Регулаторите на Волстрит бараат поголема моќ за контрола на биткоинот

Највисоките американски финансиски регулатори сакаат Конгресот да им даде нови овластувања директно да го надгледуваат тргувањето со биткоин, највредната криптовалута во светот.

Во извештај од понеделникот, шефовите на Федералните резерви (ФЕД), Министерството за финансии и другите водечки финансиски институции велат дека владата има ограничена способност да ги регулира крипто-средствата кои не се опфатени со законите за хартии од вредност. Иако многу токени се регулирани од Комисијата за хартии од вредност (Securities and Exchange Commission – SEC), некои, како биткоинот, не се директно под јурисдикција на која било федерална агенција.

„Како резултат на тоа, овие пазари можеби немаат цврсти правила и прописи дизајнирани за да обезбедат уредно и транспарентно тргување, да спречат конфликт на интереси и манипулации и да ги заштитат инвеститорите и пошироката економија“, посочува Советот за надзор на финансиската стабилност (Financial Stability Oversight Council – FSOC). Тимот на FSOC ги вклучува, меѓу другото, претседателот на SEC и шефот на Комисијата за тргување со фјучерси на суровини (CFTC), која се бори за поголема јурисдикција во областа на крипто регулацијата.

Ова е најновиот извештај на администрацијата на Бајден, кој повикува на покоординиран пристап кон регулирањето на дигиталните средства по долгогодишен делумен надзор. SEC полага право на средства што се сметаат за хартии од вредност, CFTC ги надгледува крипто дериватите, банкарските регулатори исто така имаат свои овластувања.

Конгресот, исто така, треба да им даде нови овластувања на регулаторите да одлучуваат за низа теми, вклучувајќи судир на интереси, злоупотреба на трговски практики, барања за чување на податоци, рездвојување на средствата на клиентите и сајбер безбедност, се вели во извештајот од 100 страници на FSOC објавен во понеделникот. Законодавството, исто така, треба да им даде на агенциите повеќе овластувања за спроведување и истрага, велат регулаторите.

„Иновациите без соодветна регулатива може да доведат до значително нарушување и оштетување на финансискиот систем“, посочи министерката за финансии Џенет Јелен за време на виртуелен состанок.

Во Конгресот постојат повеќе закони кои би му дале на CFTC овластување да го надгледува биткоинот и другите токени, но извештајот на FSOC не сигнализира поддршка за некое конкретно законодавство. Поддршка за предложените мерки даваат многу учесници во индустријата кои не сакаат да бидат регулирани од SEC, бидејќи тоа тело има построги барања во областа на заштитата на инвеститорите.

FSOC исто така препорачува:

- Агенциите да го проценуваат влијанието на плановите за овозможување на купувачите на мало директен пристап до пазарите на дигитални средства. CFTC тековно го разгледува предлогот на американската компанија за тргување со криптовалути FTX со кој би се отстраниле посредниците од тргувањето со биткоин и етер фјучерси.

- Конгресот да создаде регулаторна рамка за издавачите на т.н. стабилни крипто токени, кои се користат за пренос на вредноста од и во традиционални пари.

- Законодавците да им дадат моќ на регулаторите да ги разгледаат активностите на филијалите и подружниците на крипто-фирмите.

- Конгресот да им обезбеди на агенциите финансирање што им е потребно за регулирање на крипто-активноста.

- Законодавците да им дадат овластување на Федералната агенција за станбено финансирање (FHFA) и на Националната управа за кредитна унија (NCUA) да преземат мерки против фирмите кои обезбедуваат крипто-услуги на банките.