.webp){kind=icon}
Повеќе разочарувачки вести за инфлацијата би можеле да помогнат во убедување на креаторите на политиката на Федералните резерви (ФЕД) повторно да ги зголемат каматните стапки, давајќи им муниција на јастребите. кои тврдат дека е потребно повеќе работа за да се врати стабилноста на цените.
Индексот на цените на трошоците за лична потрошувачка, кој е префериран мерач на инфлација на ФЕД, во април се зголеми за 0,4 проценти, покажаа денешните бројки на Министерството за трговија на САД. Тоа е побрз раст од очекуваното. Од пред една година, овој статистички показател се зголеми за 4,4 проценти, а во март на годишно ниво растот беше 4,2 отсто. Со исклучок на храната и енергијата, базичната инфлација се зголеми за 0,4 проценти во споредба со претходниот месец и за 4,7 отсто во однос на април 2022 година.
„Ова е погрешна насока за ФЕД. Јуни ќе зависи од надминувањето на проблемите околу максималната граница на американскиот долг, но сега е во игра јулско зголемување“, рече Дајан Свонк, главен економист во КПМГ (KPMG LLP).
Официјалните лица досега ги зголемија стапките за пет процентни поени во изминатите 14 месеци за да ја ограничат инфлацијата, која сега е повеќе од двојно поголема од нивната цел од два отсто. Со нивната референтна стапка, која сега е во опсег од 5 до 5,25 проценти по последното покачување од 25 базични поени на почетокот на овој месец, претседателот на Банката на федерални резерви, Џером Пауел, пред една недела рече дека креаторите на политиката можат да си дозволат да ги следат податоците и изгледите и како тие се развиваат.
Движење на базичната инфлација во САД / Bloomberg Mercury
Креаторите на политиките ќе добијат на располагање уште едно дополнително читање за вработеноста и потрошувачките цени пред следниот состанок на Федералниот комитет, кој ќе се одржи на 13 и 14 јуни. Тие исто така може да не сакаат да ги зголемуваат каматните стапки сè додека постои неизвесност околу судбината на преговорите за плафонот на долгот во Конгресот.
Сепак, инвеститорите ги зголемија облозите за зголемување на каматните стапки следниот месец на повеќе од 50 проценти од 18 отсто, колку што беа пред една недела, главно поради говорот на надлежните од ФЕД и економските показатели. По објавата на извештајот, приносите од државните обврзници скокнаа.
„Комбинацијата на тоа инфлацијата да се движи нагоре и потрошувачките трошоци да останат силни ќе ги зголеми шансите ФЕД да ги покачи стапките уште еднаш во средината на јуни“, рече Кети Бостјанчиќ, главна економистка во „Нешнвајд“ (Nationwide Life Insurance Co).
Сепак, некои претставници на ФЕД, вклучувајќи ги Рафаел Бостиќ од ФЕД Атланта и Патрик Харкер од ФЕД Филаделфија, нагласија дека влијанието на банкарските неуспеси врз кредитите допрва треба да се почувствува и дека монетарната политика функционира со задоцнување, така што голем дел од ефектите од повисоките стапки треба допрва да се види во официјалните податоци.
Креаторите на монетарната политика на нивниот состанок на 2 и 3 мај рекоа дека не се сигурни за тоа колку дополнително затегнување на политиката може да биде потребно, а го мерат напредокот на инфлацијата, кој е побавен од очекуваниот, како и еластичниот пазар на трудот во однос на веројатноста за кредитна криза по неодамнешните банкарски превирања.
