Минусите на платата почнаа да растат, каматите ќе паднат минимално

Од 1 јули граѓаните ќе плаќаат минимално пониски казнени камати. Промената ќе следува поради намалувањето во првата половина од годинава на висината на основната камата по која Народната банка (НБРМ) продава благајнички записи.

Таа камата е референтна стапка односно основа за пресметување на казнените камати, кои всушност во земјава, законски, се коригираат двапати годишно, еднаш во јануари и еднаш во јули. Ако во полугодието што изминало има промена на основната камата, тогаш се врши корекција и на висината на каматата за казнено плаќање. Сега се случи тоа, односно во првите шест месеци годинава Народната банка еднаш ја спушти каматата на благајничките записи. Тоа беше во февруари, кога стапката беше намалена од 5,5 на 5,35 проценти, колку што е и сега, а оваа стапка е впрочем основата за пресметка на казнената камата. 

Казнени или познати и како затезни камати пресметуваат банките за кредитите и за картичките во случај на доцнење во редовното плаќање, но и комуналните компании за режиските трошоци кога граѓаните не ги намируваат обврските навреме. Во согласност со регулативата, банките наплатуваат казнени камати за доцнењето во наплатата на денарските кредити или кредитните картички ако ратата не се плати по истекот на 30 дена откога достасала за плаќање, слично како и за сметките за комуналии. 

Во моментов референтната каматна стапка за пресметување на казнената камата е 5,55 проценти, но од јули ќе биде 5,35 проценти. Тоа ќе значи дека казнената камата ќе се намали за 0,2 проценти. Така, казнената камата за договори меѓу трговци и јавни претпријатија ќе биде 15,35 процентни поени, или 10 поени плус стапката на основната камата. Законската казнена камата во договорите во кои барем едно лице не е трговец или најчесто за физички лица од јули ќе биде 13,35 процентни поени.

Минусите на платата се окаматуваат со затезна камата

Втората сега изнесува 13,55 проценти и граѓаните што плаќаат редовно најмногу ја чувствуваат за средствата што ги зеле како минус на своите тековни салда. Имено, минусите на платата се окаматуваат со оваа стапка и тоа е значително високо ако се земе предвид висината на другите камати.

„Во април просечната каматна стапка на новоодобрените кредити на домаќинствата изнесува 4,67 отсто и е намалена за 0,02 п.п. на месечно ниво. Промената во целост произлегува од падот на каматните стапки на денарските кредити без валутна клаузула (за 0,07 п.п.), при раст на каматните стапки на кредитите во странска валута и денарските кредити со валутна клаузула (за 0,25 п.п. и 0,04 п.п., соодветно). Годишниот пад на просечната каматна стапка на новоодобрените кредити на домаќинствата изнесува 0,66 п.п, велат од Народната банка.

Инаку минатиот месец, односно во мај, негативните салда на тековните сметки остварија месечен раст од 4,8 отсто, што е еден од поголемите растови во последниот период. На годишна основа сѐ уште има пад на сумата што се води како долг на домаќинствата за минуси и таа во мај е помала за 2,3 проценти во однос на мај лани. Граѓаните им должеле на банките во тој месец по овој основ вкупно 102,9 милиони евра.

 

 

Во моментов нема коментари за веста. Биди прв да коментира...

Остави коментар