Неминовно е дека очите на светската јавност деновиве се вперени во Давос, односно во Светскиот економски форум (СЕФ), кој веќе започна и ќе трае до 24 јануари. А, што значи тоа за локалните жители и бизниси? Се проценува дека само една недела генерира просечен промет од околу 100 милиони евра за ова одморалиште на швајцарските Алпи. За организаторите, пак, форумот само минатата година донесе 440 милиони евра приход.
А оттаму, светската бизнис-елита веќе прати одредени пораки. Некои од нив се однесуваат на растечките сајбер-закани, чиј главен двигател се геополитичките тензии. Сајбер-криминалците сè повеќе користат вештачка интелигенција и напредни технологии, а недостигот од обучени експерти за сајбер-безбедноста претставува голем предизвик.
Во Давос се води клучната битка за лидерството на Германија
Трката за иден лидер на Германија моментално се води во Давос, Швајцарија, каде што социјалдемократскиот канцелар Олаф Шолц и неговиот ривал, водечкиот демохристијански кандидат Фридрих Мерц, ги презентираат своите визии за тоа како да заживее најголемата европска економија.
И двајцата се обидуваат да ја придобијат глобалната бизнис-елита собрана на Светскиот економски форум, а битката на идеи што се одвива таму е една од најважните, не само за Германија, која оди на нови избори на 23 февруари, туку и за целиот регион.
МБИ10 со раст од 8,3 проценти на стартот од 2025 година. Ќе гледаме ли реприза на ланските рекорди?
Македонската берза урна неколку рекорди минатата, 2024 година, а ако по утрото денот се познава, тогаш и во 2025 година инвеститорите може да очекуваат добри приноси.
МБИ10 лани беше меѓу тие што најмногу пораснаа на светско ниво, а во регионот Адрија убедливо беше на врвот, со раст од точно 66,7 проценти. Вкупниот промет на домашната берза беше повисок за дури 190,2 проценти во 2024 година, бројот на трансакциите за речиси 100 проценти, а пазарната капитализација на берзата порасна за 51,8 проценти.
А, како почна годинава за македонскиот индекс? Доста ветувачки, мора да признаеме. Во првите три недели од јануари, МБИ10 додаде уште 8,33 проценти и вредноста на крајот од вчерашното тргување изнесуваше 11.050, 29 поени.
Можно зголемување на одредени надоместоци кај македонските банки
Банките имаа исклучително успешна 2024 година во деловното работење - добри профити, висока ликвидност и солвентност, ниски кредитни ризици и зголемени каматни диференцијали поради високите каматни стапки. Овие состојби се одразија и на цените на акциите, па, така, банкарскиот сектор беше еден од лидерите на пазарот на капитал во Европа.
Анализирајќи го банкарскиот сектор во регионот, аналитичарите на „Блумберг Адрија“ сметаат дека има простор за зголемување на конкретни надоместоци и провизии, особено во Македонија и во Србија, каде што цените на финансиските услуги за корисниците имаа најбавна динамика, гледано во однос на индексите на потрошувачките цени.
Уриваме рекорди: Во банките чуваме речиси 10 милијарди евра
Вкупните депозити во македонските банки во декември достигнаа 600,3 милијарди денари (околу 9,7 милијарди евра) и раст на годишно ниво од 12,4 проценти, покажуваат новите податоци на Народната банка. Оттаму објаснуваат дека растот во поголем дел се должи на зголемувањето на депозитите на „домаќинствата“, при раст и на депозитите на корпоративниот сектор. Од друга страна, состојбата на вкупните кредити во последниот месец од минатата година изнесува 494,4 милијарди денари (околу осум милијарди евра), што е годишно зголемување од 11,2 проценти.
Просечната плата во ноември била 42.000 денари, реално пораснала за пет отсто
Просечната исплатена нето-плата во ноември минатата година изнесувала 41.999 денари, пресмета Државниот завод за статистика. Според податоците, просечната нето-плата во ноември е за 9,5 отсто повисока на годишно ниво, иако реално е зголемена за пет отсто. Во однос на претходниот месец, просечната исплатена плата е намалена за 0,3 отсто.
Највисока плата земаат програмерите, 96.576 денари, а далеку под нив се другите најплатени професии. Сепак, поголемиот дел дејности имаат потпросечна плата, а најмалку се платени тие што се занимаваат со заштитни и истражни дејности, чија плата е 22.291 денар.
.webp){kind=icon}
