Акциите и нафтата живнаа, доларот со мал пад

Акциите конечно забележаа раст по стагнирањето со тргување предизвикано од намерата на американските Федерални резерви (ФЕД) да се насочат кон порестриктивна монетарна политика за да се изборат со инфлацијата. Во Европа добивката ја предводеа технолошките компании, додека енергетските паднаа.

Француската инфлација се намали за повеќе отколку што се очекуваше, со што малку се ублажи притисокот врз Европската централна банка (ЕЦБ) за поагресивни мерки против растот на цените.

Американските фјучерси пораснаа, откако претходно акциите на Вол Стрит паднаа на најниско месечно ниво. Зголемената побарувачка за работна сила и податоците за довербата на потрошувачите во САД придонесуваат за остро зголемување на каматните стапки во борбата против инфлацијата. Банкарите од ФЕД ја повторија својата одлучност да го зауздаат растот на цените но, тоа ги зголемува стравовите од соочување со рецесија.

 

 

Доларот и приносите од трезорските обврзници паднаа за нијанса.

„Живееме во свет каде што спротивставените економски сигнали го прават патот на монетарната политика многу тежок за одредување“, изјави за Блумберг ТВ Анџелина Њуман, извршен директор во UBS Global Wealth Management.

Нафтата порасна, но и натаму се движи во насока да достигне месечен пад трет пат по ред, што би било најдолга загуба во повеќе од две години. Причина за тоа е забавувањето на економскиот раст на глобално ниво. Европскиот природен гас напредуваше по дводневниот пад, а трговците ги премеруваат ризиците од руската испорака и силните напори на континентот да се справи со енергетската криза. 

Златото, пак, регистрираше мала загуба од вредноста и се тргуваше за 1.721,82 долари за унца, што претставува пад од 0,1 процент.

Берзите во Азија разиграни

Активностите со краткорочни тргувања на берзата во Хонгконг ги вивна акциите историски највисоко, создавајќи потенцијал за голем скок на нивните цени доколку инвеститорите продолжат да „брзаат“. Прометот со „мечкини“ облози, како дел од вкупната берза во Хонг Конг порасна на рекордни 23 проценти, според пресметките на Блумберг базирани врз берзанските податоци. Меѓу најтргуваните беа акциите на компаниите од технолошкиот сектор, на чело со Tencent Holdings Ltd., со раст од 31 отсто, додека тие на Meituan пораснаа за 28 отсто.

Но, расположението го намалува несигурноста што долго се провлекува поради американско-кинеските преговори за да се избегне бришење на компании од берзата во Њујорк. Тоа ја неутрализираше оптимистичката заработка од технолошките гиганти. Индексот Ханг Сенг е намален за 16 проценти оваа година и се вбројува меѓу пазарите со најлоши перформанси во Азија, иако тој минатата недела скокна за 3,6 отсто, што е најмногу во последните четири месеци.

Зголемувањето на мечкините облози доаѓа во услови на летно затишје за акциите во Хонгконг, бидејќи нестабилноста се продлабочува и обемот на тргување останува под годишниот просек.

„Во одреден момент ова ниво станува многу засрамувачко за Хонгконг“, напиша Брендан Ахерн, главен инвестициски директор во Krane Funds Advisors LLC.

Стратезите на Морган Стенли, вклучително и Гилберт Вонг, минатата недела предупредија за ризикот од кратко стегање бидејќи хеџ-фондовите и другите препродавачи на краткорочни акции ги зголемуваат своите мечкини тргувања. 

Од друга страна, јапонските берзи се повлекуваат. BYD Co. падна откако компанијата на Ворен Бафет, Berkshire Hathaway Inc., го намали својот удел во производството на електрични возила.

Инвеститорите уште ги оценуваат најновите кинески податоци, кои покажаа дека индустриската активност се намалила веќе втор месец по ред. За тоа придонесува недостигот на електрична енергија поради што цели фабрики времено беа затворени, потоа кризата во секторот со недвижнини бидејќи Кинезите бојкотираат со неплаќање на станбените кредити, како и појавата на Ковид, што ги натера кинеските власти повторно да воведат рестрикции во работата на фирмите и ограничувања на движењето на луѓето во некои региони.
 

Во моментов нема коментари за веста. Биди прв да коментира...

Остави коментар