Акциите се совршено преценети - царините се закануваат на Волстрит

Вообичаената мудрост на Волстрит изгледа дека е следнава: најновиот подем на американскиот берзански пазар кон рекордни нивоа продолжува без прекин бидејќи, кога станува збор за заканите со царините, претседателот Доналд Трамп „гласно зборува, но носи мала палка“.

Сепак, без разлика какви ќе бидат крајните одлуки на Трамп во однос на царините за преостанатите трговски партнери, некои истакнати гласови на пазарот предупредуваат дека инвеститорите ги потценуваат ризиците – дури и од царините што веќе се во сила.

Според процените на „Блумберг економикс“, давачките што ги плаќаат американските увозници скокнале на просечна стапка од над 13 отсто, што е повеќе од петпати над нивоата од минатата година. Високите царини се доволни да го намалат растот на корпоративната добивка за 5 отсто или повеќе, вели Аластер Пиндер, шеф на стратегии за глобален капитал на „Ејч-ес-би-си“ (HSBC).

Индексот S&P 500 моментално се тргува близу до највисоките процени во пост-ковид ерата – што предизвикува загриженост дека секое разочарување во профитите или економските податоци до крајот на годината може да го наруши тековниот раст.

Bloomberg Mercury

„Бидејќи се вреднувани за совршенство, секое разочарување – дури и мало отстапување надолу – може да предизвика ревалуација на акциите“, вели Пол Нолт, пазарен стратег и советник за богатство во „Марфи и Силвест Велт Менаџмент“ (Murphy & Sylvest Wealth Management) во Далас. „Има еден балон што шета низ Волстрит и бара игла – и никој не знае што точно ќе го пробие. Можеби тоа се токму царините.“

Колкава штета може да направи таа „игла“? Според Нолт, пазарот е ранлив за вистински мечкин тренд – пад од 20 отсто или повеќе.

Подготовка за турбуленции

Дури и некои од најгласните оптимисти на Волстрит се подготвуваат за нестабилност, бидејќи царините почнуваат да влијаат врз заработката на компаниите. Меѓу нив е и Мајк Вилсон од „Морган Стенли“, кој од истакнат „медвед“ премина во ентузијастички „бик“ по падот на пазарот претходно годинава.

Иако останува оптимист за 12-месечниот период и не очекува вистински пазарен крах, тој признава дека краткорочните прогнози на компаниите може да бидат послаби од очекуваното и да предизвикаат потреси.

„Постои ризик во третиот квартал – ќе има пренос на трошоци, а маржите малку ќе се намалат – што може да доведе до корекција од 5 до 10 проценти“, вели тој.

Иако сезоната на квартални извештаи е сè уште во рана фаза, веќе се појавуваат бројни примери дека постоечките царини сериозно влијаат. Компаниите се соочуваат со повеќе наметнати давачки, вклучувајќи 10 отсто на стоки од повеќето земји и дополнителни 20 отсто на кинески производи – царини кои Трамп ги поврзува со борбата против фентанилот.

Bloomberg Mercury

Нови економски сигнали пред Волстрит

Оваа недела Волстрит ќе добие нови бројки кога неколку големи компании, изложени на царини и економски ризици, ќе ги објават резултатите. „Џенерал моторс“ е погодена од давачките во авто-индустријата, додека извештајот на „Капитал Ван“ (Capital One Financial Corp.) може да даде увид во силата на американскиот потрошувач.

На пошироко економско ниво, постојат индикации дека царините веќе се појавуваат во економските извештаи. Податоците за инфлација објавени во вторникот покажаа дека основната потрошувачка во јуни се забрзала, а категории чувствителни на царини – како мебел и облека – укажуваат дека компаниите почнуваат да ги префрлаат повисоките трошоци врз потрошувачите.

Според Пиндер од „Ејч-ес-би-си“, предупредувањата ќе станат уште погласни подоцна во годината: тој очекува слабеење на малопродажбата и нов бран на поскапувања откако компаниите ќе ги потрошат резервите набавени со пониски тарифи.

Побавен раст

Според процените на „Блумберг економикс“, актуелните царински стапки ќе ја направат американската економија за околу 1,6 отсто помала во следните две до три години, во споредба со сценарио без царини. Потрошувачките цени, пак, ќе бидат повисоки за 0,9 отсто, велат економистите.

Секое понатамошно зголемување — или дури и упорност — на инфлацијата би можело да ги урне надежите на инвеститорите за намалување на каматните стапки годинава, без оглед на тоа колку навреди Трамп ќе упати кон претседателот на Федералните резерви, Џером Пауел.

Се разбира, не се сите „бикови“ исплашени. Мнозина на Волстрит гледаат причини зошто акциите може да останат на високи нивоа. Според стратезите на „Голдман“ (Goldman Sachs), намалувањето на каматните стапки, ниската невработеност и високата корпоративна профитабилност ги оправдуваат рекордните процени.

Дополнително, тука е и даночниот и буџетски закон што Трамп го потпиша овој месец, со кој трајно се воведуваат неколку даночни одбитоци за компаниите. Според Мајк Вилсон од „Морган Стенли“, самиот закон вреди од 5 до 7 отсто раст на добивките на S&P 500.

„Инвеститорите влегоа во годинава со очекување дека администрацијата на Трамп ќе воведе повеќе мерки на штедење“, изјави Нејтан Соненберг, главен инвестициски директор на семејната фирма „Питкаирн“ (Pitcairn). „Со усвојувањето на овој буџет, сфативме дека ефектот ќе биде повеќе стимулативен“, додаде тој.

Сепак, непредвидливата природа на американскиот претседател значи дека секој обид за процена на финансиското и економското влијание од неговите царински политики треба да се прави со молив, а не со пенкало. Иако Трамп повлече некои од своите најагресивни закани за царини, сè уште постои ризик од значително зголемување на вкупните стапки до неговиот најнов рок — 1 август.

Индонезија ќе се соочи со основна царинска стапка од 19 отсто, дури и по постигнувањето трговски договор со САД. Трамп најави дека стоките од Виетнам ќе се соочат со стапка од 20 отсто, иако, според „Блумберг“, тие разговори сè уште се во тек.

„Погрешно е да се игнорираат овие царини и да се продолжи понатаму“, рече главниот стратег на УБС (UBS), Бану Бавеџа, во понеделникот за ТВ Блумберг. „Кога ќе се појави влијанието врз инфлацијата и ќе го удри реалниот расположлив доход, тогаш мислам дека пазарите ќе го почувствуваат тоа.“