Фед сака со трпение да ја победи рецесијата

Сè поголем број економисти, вклучувајќи и претставници на Федералните резерви, предвидуваат дека САД ќе избегнат рецесија, иако ќе може да здивнат дури до 2024 година.

Претседателот на Фед, Џером Пауел, очекува дека централната банка ќе успее да ја врати инфлацијата на целта од два процента, додека го одржува економскиот раст, иако таа задача ќе биде тешка.

Од една страна, недоволно силен одговор на ценовните притисоци може да доведе до враќање на инфлацијата, што потоа ќе бара уште подрастични мерки. Друг ризик е дека задоцнетите ефекти од претходните затегнувања може да ја доведат економијата во рецесија.

„За жал, мислам дека сликата за сето тоа нема да биде целосно јасна барем уште два квартала, иако факт е дека забавувањето на инфлацијата му даде на Фед дополнително време“, рече Џонатан Милар, економист во „Барклис“ (Barclays Capital. Inc). „Се чини дека Фед е посвесен од пазарот дека патот до меко приземјување е сè уште многу неизвесен“, додаде тој.

Комитетот за деловни циклуси на Националното биро за економски истражувања, тело што прогласува рецесија во САД, ја дефинира рецесијата како значителен пад на економската активност што трае повеќе од неколку месеци и се чувствува во повеќето сектори. Може да бидат потребни до 21 месец за официјално да се прогласи рецесија. Пред тоа, комисијата треба да ги обработи извештаите и ревидираните верзии на податоците.

Иако не постои официјална дефиниција за меко приземјување, повеќето економисти го сметаат за ублажување на инфлацијата без рецесија или сериозна штета врз пазарот на трудот.

Месечно движење на базичната инфлација (сини столпчиња) и промена од година на година во вкупната (бела линија) и базичната инфлација (сина линија) во САД Bloomberg

Патот не е лесен: Студијата на поранешниот потпретседател на Фед, Алан Блиндер, за 11 циклуси на затегнување на монетарната политика од 1965 до 2022 година, покажа дека четири обиди на Фед резултирале со меки приземјувања. Сите други циклуси на монетарно затегнување резултирале со враќање на забрзаниот раст на цените по две години или рецесија.

„Има ризици од двете страни“, вели Ричард Кларида, кој беше потпретседател од 2018 до 2022 година, а сега е глобален економски советник во „Пацифик инвестмент“ (Pacific Investment Management Co.) „Мислам дека сè ќе ни биде многу појасно до пролет“, додаде тој.

Што вели „Блумберг економикс“...

„Што се однесува на рецесијата, многу показатели укажуваат дека 2022 година е врвот на циклусот. Индикатор што отскокнува се податоците за вработеноста. Се шпекулира дека бројот на нови работни места (по исклучување на сезонските работници) за претходните месеци може да биде ревидиран значително надолу. Секако до следната година нема да ги знаеме 'вистинските' податоци за 2022 година, а како изгледаат 'точните' податоци за оваа година нема да знаеме до 2025 година“, посочува Ана Вонг, економистка во „Блумберг“.

Претставниците на Фед размислуваат за уште подолг период. Федералниот комитет за отворен пазар, кој ја одредува политиката на централната банка, предвидува дека инфлацијата ќе ја достигне целта од два отсто веројатно на почетокот на 2025 година.

Бидејќи е тешко да се постигне меко приземјување, за модификации на монетарната политика ќе треба повеќе време. Централните банкари очекуваат референтната каматна стапка на крајот на следната година да биде 4,6 отсто, што е за два-три процентни поени повисоко од долгорочниот тренд и за околу половина поен повисоко од она што го очекуваат пазарите.

Повеќе коментари на економисти и целата анализа прочитајте ја на овој ЛИНК.

Во моментов нема коментари за веста. Биди прв да коментира...

Остави коментар