Инвеститорите во паника: Индексот на страв највисок од пандемијата

Индексот на волатилност Cboe (VIX), кој инвеститорите често го нарекуваат и индекс на стравот, достигна највисоко ниво од април 2020 година, откако заострувањето на трговската војна го турна индексот S&P 500 на најниско ниво во последните 11 месеци.

Вкупниот обем на изведени договори за купување права на продажба (put опции) достигна рекорд, бидејќи инвеститорите масовно бараа заштита од понатамошни падови. VIX го заврши денот на 45,31 – вредност која последен пат беше забележана во раните месеци на пандемијата на ковид-19.

 

 

Иако тргувањето кон крајот на денот и по прилично големите падови во првата половина на денот донекаде се смири, волатилноста остана висока. VIX – кој ја мери очекуваната 30-дневна волатилност на индексот S&P 500 – останува покачен, што одразува загриженост дека продажбата на берзата би можела да продолжи. Во август минатата година, VIX достигна дури 65,73, пред да падне под 40.

„Такви нивоа на глобален ризик всушност сме виделе само во кризни периоди“, рече Стјуарт Кајзер, шеф на стратегијата за тргување со акции во „Сити“. „Ова сè уште не е капитулација, но покажува дека пазарот е во стресна состојба.“

 

 

 

Во 6 часот наутро по њујоршко време, силен пад на фјучерс договорите предизвика скок на VIX над 45, откако Кина воведе возвратни царини кон САД. VIX се врати на тоа ниво и откако претседателот на Федералните резерви Џером Пауел изјави дека централната банка „нема да брза“ со намалувањето на каматните стапки.

Како и во август, почетната реакција на пазарот веројатно беше засилена поради ниската ликвидност пред почетокот на редовното тргување во САД.

Во последната година, периодите на пазарен стрес беа краткотрајни – скоковите на волатилноста, како во август и декември, брзо избледеа, бидејќи по иницијалната побарувачка за заштита обично следеше пад на интересот.

Алон Росин, стратег за институционални деривати во инвестициската компанија „Опенхајмер“, вели дека инвеститорите кои осигурувале поединечни акции преку индексни опции биле меѓу најпогодените.

„Бевме сведоци на огромни загуби, имаше многу присилна продажба,“ рече Росин за тргувањето во петокот. „Ако вашата главна заштита е врзана за индексот, додека поседувате поединечни волатилни акции, тоа претставува сериозен дисбаланс.“

Изненадување на пазарот пред објавата на царините

Финансискиот удар за инвеститорите веројатно беше уште поголем поради општата рамнодушност пред објавата на царините во средата. Пред почетокот на неделата, дериватите на индексот S&P 500 укажуваа на поголема волатилност поради извештајот за вработување објавен во петокот отколку поради царините.

„Пазарот тоа погрешно го процени – или барем еден негов дел,“ рече Бен Ајферт, партнер и стратег во хеџ-фондот КВР (QVR). „Оној дел од пазарот кој веруваше во теоријата 'Трамп игра 4Д шах', многу се излажа.“

„На пазарот на опции, вчерашната распродажба изгледаше прилично уредно, денес гледаме многу повеќе заштитничко тргување,“ рече Менди Ксу, стратег за пазарни информации за деривати во ЦГМ (Cboe Global Markets). „Додека вчера инвеститорите се занимаваа со прашањето кој ќе биде победник и губитник во трговската војна, денес гледаме општа распродажба поради сè поголемата загриженост околу рецесијата.“

Во моментов нема коментари за веста. Биди прв да коментира...

Остави коментар