Глобалниот пазар за третмани и производи против губење односно раст на косата вредеше 3,4 милијарди долари во 2023 година, а се очекува да достигне 5,6 милијарди долари до 2032 година, со годишен раст од 5,8 проценти, според извештајот на БРИ (Business Research Insights).
Растот на пазарот, главно, го поттикнува зголемениот број на хронични заболувања на скалпот, како што е алопеција ареата. Дополнителен фактор е опаѓањето на косата што се појави како доцна несакана последица од ковид-19.
Според податоците на Националната медицинска библиотека на САД и Меѓународниот журнал за дерматологија, бројот на пациенти во САД што го пријавуваат овој проблем се зголемил за речиси 25 проценти. Како резултат на тоа, расте интересот за производи за превенција од губење на косата, што дополнително го поттикнува растот на пазарот, а благодарение на иновациите во производите се очекува понатамошен раст.
Прочитај повеќе
Што се случува со „кармин индексот“ во време на рецесија?
Продажбата на производи за нега на кожа, козметика и мириси опаѓа во последните пет години
09.08.2024
Кога реалити ѕвезда ќе стане претприемачка и ќе заработи милијарди
Успехот на брендовите за убавина поддржани од познати личности во голема мера е поврзан со бројот на следбеници на социјалните мрежи.
26.01.2024
Иднината на индустријата за убавина изгледа светло со новите технологии
Дали телефонот ни е сè што ни треба за да пробаме нови производи или сепак понекогаш ќе одиме во парфимерија?
30.12.2023
Оваа тема е многу популарна и на социјалните мрежи. На Тикток (TikTok), на пример, има повеќе од 90 милиони видеа само на тема постпородилно губење на косата.
„Бизнис оф фешн“ (Business of Fashion) наведува дека дури 50 проценти од жените во некој период од животот искусуваат губење на косата, било поради стрес, хормонален дисбаланс, стареење, исхрана, генетика или комбинација на овие фактори. Овој податок, кој опфаќа околу 30 милиони жени само во САД, според податоците на „Кливленд клиник“ (Cleveland Clinic) - како што се пренесува во споменатиот текст - укажува дека обезбедувањето решенија за толку голем пазар е и добар бизнис-потег.
Производите за нега на скалпот, како и оние за спречување на проретчувањето и губењето на косата, претставуваат еден од најбрзорастечките сегменти на пазарот за престижни производи за коса. Овој сегмент забележал раст од 34 проценти во 2024 година во споредба со претходната година, според истражувањето на компанијата „Циркана“ (Circana), што укажува дека овој пазар се претвора во сериозен бизнис.
Ова е особено значаен тренд ако се земе предвид дека продажбата на луксузни и козметички производи наменети за масовниот пазар забавува. Во сегментот на престижни производи, продажбата во првите шест месеци од годинава пораснала за осум проценти во САД, според податоците на „Циркана“. Меѓутоа, тоа сè уште претставува забавување во споредба со двоцифрениот раст во претходните две години, што е главно последица на слабеењето на продажбата во сегментот на луксузна шминка.
Depositphotos
На масовниот пазар продажбата остана стабилна во првата половина од годината, особено поради пристапните цени на компаниите како „Елф бјути“ (Elf Beauty Inc.), но и поради успешниот маркетинг насочен кон генерацијата зед.
Покрај големите козметички гиганти што со години истражуваат во оваа област, сè повеќе независни брендови и стартапи се насочуваат кон овој сегмент на пазарот.
На пример, данскиот независен бренд „Харклиникен“ (Hårklinikken) успешно се занимава со обновување на косата веќе 32 години. Меѓу нивните клиенти се наоѓаат познати имиња како Гвинет Палтроу и фризерката за познати личности Крис Еплтон. Оваа пролет компанијата ја ангажира данската супермоделка Хелена Кристенсен како своја прва амбасадорка.
Освен самите препарати, сè повеќе стартапи користат напредни технологии во креирањето козметички уреди (beauty tech), за подобрување на растот и превенцијата од опаѓање на косата.
Германскиот стартап „Ниостем“ (Niostem) користи уникатна технологија за реактивација на матичните клетки за да ги активира заспаните клетки во фоликулите на косата. Со помош на биоелектрична стимулација, овие матични клетки се активираат и почнуваат да се делат, што повторно го поттикнува растот на фоликулите на косата. Уредот, кој сè уште е во фаза на тестирање, покажал раст на косата од 19 проценти кај учесниците што ја користеле технологијата во текот на три месеци, се наведува во соопштението на компанијата.
Од постојните уреди, „Карент боди скин“ (CurrentBody Skin) нуди ЛЕД шлем за раст на косата. Шлемот „карент боди“ со 120 ЛЕД-светилки тврдат дека го стимулира растот на косата и „го забавува губењето на косата на клеточно ниво“. Тој користи ЛЛЛТ (LLLT) ласерска терапија што може да го забрза повторниот раст на косата со зголемување на протокот на крв до фоликулите. Со само десет минути дневно користење, брендот ветува зајакнување и раст на косата за 128 проценти во рок од 12 недели. За „борба против досадата“, уредот вклучува и поддршка за блутут-слушалки. Цената на овој производ е 740 евра.
Малку подостапен уред, кој изгледа како капче, нуди „Хајердоус“ (Higherdose) - 490 фунти. Тој користи ултрацрвено зрачење за да го стимулира протокот на крв до скалпот, што овозможува поголем транспорт на кислород и хранливи материи до фоликулите на косата. Препорачано е да се користи десет минути дневно, а видливи резултати се очекуваат по 16 недели.
Сличен производ е достапен во Србија по цена од 127.000 динари. Исто така, на пазарот се достапни и четки со вградена ласерска технологија за раст на косата. „Соларис“ (Solaris Laboratories) ја нуди својата ЛЕД-четка за коса за околу 70 долари. Компанијата препорачува очекувано време за постигнување на првите видливи резултати во рок од 20 недели.
.webp){kind=icon}
