Кина, најголемиот билатерален кредитор на земјите во развој, треба да покаже дека може да работи во рамките на воспоставените меѓународни процеси за олеснување на долгот за сиромашните нации што се борат со отплатата, рече шефицата на Меѓународниот монетарен фонд (ММФ).
„Кина многу бавно препозна дека мултилатералното реструктурирање на долговите бара од нив да играат според правилата што се веќе воспоставени. Сега е време Кина да покаже дека е способна да игра според овие правила“, рече извршната директорка Кристалина Георгиева во денешното интервју за телевизијата „Блумберг“.
Парискиот клуб, составен претежно од западните нации, кои се традиционални доверители, кон крајот на 2020 година се придружи кон поновите заемодавци Кина, Индија и Саудиска Арабија, за да се договорат за патоказот наречен „Заедничка рамка за реструктурирање на долгот на сиромашните земји“. Но процесот беше отежнат од одолжувања, а Пекинг немаше желба да дава олеснувања.
Минатиот месец Георгиева беше во Кина, каде што рече дека на светот итно му се потребни побрзи и поефикасни процеси за реструктурирање на долговите на ранливите земји. Иако таа рече дека ангажманот на Кина во „Заедничката рамка за реорганизација на долговите“ и тркалезната маса за глобалниот државен долг се „силно добредојдени“, сепак голем број западни земји, вклучувајќи ги и САД, земјата што е најголем акционер на ММФ, го обвинија Пекинг дека одолжува во обезбедувањето помош.
Ова прашање ќе биде истакнато на пролетните состаноци на ММФ и Светската банка, кои ќе се случат следната недела. Кина го спречи напредокот во преговорите за долгот на Замбија, која учествува во „Заедничката рамка“, со својот повик заемите од мултилатералните развојни банки и домашните кредитори да бидат вклучени во реструктурирањето на земјата. САД и другите земји го отфрлија таквиот предлог.
„Сега инициравме реструктурирање на долгот за Замбија, а од кинескиот премиер добив уверување дека Кина ќе ја одигра својата улога“, рече Георгиева.
.webp){kind=icon}
