Не паничете: Што се крие зад големата распродажба на акции

Најпрво да се согласиме, ситуацијата е непријатна. Но не паничете. Обидете се да не ја проверувате штетата на вашето портфолио. Држете се до вашиот план. Ако минатата недела мислевте дека тоа е разумен план, истиот тој денес не е помалку разумен . Никогаш, никогаш не треба да бидете принудени - без разлика дали од околности или од емоции - да продавате. Кога продавате, тоа треба да биде избор, а не поради потреба или страв.

Ако немате план, сега е време да направите. Тоа значи игнорирање на она што се случува на пазарот. Сега нема смисла да трчате наоколу како мува без глава. Подгответе план денес за да не ве фати „на спиење“ следниот пат кога ќе се случи ова (бидејќи ќе се повтори).

Земете лист хартија и размислете зошто инвестирате (веројатно е за пензија) и колку време треба да мине додека да стигнете до целта (колку е подалеку толку поголем ризик можете да си дозволите да преземете, освен ако не сте во среќна позиција кога веќе имате пари колку што мислите дека ќе ви требаат).

Па, чисто од љубопитност, што по ѓаволите се случува?

Стравот од тешко приземјување се враќа со одмазда

Едно големо објаснување е дека се развива carry trade на јапонскиот јен. Накратко, на овој или оној начин, многу луѓе се обложуваа на тоа дека јапонскиот јен станува сè послаб, но промената на очекуваниот пат на јапонските каматни стапки наспроти американските создаде поинаква ситуација.

Како резултат на тоа, луѓето сега се во паника и се обидуваат да се ослободат од своите „short јен“ позиции, што потоа го прави јенот уште посилен, бидејќи единствениот начин да се отфрли кратката позиција на јенот е да се продаде една работа и да се купи јен.

Ова можеби објаснува зошто Јапонија досега е епицентарот на оваа несреќа, при што и Nikkei и Topix имаа катастрофални перформанси вчера.

Во ред, тоа веќе го знаевме. Што друго се случува? Постои уште едно многу очигледно „преполно тргување“, кое исто така се развива веќе извесно време: трговијата со технологија во САД.

Големите технолошки компании веќе подолго време се ценети како совршенство. Но сомнежите за вештачката интелигенција, која носи високи трошоци денес за несигурни приноси во иднина, продреа на пазарите и почнаа да ги вознемируваат инвеститорите.

Ова страшно чувство сега се дополни со веста дека најпознатиот светски инвеститор Ворен Бафет заработил одреден профит со отфрлање половина од своите акции во „Епл“ (Apple), додека производителот на чипови „Интел“ (Intel) планира да намали огромен дел од својата глобална работна сила во обид да се израмни со ривалите.

Згора на сето тоа, во петокот, најновиот американски извештај за работните места беше послаб од очекуваното. Сето тоа е потврда за постојаниот страв на пазарот дека Банката на федерални резерви (Фед) чекаше премногу долго за да избегне тешко приземјување и дека САД сега се упатуваат кон рецесија - што е целосен пресврт од гледна точка на почетокот на годинава.

Некои укажуваат и на геополитички страв, што е разбирливо, со оглед на опасностите од натамошна ескалација на Блискиот Исток. Сепак, би очекувале нафтата да расте во тој случај, а брентот е тврдоглаво евтин. Тоа имплицира дека пазарот реагира многу повеќе на стравувањата од забавување отколку на геополитиката во моментов.

Како што истакнува Џим Рид во „Дојче банк“ (Deutsche Bank), исто така навистина не помага тоа што е август, и затоа ликвидноста не е она што обично е, што, пак, ги преувеличува движењата.

Што ќе се случи следно?

Претпоставувам дека очигледниот и не многу корисен одговор овде е: работите или ќе се смират или не. Имавме големи движења за кратко време. Тоа секако може да ги „скрши“ работите, обично хеџ-фондовите или некој друг презадолжен ентитет.

Но, иако многу се зборува за тоа дека Фед можеби ќе повлече итно намалување на стапката, мислам дека тоа нема смисла, а се согласува и мојот пријател Маркус. Засега, како што истакнува тој, дури и ако некои инвеститори изгубиле многу пари, нема ништо суштински „скршено“ или загрозено од тоа, како во случајот со „Леман брадерс“ (Lehman Brothers) или падот во ковид. Фед не може едноставно да намалува секогаш кога има голем пад на пазарот.

Имајќи го ова предвид, веројатно сега е многу полесно за Фед да продолжи со намалување на стапката за половина поен, а не за четвртина поен во септември, што исто така ја нагласува пристрасноста кон намалување на повеќето централни банки на развиените пазари.

Моето единствено неодобрување овде е дека ова, пак, се чини дека го прави јенот уште посилен, но ако потезите станат „поредовни“, тогаш тоа не е толку голем проблем.

Сосема веројатно, штом ќе се извршат принудната продажба и ребалансирање, инвеститорите ќе почнат да се возбудуваат поради очекуваните намалувања на каматните стапки. И тогаш тие ќе почнат да се нервираат за сè што може да го спречи тоа - како што се податоците за инфлацијата (што, пак, значи дека е добра вест дека цената на нафтата е намалена).

Како и да е, како што реков претходно, клучот е да не се паничи. Овие промени на расположението на пазарот сме ги виделе и порано. И ако имате список за следење - ако има акции или други средства што се надевавте да ги купите, но мислевте дека се премногу скапи - сега е време да проверите дали вашето образложение сè уште важи.

Во моментов нема коментари за веста. Биди прв да коментира...

Остави коментар