.webp){kind=icon}
Во период кога инфлацијата урива рекорди и парите ја губат својата вредност се зголемува бројот на македонски граѓани кои се заинтересирани за инвестирање во злато, со цел да ги заштитат своите финансиски средства на подолг рок. Тоа го потврдува Ѕвонко Станковски, директор на Дирекцијата за трезор во Уни банка, која на крајот на минатата година стана првата банка што нуди продажба и трговија со инвестициско злато на македонскиот пазар.
„Се повеќе индувидуални клиенти, пред се физички, но и правни лица се заинтересирани за инвестициското злато. Интересот дополнително се зголеми откако почна да расте инфлацијата и по почетокот на кризата предизвикана од војната во Украина. Граѓаните сакаат да се заштитат од можните негативни последици по нивните средства, а инвестициското злато нуди сигурност на долг рок поголема отколку останатите инвестициски инструменти кои подлежат на влијанија од различни фактори“, вели Станковски.
Уни банка на клиентите им нуди златни плочки со чистота од 999.9/1000 (24 карати). Станува збор за сертифицирани производи кои се предмет на трговија на сите финансиски центри во светот, а првенствено се тргува на London Bullion Market Association (LBMA).
Станковски додава дека цената на инвестициското злато изразена во евра по грам во изминатиов период пораснала од 12 до 13 проценти. Според него, во светот веќе се чувствува недостиг од инвестициско злато и производителите не можат да постигнат да ја задоволат побарувачката, пред се поради зголеменото купување од централните банки. Тоа дополнително ќе влијае на цената на златото на долг рок, со оглед на тоа што станува збор за ограничен ресурс.
Централните банки главни играчи
Голем број централни банки во светот ги зголемија основните каматни стапки за да ја зауздаат инфлацијата и со тоа влијаеја врз краткорочно намалување на цената на златото. Имено, институционалните инвеститори за момент се преорентираа од златото кон државните и благајничките записи поради зголемените приноси.
Сепак, тоа не значи дека централните банки истовремено прекинаа да купуваат злато. Тие и понатаму важат за најголеми инвеститори кога станува збор за златото, коешто го чуваат во своите резерви.
Според Светскиот совет за злато (World gold council) централните банки купиле 180 тони злато во второто тримесечје од годинава, со што нето-купувањето во првата половина од годинава достигна 270 тони. Турција е најголемиот купувач на злато во првата половина од годината, додавајќи 63 тони на своите златни резерви (32 проценти од вкупните резерви). Египет е втор најголем купувач со 44 тони злато и земјата сега има 125 тони злато, или 21 отсто од вкупните резерви. Во јуни, Централната банка на Ирак објави дека купила околу 34 тони во текот на месецот, зголемувајќи ги своите златни резерви на нешто повеќе од 130 тони. Индија исто така продолжи да купува злато и ги зголеми златните резерви за 15 тони во овој период. Ирска е уште еден значаен купувач во првата половина на 2022 година, додавајќи речиси 3 тони злато на своите резерви во текот на првиот квартал.
Во регионот Адриа само Хрватска без златни резерви
Сите земји во регионот Адриа, освен Хрватска имаат резерви во злато. На првото место по вредноста на златните резерви е Србија, а на второто е Македонија. Потоа следуваат Словенија и БиХ.
На крајот на јули 2022 година, официјалните девизни резерви на Македонија изнесуваат 3.196.600.000 милиони евра и во однос на претходниот месец бележат зголемување за 80,5 милиони евра. Најголем дел од девизните резерви се пласирани во хартии од вредност (70, проценти) по што следуваат валутите и депозитите (17,7 проценти) и монетарното злато (12 проценти).
Според извештајот за финансиското работење на Народната банка, вкупните златни резерви заклучно со 31 декември 2021 година, изнесуваат 221.520,1677 унци (2020 година: 221.521,1497 унци). Каматните стапки на орочените златни депозити во 2021 година се движеле во интервал од 0,04 до 0,25 проценти годишно за златните депозити засновани врз цената на златото во САД-долари (2020 година: со каматна стапка помеѓу 0,01 и 0,11 проценти на годишно ниво).
