.webp){kind=icon}
Гласачите во Казахстан, државата што важи за најголем производител на ураниум во светот, на референдумот што се одржа вчера поддржаа изградба на нуклеарна централа.
Централната изборна комисија на Казахстан утрово соопшти дека 71 отсто од гласачите го дале својот глас за владиниот план за изградба на нов реактор. Според прелиминарните пресметки, одзивот бил околу 64 проценти, што е многу над прагот неопходен за референдумот да се смета за успешен.
Најголемиот производител на нафта во Централна Азија не користи нуклеарно производство уште од 1999 година. Земјата сега се бори со недостиг од електрична енергија делумно поради растот на енергетски интензивната криптоиндустрија и исклучувањето на старите постројки. Државата се стреми значително да го прошири производството на електрична енергија до 2035 година, вклучувајќи и нуклеарни извори како дел од комбинацијата. Од тамошното министерство за енергетика соопштија првична процена според која изградбата на нуклеарната централа би чинела околу 10-12 милијарди долари.
Поддршката на Казахстан за атомската енергија го нагласува растечкиот глобален интерес за стабилна 24-часовна нуклеарна енергија во услови кога земјите се обидуваат да ги задоволат брзорастечките потреби за енергија, а истовремено се стремат да ја намалат зависноста од фосилните горива за да се намалат емисиите.
Според презентацијата на Министерството за енергетика, „Чајна нешнел нуклеар корп“ (China National Nuclear Corp), „Кореја хидро енд пауер“ (Korea Hydro & Nuclear Power Co), руската „Росатом корп“ (Rosatom Corp) и „Електрисите де Франс“ (Electricite de France SA) се потенцијалните градители.
„Мое лично мислење е дека во Казахстан треба да работи меѓународен конзорциум, составен од глобални компании со најнапредни технологии“, рече претседателот Касим-Жомарт Токаев откако го даде својот глас во неделата, соопшти неговата прес-служба.
