Нови за стари долгови: Македонија годинава ќе позајми 623 милиони евра

Оваа, 2024-та е година во која се очекува пад на каматните стапки, процес што следува по забавувањето на стапката на инфлација. И додека каматната политика ќе ја диктира цената на секој позајмен денар, ние анализираме какви се нашите планови за годинава. Колку треба да раздолжиме по основ на стари долгови, од каде ќе позајмуваме? Според буџетот за годинава, планирано е нето-задолжување на домашниот пазар во висина од 272 милиони евра и 351 милион евра во нето-износ што ќе се позајмат од странство.

Како до вкупно 623 милиони евра

Во согласност со планираното, на домашниот пазар државата ќе се задолжи преку државни хартии од вредност или домашен заем.

„Со задолжување на домашниот пазар ќе се обезбеди финансирање под поволни услови, користејќи ги поповолните каматни стапки. Едновремено, со цел оптимизација на портфолиото на државните хартии од вредност, a во насока на намалување на ризикот за рефинансирање, основна заложба на Министерството за финансии ќе биде и зголемување на рочноста на портфолиото на државните хартии од вредност“, се наведува во буџетот.

Задолжувањето во странство државата планира да го реализира со издавање должнички хартии од вредност на меѓународниот пазар на капитал, преку повлекување заем од Европската Унија за макрофинансиска поддршка, заем од Банката за развој при Советот на Европа и преку повлекување средства од поволни кредити од странски финансиски институции и кредитни линии наменети за финансирање одделни проекти и буџетски дефицит.

„Изборот на извор за финансирање ќе се темели на поволните тековни состојби на меѓународните пазари на капитал. Со цел да се управува прудентно со јавните финансии, Министерството за финансии ќе ја разгледа можноста за активно управување со должничкото портфолио преку операции на предвремен откуп на долг и употреба на финансиски директиви за минимизирање на ризичниот профил на должничкото портфолио“,  се наведува во буџетот за 2024 година.

За што ќе се потрошат позајмените пари

Годинава државата треба да ги исплати обврските кон странските кредитори, како и да го отплати домашниот долг од 302 милиони евра.

Отплатата по основ на домашен долг се однесува на отплати на тригодишни, петгодишни и десетгодишни државни обврзници, во износ од 18,2 милијарди денари (295 милиони евра), и отплата на обврзници за денационализација во износ од 0,4 милијарди денари (6,5 милиони евра). Преостанатите долгорочни обврзници, кои се со рочност од две, 15 и 30 години, не достасуваат во 2024 година.