Трамп вели дека Венецуела ќе испрати нафта вредна 2,8 милијарди долари во САД

Претседателот Доналд Трамп изјави дека Венецуела ќе предаде дури 50 милиони барели нафта на САД, во вредност од околу 2,8 милијарди долари по моменталната пазарна цена, најавувајќи дека нафтата ќе биде продадена, а приходите ќе им користат на двете земји.

Објавата доцна во вторникот, која дојде со малку детали, означи значаен чекор напред за американската влада, додека таа се обидува да го прошири своето економско влијание во Венецуела и пошироко по апсењето на лидерот Николас Мадуро за време на викендот. Тоа е исто така удар за Кина, претходно најголемиот купувач на нафтата на Венецуела и нејзин близок партнер.

„Со задоволство објавувам дека привремените власти во Венецуела ќе предадат помеѓу 30 и 50 МИЛИОНИ барели висококвалитетна, санкционирана нафта на Соединетите Американски Држави“, напиша Трамп во објава на социјалните мрежи.

„Оваа нафта ќе се продава по нејзината пазарна цена, а тие пари ќе ги контролирам јас, како претседател на Соединетите Американски Држави, за да се осигурам дека ќе се користат во корист на народот на Венецуела и Соединетите Американски Држави!“, додаде тој.

Количините што ги наведе Трамп би претставувале околу 30 до 50 дена од производството на венецуелска нафта пред делумната блокада на земјата од страна на САД – што е многу помалку од историските нивоа. Вест тексас интермидиет (WTI), американскиот референтен ценовен показател за нафта, падна за дури 2,4 проценти по коментарите на Трамп и моментално се тргува со цена од близу 56 долари за барел.

Претставниците на Министерството за енергетика на САД и Белата куќа не одговорија на барањата за повеќе детали. Министерствата за информации и нафта на Венецуела, исто така, не одговорија на барањата за коментар.

Венецуела има најголеми докажани резерви на сурова нафта во светот, но нејзиното производство нагло се намали поради децении запоставување и егзодусот на многу странски нафтени компании. Земјата сега учествува со помалку од еден процент од глобалната понуда. Аналитичарите велат дека ќе бидат потребни години и милијарди долари инвестиции за значително да се оживее производството.

„Кинеската влада речиси сигурно се подготвува за сценарио во кое сите нејзини испораки на венецуелска нафта ќе бидат запрени“, рече Кристофер Бедор, заменик-директор за истражување на Кина во „Гавекал Драгономикс“. „Агресивното повторно потврдување на Монроовата доктрина од страна на администрацијата на Трамп ќе има далекусежни импликации за Кина. Веројатно ќе натера да се преиспита зависноста на Кина од увоз на природни ресурси од многу други латиноамерикански земји.“

Трамп не го прецизираше точното потекло на нафтата. Венецуела има застој од неиспратена сурова нафта што се натрупува во резервоари за складирање и на договорни бродови откако започна блокадата на САД минатиот месец. „Петролеус де Венецуела“ (Petroleos de Venezuela SA), државната нафтена компанија, брзо снемува простор додека блокадата се одолговлекува, според поморската разузнавачка фирма „Кплер“ (Kpler).

„Шеврон“(Chevron Corp) во меѓувреме, е последната американска компанија што сè уште произведува и извезува барели од Венецуела коишто се ослободени од санкциите на САД. Компанијата резервирала флота од најмалку 11 бродови да отпловат до пристаништата Хозе и Бахо Гранде, кои се под контрола на владата.

„Дури и по највисоката цена, од 30 до 50 милиони барели звучи политички големо, но економски мало“, рече Харис Куршид, главен инвестициски директор во „Каробар Капитал ЛП“. „Тоа е еднократен тек, а не структурна промена на снабдувањето“.

Трамп во својот пост рече дека санкционираната нафта ќе биде „земена од бродови за складирање и донесена директно до истоварните пристаништа во Соединетите Држави“. Министерот за енергетика Крис Рајт добил задача да го спроведе планот „веднаш“, рече тој.

Венецуелската нафта е особено погодна за рафинерии по должината на брегот на Мексиканскиот залив, од кои многу се изградени за преработка на таква тешка-сурова нафта. Овие фабрики управувани од компании како „Филипс 66“ и „Валеро Енерџи Корп.“ може да имаат корист од овие пратки. Нивните цени на акциите скокнаа во понеделник откако Мадуро беше притворен.

Дел од нафтата може да го најде патот и до комерцијалните резервоари за складирање, потенцијално зајакнувајќи ги залихите кои моментално се близу до петгодишните сезонски минимуми.

Еј-би-си (ABC) во вторникот објави дека администрацијата на Трамп ѝ кажала на привремената лидерка на Венецуела, Делси Родригез, дека нејзината влада мора исклучиво да соработува со САД во производството на нафта и да ги фаворизира САД кога продава тешка сурова нафта.

Белата куќа, исто така, бара Венецуела да ги намали своите економски врски со Кина, Русија, Иран и Куба, објави Еј-би-си, повикувајќи се на три неименувани лица запознаени со ситуацијата. Тоа би претставувало целосно политичко прегрупирање за Венецуела, која во последниве години во голема мера се потпираше на квартетот за економска и безбедносна стабилност.

Пред блокадата на САД и апсењето на Мадуро, Кина беше главниот корисник на силно намалената нафта на јужноамериканската нација. Таа трговија сега во голема мера е запрена, освен за товарите што веќе се во Азија, а Пекинг сега можеби ќе треба да истражи други опции како што се ирачката или канадската сурова нафта.

Напорите на Вашингтон да ја прекине таа животна линија за венецуелската влада траат со недели, а танкерите се цел на американските сили. Тие го гонеа „Бела 1“, празен нафтен брод, во Атлантикот. Русија сега испрати подморница и други поморски средства за да обезбедат придружба за бродот, објави „Волстрит џурнал“.

— Со помош од Лусил Лиу, Џош Вингроув, Роб Вердонк, Крејтон Харисон, Џо Керол, Натан Рисер и Лусија Касаи