Цената на гасот расте поради ризик во снабдувањето по ескалацијата во Украина

Цените на природниот гас во Европа пораснаа бидејќи повторно се појави загриженоста за испораките откако Москва ги засили воените дејства во Украина.

Фјучерсите пораснаа за дури 6,4 проценти, анулирајќи ги претходните падови. Русија започна со нови напади откако претходно погоди повеќе цивилни делови ширум Украина. Киев најави дека ќе го прекине извозот на електрична енергија во некои соседни држави поради нападите, што внесе нервоза на пазарот поради ризикот за инфраструктурата што го пренесува рускиот гас во Европа.

Се очекува дека токовите во текот на денов ќе бидат стабилни, иако се на намалено ниво во последните неколку месеци. Од испораките низ Украина последни останаа руските испораки за Западна Европа откако главните гасоводи, вклучувајќи го Северен тек, се затворени поради војната. Се' помалите испораки ја доведоа економијата на работ на рецесија и ги натераа владите да побрзаат со активностите и мерките за заштита на потрошувачите.

Меѓутоа, пазарот пронајде мало олеснување благодарение на залихите, што исполнија 91 отсто од капацитетите на складиштата. Таа количина претставува задоволителна резерва за ладните месеци и буди надеж дека регионот може да ја преброди зимата дури и ако Русија дополнително ги намали испораките. Топлото време, исто така, придонесе за намалување на побарувачката.

„Додека се чека зимската сезона, неколку ризици остануваат активни“, рече Енди Сомер, раководител на тимот за фундаментални анализи и моделирање во „Axpo Solutions AG“. „Евентуалното ладно време може целосно да го преврти падот на побарувачката за електрична енергија во домаќинствата и брзо да ги потроши резервите на гас, особено во земјите зависни од тој енергенс, како Велика Британија и Италија“, додава Сомер.

Bloomberg

Цената на холандскиот гас утрово порасна за 4,7 проценти, на 161,41 еври за мегават час, откако претходно падна за 12 проценти во последните две сесии на тргување. Еквивалентните договори во Обединетото Кралство, пак, пораснаа за 5,9 отсто.

Европскиот енергетски пазар и натаму е во тесно поради ниското ниво на хидроенергетските резервоари во Норвешка и намаленото производство на француската нуклеарна флота, која што е во проблеми. Со оглед на тоа што на видик нема зголемување на токовите со руски гас, континентот ќе мора уште повеќе да се потпре на собраните резерви на природен гас.

Таквата состојба ги принудува државите да преземат чекори за да ги заштитат своите економии. Германија подготвува низа мерки за помош на потрошувачите, кои што може да вклучат и субвенции за потрошувачката на гас во домаќинствата и компаниите. И челниците на Европската Унија во текот на овој месец ќе расправаат за идните мерки.