Целта на Клара Цеткин и на Роза Луксембург била жените да добијат право на глас, да им се подобри положбата во општеството и да имаат еднакви плати со мажите. Повеќе од 100 години подоцна и натаму зборуваме за родова рамноправност, а според процените на експертите таа може да биде постигната по 130 години. Толку за празникот, честит нека е.
Во продолжение за работите што побрзо се менуваат, а ја обележаа неделава. Извозот бележи силен пад од почетокот на годината, а тој треба да биде носител на економскиот раст. Инфлацијата забавува и во еврозоната и во земјава, но Европската централна банка и натаму е на пауза, намалувањето на каматите е одложено уште еднаш.
Битката со инфлацијата влегува во третата година, време во кое сите ги сменивме навиките. Научивме да јадеме помалку, и не само поради штедењето туку и поради тоа што е дебелината е сериозна закана за здравјето.
Добрата вест е дека платите ќе продолжат да растат, а според нашите аналитичари тоа значи дека примањата во земјава, полека но сигурно, ќе се доближат до словенечките. Во трката за работници јасно е дека и условите за работа ќе се подобруваат во наредниот период, особено што регионот го отвори пазарот на трудот.
Регионот набрзо би требало да се отвори и за инстант плаќања. Земјите пред да пристапат кон СЕПА имаат можност, со помош на Светската банка, да постават систем со кој плаќањата во друга земја ќе станат брзи, едноставни и поевтини.
Во период на објавување на финансиските извештаи за лани, значителен раст бележи прометот на Македонската берза, глобално рекорден раст бележат биткоинот и златото.
Неделава не беше добра за „Епл“. Европската Унија ѝ изрече на компанијата казна од 1,8 милијарди евра, а ѝ пропадна и проектот за создавање подобро возило од „Тесла“.
Ни на Илон Маск не му одеше којзнае колку добро деновиве. Прво се скара со „Опен еј-ај“, па падна од лидерската позиција на листата на милијардери на „Блумберг“ и конечно се сретна со Доналд Трамп, а на средбата се зборувало и за донации за неговата претседателска кампања.
На Трамп, пак, неделава му беше добра. Ники Хејли се повлече и му го отвори патот до нови избори и реванш со Џо Бајден.
Пред почеток на викендот ви нудиме преглед на дестинациите што можете да ги посетите во земјава, а во пресрет на летото, и осум причини зошто годинава треба да одите на езеро.
.webp){kind=icon}
