ЕЦБ и Фед на различни раскрсници, пазарите чекаат расплет

Пред финансиските пазари е динамичен период, додека инвеститорите со внимание ги очекуваат новите одлуки на водечките централни банки – Европската централна банка (ЕЦБ) и американските Федерални резерви (Фед) – за движењето на каматните стапки. Во фокус се две клучни недели што би можеле да го одредат курсот на монетарната политика до крајот на годината, но и да имаат пошироки импликации врз глобалната економија.

Од ЕЦБ цврсто се очекува на состанокот неделава да не ја промени каматната стапка, при што аналитичарите ќе се фокусираат на пораките што би можеле појасно да укажат дека актуелниот циклус на олеснување на монетарната политика дефинитивно завршил. Од друга страна, американскиот Фед влегува во клучна фаза на одлучување, имајќи предвид дека финансиските кругови во своите пресметки веќе целосно го вградуваат очекувањето за долгоочекуваното намалување на референтната стапка.

Европа веројатно ја притиска кочницата по осум намалувања

ЕЦБ ќе одлучува в четврток за понатамошното движење на трошоците за задолжување, при што пазарите немаат дилема дека каматите ќе останат исти. Резултатите од неодамнешната анкета на „Блумберг“ со економисти покажаа дека мнозинството од нив предвидува стапката на депозити да остане на два отсто барем до крајот на следната година. Силното уверување во исходот на претстојниот состанок доаѓа откако централната банка на претходниот состанок, кон крајот на јули, ги задржа постојните стапки, што беше прва пауза по осум намалувања во овој циклус. Дополнително, изјавите на поединечни претставници на ЕЦБ деновиве исто така се движеа во насока на задржување на тековните вредности на каматите.

 

 

При образложувањето на јулската одлука, од ЕЦБ наведоа дека понатамошните одлуки за каматните стапки ќе се носат пред сè врз основа на процената на инфлациските изгледи и поврзаните ризици, „имајќи ги предвид новите економски и финансиски податоци, движењето на базичната инфлација и ефикасноста на прелевањето на ефектите од монетарната политика“.

Во таа насока треба да се истакне дека инфлацијата во еврозоната во август изнесувала 2,1 отсто, што исто така упатува на приближување кон крајот на циклусот на намалување на каматите. Годишниот индекс на потрошувачки цени незначително порасна во однос на претходниот месец (кога изнесуваше два отсто), што беше во согласност со очекувањата на економистите. Според најновите проекции на експертите, инфлацијата на среден рок треба да се задржи на целта од два отсто.

 

 

Истовремено, економијата на еврозоната покажува отпорност благодарение на стимулативната политика, државната потрошувачка и ниската невработеност. Како што истакнува аналитичкиот тим на „Блумберг Адрија“, Шпанија предничи благодарение на туризмот, имиграцијата и фондовите на Европската Унија (ЕУ), додека Германија е во рецесија, но инвестициите во инфраструктура и одбрана би можеле да го ублажат падот.

На страната на ризиците, пак, остануваат американските царини од 15 отсто на поголемиот дел од увозот од ЕУ и потенцијалните нови дополнителни давачки, вклучувајќи ги и царините со кои претседателот на САД, Доналд Трамп, неодамна се закани како одговор на казната што ЕУ му ја изрече на „Гугл“ (Google). Тука се и предизвиците поврзани со зајакнувањето на еврото и политичката нестабилност во Франција, каде што премиерот Франсоа Бајру неодамна објави дека поднесува оставка, а новиот мандатар за состав на владата ќе биде петти по ред за помалку од две години.

Bloomberg

Според пишувањата на „Блумберг“, падот на француската влада го остава прашањето за фискалната консолидација во втората најголема економија во Европа и понатаму без решение. Имајќи предвид дека ЕЦБ е првата линија на одбрана на еврозоната во случај на должничка криза, коментарите на претседателката Кристин Лагард ќе бидат внимателно анализирани за можни сигнали колку е подготвена да помогне во смирувањето на превирањата во земјата во која некогаш беше министерка за финансии.

Во САД се очекува полабава монетарна политика

Американските централни банкари ќе се состанат за нешто помалку од една недела, на 16 и 17 септември, а пазарите се убедени дека Фед овој пат ќе ги намали каматните стапки за 25 базични поени. Тоа би било прво намалување од декември минатата година, кога резот исто така изнесуваше една четвртина процентен поен.

 

 

Очекувањата за олеснување на монетарната политика беа поддржани од официјалната статистика објавена минатата недела, која покажа дека пазарот на трудот се „лади“. Според извештаите на Американскиот завод за статистика на трудот, стапката на невработеност пораснала од 4,2 на 4,3 отсто – највисоко ниво од 2021 година – додека растот на бројот на вработени во САД во август се забавил. Бројот на работници надвор од земјоделскиот сектор минатиот месец пораснал за само 22.000, наспроти 79.000 во јули. Аналитичарите анкетирани од „Ројтерс“ предвидуваа раст на бројот на работни места од 75.000.

 

 

Да потсетиме, за разлика од некои други централни банки чија примарна цел е одржување на ценовната стабилност, Фед има две главни задачи: ограничување на инфлацијата и максимална вработеност.

Кога претседателот на Фед, Џером Пауел, кон крајот на минатиот месец ги засили надежите дека септември ќе донесе олеснување на монетарната политика, тоа го стори укажувајќи токму на растечките ризици за пазарот на трудот, иако загриженоста околу инфлацијата и натаму трае. Новиот извештај за индексот на потрошувачки цени во САД (за август) ќе биде објавен в четврток, но останува неизвесно колку претстојните бројки ќе влијаат врз одлуката на членовите на Фед, имајќи предвид дека нивниот претседател, со споменатото пренасочување на фокусот кон ризиците во секторот за вработување, даде сигнал дека можеби нема да чека совршени податоци за инфлацијата пред повторно да ги намали каматите.

Bloomberg

Се очекува ажурираниот индекс да покаже дека потрошувачките цени продолжуваат да растат, иако пазарот на трудот забавува, а знаците на упорна инфлација би можеле да ги намалат надежите дека централната банка ќе продолжи со последователни намалувања до крајот на годината.

„Пазарот предвидува меко приземјување и не е сигурно дека Фед ќе биде принуден да ги намали стапките повеќе отколку што во моментов е вградено во цените“, изјави шефот на стратегијата за каматни стапки во САД во компанијата „Макро Хајв“ (Macro Hive), Антонио Дел Фаверо, пренесе „Блумберг“ во вторникот.

Основната инфлација во САД во јули порасна најмногу од почетокот на годината, додека скромниот раст на цените на стоките ја ублажи загриженоста за американската економија.

 

 

Инаку, на објавата за најновите вредности на потрошувачките цени ќе ѝ претходи новиот извештај за индексот на производствените цени, кој се смета за почетен индикатор за вкупната потрошувачка инфлација. Тој ќе биде достапен подоцна во текот на денот, а за потсетување, минатиот пат донесе бројки што беа значително над очекувањата – порасна за 0,9 отсто во однос на претходниот месец, што претставуваше најголем раст од врвот на инфлацијата на потрошувачките цени во јуни 2022 година. Гледано на годишно ниво, индексот скокна за 3,3 отсто.

 

 

 

 

 

 

 

 

Во моментов нема коментари за веста. Биди прв да коментира...

Остави коментар