите нивоа на цените на храната и енергијата и високото учество на овие производи во потрошувачката кошница, влијаат врз инфлациските согледувања и очекувањата на економските субјекти. Така, според „очекувањата на потрошувачите за промените во цените во наредните 12 месеци“ и натаму поголем е бројот на лицата кои сметаат дека во следните 12 месеци ќе дојде до раст на цените во споредба со бројот на лицата кои очекуваат намалување или непроменети цени“, укажуваат од Народната банка.

Од аспект на очекувањата кај корпоративниот сектор, во овој квартал е зголемен соодносот на раководителите на претпријатијата во преработувачката индустријата и трговијата на мало коишто очекуваат пораст на цените на нивните производи во следните три месеци, наспроти очекувањата во градежниот сектор каде што тој сооднос е намален во споредба со претходниот квартал, иако во градежништвото очекувањата за пораст на цените и натаму се високи.

„Во услужниот сектор, очекувањата на раководителите за зголемување на цените на нивните производи и натаму се во позитивната зона, но се речиси непроменети, во споредба со претходниот квартал“, соопшти Народната банка.

 

 

 

Во моментов нема коментари за веста. Биди прв да коментира...

Остави коментар