Пазарот на обврзници го мрази „прекрасниот“ закон на Трамп за даноците

Претседателот Доналд Трамп постигна договор со републиканците од „сините држави“ (американски сојузни држави каде што предоминантно се гласа за демократите, н.з.) за даноците и во последен момент ѝ стави крај на 11-часовната побуна од страна на конзервативците околу трошењето, за да го протурка својот „голем, прекрасен закон“ во Претставничкиот дом.

Но ако сака овој најзначаен законодавен пакет од својот втор мандат да помине и во Сенатот, можеби ќе треба да се соочи со уште попребирлива гласачка публика: купувачите на сè поголемиот американски долг.

Во средата приносот на 30-годишните државни обврзници повторно ја надмина границата од 5 отсто, при што кредиторите на нацијата инјектираа доза сурова економска реалност во фискалната политика на Трамп - и тоа не за првпат. Минатата недела трета рејтинг-агенција ја намали кредитната оцена на САД, проектирајќи дека долгот ќе се искачи на 134 отсто од БДП во следните десет години, од околу 100 отсто денес.

Тоа е далеку од визијата што Трамп ја претстави во својот говор пред Конгресот во март, кога вети избалансиран буџет „во блиска иднина“. Законот што помина во Претставничкиот дом содржи голем број даночни олеснувања за клучни групи на гласачи - работници што работат од час и оние што примаат бакшиш, купувачи на автомобили и пензионери. Од изјавите на сенаторите од Републиканската партија се гледа дека тие ќе се обидат да ги намалат предложените кратења на трошењето за да ги заштитат другите од финансиски товар.

Соработниците на Трамп, вклучувајќи го и секретарот за финансии Скот Бесент, тврдат дека пакетот ќе ја поттикне бизнис-климата и ќе ослободи потрошувачка и инвестиции. Соработниците на Трамп во Конгресот го гледаат како столб на законодавната агенда на партијата и како противтежа на неизвесноста предизвикана од нестабилната трговска политика на Трамп.

Но учесниците на пазарот на обврзници гледаат нешто друго.

„Луѓето веќе се заситени. Јасно е дека во Вашингтон како да нема возрасни во просторијата. Нула. Без одговорност“, рече Џон Фат, партнер-менаџер во „БТГ Пекчуал асет менаџмент“ (BTG Pactual Asset Management). „Треба да се прашаме што ќе биде потребно. Ќе биде потребна акција со цените“.

А таа акција веќе е забележлива. Додека Трамп вршеше притисок врз пратениците да го поддржат даночниот закон, Министерството за финансии во средата одржа аукција на 20-годишни обврзници, но побарувачката беше слаба. Не само обврзниците туку и акциите паднаа поради зголемената загриженост за фискалната состојба на САД.

Овие движења потсетуваат на судирот на Трамп со пазарот на обврзници минатиот месец, кога тој попушти. Во раните утрински часови на 9 април приносите нагло скокнаа откако стапија во сила рекордно високи царини - највисоки во последниот век. И додека повеќемесечниот пад на берзите не го потресе, реакцијата на пазарот на обврзници му го привлече вниманието.

„Пазарот на обврзници е многу лукав“, рече тој тогаш, објавувајќи дека ги суспендира повеќето царини само неколку часа откако стапија во сила. „Но, да, синоќа видов дека луѓето стануваат нервозни“.

Каматна сметка

Ако обврзниците и понатаму бидат „нервозни“, повисоките приноси не само што ќе го забават економскиот раст - поради повисоки трошоци за заеми, од кредити за домување до автомобили - туку и ќе го забрзаат фискалното влошување. Како што растат каматите така расте и каматната сметка на Министерството за финансии.

„Инвеститорите сега си го поставуваат следново прашање: дали би ѝ позајмиле пари на американската влада со камата од 5 отсто на 30 години?“, рече Џорџ Катрамбоун, шеф за фиксни приходи и тргување во „ДВС Америкас“ (DWS Americas). „Тоа е прашањето со кое сега се соочува пазарот на долгорочни обврзници“.

За разлика од април, овој пат Трамп го немаше Бесент покрај себе - кој во моментот се среќаваше со инвеститори во Саудиска Арабија и со министрите за финансии на земјите од Г7 во Канада - додека преговараше за законот во Белата куќа. Бесент, поранешен хеџфонд-менаџер, минатиот месец помогна да се убеди Трамп да ги паузира царините кога пазарите на обврзници испратија предупредувачки сигнали.

Тогаш Бесент го опиша падот на обврзниците како резултат на разградување позиции од страна на одредени учесници на пазарот. До четвртокот наутро, додека беше во Банф, Канада, сè уште немаше коментирано за најновата пазарна нестабилност.

Во петокот, откако „Мудис“ (Moody’s) ги симнаа САД од категоријата со највисок рејтинг Aaa, вниманието повторно се насочи кон буџетскиот дефицит - кој во последните две години надминува 6 отсто од БДП, што е преседан во модерно време надвор од време на рецесија или војна. „Ес енд Пи глобал рејтингс“ (S&P Global Ratings) го направи тоа во 2011 година, а „Фич рејтингс“ (Fitch Ratings) во 2023 година.

„Мудис“ соопшти дека економските предности на САД „веќе не можат целосно да ја надоместат деградацијата на фискалните индикатори“.

Дури и пред најновиот даночен закон - за кој економистите предвидуваат дека ќе го зголеми дефицитот - непартиската Канцеларија за буџет го проектираше американскиот долг како процент од БДП да достигне рекордно ниво до 2029 година.

 

 

„Не знам уште колку аларми ни се потребни за да се средиме“, рече пратеникот Ралф Норман од Јужна Каролина за „Блумберг“. „Сè што бараме е секој трошок да биде покриен“.

Еден од тие трошоци е зголемувањето на лимитот за даночни одбитоци за државни и локални даноци. Поставен на 10.000 долари во даночниот закон на Трамп од 2017 година, републиканците од високооданочени држави како Њујорк и Калифорнија преговараа за зголемување на 40.000 долари во замена за нивната поддршка за пакетот.

Но, зголемувањето од 12 базични поени на приносите од 30-годишните обврзници во средата изгледа дека беше мотивот за дополнителни кратења на трошењето, за да се направи законот прифатлив за тврдокорните републиканци.

„Изгледа дека пазарот на обврзници проговори“, рече пратеникот Ворен Дејвидсон од Охајо, еден од двајцата републиканци што гласаа „против“.

Надежите на републиканците се во законот за даноци

Додека пазарите на обврзници покажуваат знаци на немир неделава, Трамп ги удвои напорите за усвојување на законот - формално именуван како Еден голем прекрасен закон - во Претставничкиот дом. Тој го посети Конгресот, им се јавуваше на пратеници и ги канеше колебливите на состаноци во Белата куќа.

Со оглед на претстојниот викенд за Денот на сеќавањето, републиканците чувствуваа итност да постигнат законодавна победа во едно претседателство карактеристично по лавина од извршни наредби.

„Законот треба да се донесе што е можно поскоро, и затоа што Американците ги заслужуваат парите во својот џеб и промените во нивните животи, и затоа што мора да стапи во сила навреме за да има најголем ефект“, рече поранешниот спикер на Претставничкиот дом Њут Гингрич, близок сојузник на Трамп. „Ако во 2026 година има бум на економијата под Трамп, ќе го задржиме Домот“.

Ако републиканците не го усвојат даночниот пакет, исто како што царините ја забавуваат економијата, тогаш гласачите може да се свртат против нив на изборите.

„Во 2026 година единственото прашање што ќе биде важно е: Дали функционира?“, додаде Гингрич.

Но нема гаранција дека нестабилниот мир меѓу различните фракции во партијата ќе опстане кога законот ќе стигне до Сенатот.

Лидерот на мнозинството во Сенатот, Џон Тун - кој ќе го води процесот таму од јуни - рече дека намалувањата на кредитниот рејтинг се „предупредувачки сигнал дека мораме сериозно да се зафатиме со ограничување на трошењето“. Тој додаде дека секој финален закон ќе мора и значително да ги намали трошоците и да го поттикне побрзиот економски раст.

-Со помош на Стивен Т. Денис

Во моментов нема коментари за веста. Биди прв да коментира...

Остави коментар