Преглед на берзите: Рекорди на криптопазарот и забавена Германија

Инвеститорите сè уште ги преиспитуваат резултатите од американските претседателски избори и кадровските избори во новата администрација на Доналд Трамп. Активностите беа бурни на криптопазарот, каде што најголемата криптовалута, биткоин, неколкупати постигна рекорди.

Биткоин: Рекорд по рекорд и потоа смирување

По бурниот раст, биткоинот малку се смири кон крајот на минатата недела. Во петокот се спушти под 87 илјади долари и реагираше на изјавата на претседателот на американската централна банка Џером Пауел, кој посочи дека Федералните резерви нема да брзаат со намалување на каматните стапки. Поради тоа, токенот остана околу 6.500 долари под рекордната вредност достигната во средата.

Криптоманијата во меѓувреме се префрли и на Волстрит. 

„Во понеделникот првпат се случи акциите на ’Микростратеџи’ (MicroStrategy) и криптоберзата Коинбејс (Coinbase) да ги надминат по обемот на тргување акциите на ’Епл’, ’Амазон’, ’Мета’ и многу други. Само ’Тесла’ и ’Енвидија’ останаа над нив. Се чини дека криптоманијата на Волстрит само што почнува“, изјави за српскиот портал Иван Андрејевиќ, криптоаналитичар и коосновач на ЦТБ (CTB Crypto & Consulting).

Индексот на страв и алчност, кој го мери расположението меѓу инвеститорите на криптопазарот, се помести во зоната на екстремна алчност. Се прашуваме кога е вистинското време за наплата на добивките?

Коктел од проблеми за Германија

Продолжуваме на Стариот Континент, каде што во центарот е европскиот „пациент“ - Германија. Добивките на најголемите германски компании, кои котираат на берзата, според податоците на советодавната компанија „Ернст и Јанг“ (Ernst & Young), се намалија во последниот квартал. Летото беше слабо за компаниите од автомобилската индустрија, пишуваше „Шпигел“. Добивката на шесте производители и доставувачи на автомобили во DAX во споредба со истиот квартал минатата година падна за 45 проценти. Добивката на 40 компании што котираат во DAX падна за 8,5 проценти, достигнувајќи 35,9 милијарди евра.

Значително подобро работеа други компании, како осигурителната компанија „Алијанц“, технолошкиот гигант САП (SAP) и компанијата за оружје „Рајнметал“. Продажбата и добивката значително пораснаа. Само во првата половина од годината сојузната влада дозволи извоз на воена опрема во вредност од најмалку 7,48 милијарди евра, што е годишно зголемување од 30 проценти. Причината за зголемувањето на извозните дозволи е главно зголемувањето на испораките на оружје за Украина. Вкупната продажба на сите компании во DAX се зголеми за еден процент, на 438,5 милијарди евра. „Ернст и Јанг“ забележува дека работењето со Северна Америка било особено добро, додека продажбата во Азија се намалила.

Претседателот на Фед, Џером Пауел Kent Nishimura/Bloomberg

Фед не брза

На европските (и глобалните) берзански индекси влијаеше и изјавата на Пауел, кој ги намали очекувањата за натамошно намалување на каматните стапки во САД. Инвеститорите сè уште ги анализираат резултатите од американските претседателски избори.

Европските акции и американските фјучерси паднаа, откако Пауел даде на знаење дека Фед не брза со намалувањето на каматните стапки. Индексот Stoxx 600 во петокот падна за 0,7 проценти и е на пат кон четвртиот неделен пад, а фјучерсите на индексот S&P 500 покажуваа втор ден на намалување. Инвеститорите исто така ги намалија своите очекувања дека Фед ќе ги намали каматните стапки во декември.

Bloomberg Adria

Светските берзански индекси минатата недела завршија во црвено. Американскиот индекс S&P забележа пад од 0,4 проценти на неделно ниво, германскиот DAX падна за 0,5 проценти, додека Dow Jones не забележа ниту пад ниту пораст. Најголема загуба регистрира јапонскиот индекс Nikkei, со пад од 2,1 процент.

Индексот на доларот минатата недела се зголеми за околу 1,4 проценти, откако во четвртокот достигна двегодишен максимум. Доларот зајакна по победата на Трамп на изборите, а последниот поттик го донесоа коментарите на претседателот Пауел.

Од Кина во петокот пристигнаа податоци што укажуваат дека економијата се стабилизира. Стимулативните напори во Пекинг позитивно влијаеле на клучните делови од економијата. Малопродажбата во Кина во октомври порасна за 4,8 проценти, што ги надмина прогнозите. Индустриското производство опадна за 5,3 проценти, што е помалку од очекувањата. Втор месец по ред е забележан пад на цените на недвижностите.

Кинеските берзански пазари очигледно со резерви ги примија фискалните мерки на централната власт во Пекинг. Забрзувањето на потрошувачката и економскиот раст на азискиот гигант засега не дадоа резултати, изјави Каанхари Синг од „Барклис“ (Barclays) за телевизијата „Блумберг“. „Тоа е значајно, бидејќи изгледа дека кинеските фискални поттици би можеле да бидат повеќе реактивни отколку проактивни“, додаде тој.

Што нè очекува неделава?

Понеделник, 18 ноември

- „Евростат“ ќе ја објави надворешнотрговската билансна сметка на еврозоната за септември
- Во Бразил ќе започне дводневниот самит на лидерите на Г20 

Вторник, 19 ноември

- „Евростат“ ќе ги објави податоците за инфлацијата во еврозоната за октомври

 Среда, 20 ноември

- Јапонија ќе ги објави податоците за трговска размена 
- Во Обединетото Кралство ќе бидат објавени податоците за инфлацијата 
- „Енвидија“ ќе ги објави деловните резултати

Четврток, 21 ноември

- Во САД ќе бидат објавени податоците за побарувањата за невработеност и продажбата на нови домови

Петок, 22 ноември

- Во Германија ќе бидат објавени податоците за БДП за третото тромесечје 
- Во Германија, Франција, Обединетото Кралство и САД ќе бидат објавени индексите PMI за производството 

 

Во моментов нема коментари за веста. Биди прв да коментира...

Остави коментар