Брод со течен природен гас (ЛНГ) го остави египетскиот извозен терминал или празен или само делумно натоварен, што предизвикува загриженост дека војната меѓу Израел и Хамас може да го наруши снабдувањето на глобалниот пазар.
„Сипик Каталунија“ (Seapeak Catalunya) се упати кон Алжир, друга земја извозник на природен гас, откако помина два дена во постројката Идку во Египет, според податоците за следење на бродот собрани од „Блумберг“. Тоа сугерира дека бродот или не натоварил или презел само ограничени количества.
Извозот на гас од Египет се следи додека беснее војна во близината. Протокот на гас од Израел до Египет беше намален по затворањето на наоѓалиштето Тамар на 9 октомври. Недостигот и какви било понатамошни нарушувања може да влијаат на способноста на Египет да ја задоволи домашната побарувачка и да го зголеми извозот на природен гас по летното исклучување.
Bloomberg
„Иако Израел има вишок производство на гас, што во моментов ја поддржува растечката побарувачка од Египет и Јордан, продолжувањето или ескалацијата на конфликтот би имало широк спектар последици“, се наведува во белешката на „Ристад“ (Ristad Energi AS). Војната „претставува сериозна закана за регионалниот пазар на природен гас и може да има последици за снабдувањето на Европа со течен природен гас како што се приближува зимата“.
Египет извезол само два товара природен гас овој месец, еден во Белгија, а друг во Италија, покажуваат податоците за следење на бродовите. Земјата исполни околу четири отсто од европската побарувачка на природен гас во 2022 година и приближно два отсто досега годинава.
„Влијанието на моменталната ситуација врз домашниот, регионалниот и меѓународниот енергетски биланс на крајот ќе зависи од времетраењето“, велат истражувачите од истражувачкиот центар „Бригел“. Во многу тесниот глобален пазар на гас, можноста за губење на релативно малите испораки во Египет на почетокот на зимата изврши притисок врз цените на гасот во Европа и Азија.
Референтните европски фјучерси на гас се тргуваа за 2,3 отсто повисоко до 9.51 часот во Амстердам.
Се очекува дека „Сипик Каталунија“ в петок ќе биде натоварен во Алжир, според податоците за следење на бродот.
„Бригел“ истакна дека секоја понатамошна ескалација на конфликтот во регионот може дополнително да ги наруши израелските гасни проекти. Поширока војна, особено онаа во која е вклучен Иран, исто така може да претставува безбедносен ризик за танкерите со гас натоварени во Катар што минуваат низ Ормускиот Теснец.
.webp){kind=icon}
