НЛБ Фондови: Ќе расте атрактивноста на американските акции

Глобалниот економски раст ќе продолжи во 2025-та година, а главен двигател ќе бидат САД, додека растот во Европската унија ќе биде поскромен, се наведува во аналитичкиот поглед на НЛБ Фондови за 2025 година.

Клучните фактори за економскиот раст, според анализата, ќе бидат доброто потрошувачко расположение, континуираното трошење на владата, намалувањето на каматните стапки од повеќето клучни централни банки, а веројатно и даночните намалувања и воведувањето нови пазарни реформи. Сепак, се очекуваат големи разлики во стапките на раст меѓу земјите.

„Со оглед на тоа што не се очекува глобално економско прегревање и што во моментов нема нови шокови во понудата на хоризонтот, не очекуваме значителен раст на инфлацијата во наредните квартали“, стои во аналитичкиот поглед на НЛБ Фондови за оваа година.

Економски раст

Во однос на глобалниот економски раст, НЛБ фондови во анализата потсетува дека според ФЕД, економскиот раст во САД се очекува да се намали на 2,1 отсто во 2025 година, од 2,4 отсто лани. Клучниот фактор за растот ќе биде приватната потрошувачка, која во моментов изнесува околу 70 отсто од американскиот БДП.

Спротивно, ситуацијата во Европската унија е обележана со инсистирањето на поголема рамнотежа на буџетот во услови на повторливи политички кризи и отсуство на финансиска и банкарска унија што ќе го оневозможи соодветното финансирање на економскиот раст. Економскиот раст во 2025 година ќе биде стимулиран првенствено од евтините пари, обезбедени од експанзивна монетарна политика на ЕЦБ.

Кога станува збор за пазарите во развој, се очекува економскиот раст на Кина, проценет на 4,8 отсто во 2024 година, малку да забави во 2025 година. Покрај експанзивна монетарна политика, кинеската влада во 2025 година ќе усвои и неколку фискални мерки за стабилизирање на економијата.

Пазари на капитал

„Согледувајќи ги берзанските можности, очекуваме дека цените на акциите на американските компании во 2025 година ќе бидат поддржани од солиден економски раст, полабава монетарна политика, фискални мерки и пониски даноци. Нискиот стратешки ризик дополнително ја зголемува атрактивноста на американските акции. Иако вреднувањето изгледа малку над просекот на прв поглед, постојат неколку причини зошто американските акции остануваат атрактивен избор за инвеститорите и зошто сме малку над просекот во корист на американските акции“, прогнозираат од НЛБ Фондови.

За разлика од успесите на американските пазари, европските берзи имаат сè помалку европски компании со глобално препознатливи брендови, што е особено видливо во технолошкиот сектор. Европа, сепак, нема компании кои сериозно би и конкурирале на американската група „величествените седум“ компании со високи перформанси и технолошко влијание.

Дополнително, европските компании, особено оние од автомобилската индустрија, се соочуваат со кинески ривали.

„На ова се додава и погрешната енергетска политика, војната во Украина, помалите државни инвестиции, отсуството на заеднички еврообврзници на ниво на ЕУ и потенцијалните царини, кои придонесуваат за неповолно опкружување за раст“, стои во анализата.

Во моментов нема коментари за веста. Биди прв да коментира...

Остави коментар