Зошто чантата „биркин“ може да биде вашата најгламурозна и најпрофитабилна инвестиција?

„Тоа не е чанта, тоа е ’биркин’“ е една од познатите сцени од „Сексот и градот“ како одговор на незадоволството на Саманта Џонс (Ким Катрал) што мораше да чека пет години за својот омилен модел.

Сите, од тикток-сензациите до дамите од високото општество, ја сакаат чантата „биркин“ на „Хермес“ (и на Кели). Најстрасните колекционерки се надеваат дека ќе ја поседуваат секоја форма, големина и боја што може да се замисли. Џејми Чуа, припадничка на сингапурскиот џетсет, има веројатно најголема колекција на чанти „хермес“ во светот - повеќе од 200. Викторија Бекам има повеќе од 100.

Митот за „биркин“ е потпомогнат од фактот дека „Хермес“ го контролира количеството на чанти што се произведуваат секоја година, што ја прави оваа чанта многу посакувана стока. Чантата исто така им се продава само на специјални клиенти на „Хермес“.

Едноставно не можете да влезете во бутик на „Хермес“ и веднаш да купите чанта „биркин“. Ако некое лице, да речеме, сака одредена големина „биркин“ во одредена боја, не може само да оди во бутик на „Хермес“ за да ја купи; за наоѓање на чантата е потребно време.

Чантата мора да се нарача, а има и листа на чекање. Овие чанти не се продаваат ни на официјалната веб-страница на „Хермес“. Продавницата „Хермес“ има само по неколку чанти двапати годишно. Покрај тоа, стилот, бојата и големината никогаш не се познати однапред. „Хермес“ ги задржува својата ексклузивност и реткост со примена на систем на квоти, ограничувајќи го бројот на чанти што еден клиент може да ги купи само на две годишно.

Викторија Бекам има повеќе од 100 чанти „биркин“ / Depositphotos

Сето тоа го поттикна пазарот за препродажба на „биркин“. Понекогаш дури и квалитетни старински чанти може да се најдат на сајтови како „Вестер колектив“ (Vestaire Collective), „Нет-а-порте“ (Net-a-Porter), „Финфеч“ (FinFetch) и слично. Цените варираат во зависност од големината, реткоста и спецификациите на моделот и од состојбата на чантата. Токму поради реткоста и побарувачката, понекогаш цените на половните чанти може да ги надминат цените на поедноставните нови модели, а речиси е невозможно да се најдат под почетната цена за новите модели. Цените на новите чанти „биркин“ зависат од типот на кожата, бојата и опремата. Тие се движат од 10 до 250 илјади долари. Највисоката цена за „биркин“ беше постигната на аукција на „Кристи“ во Хонгконг во мај 2017 година. Чанта од егзотична кожа и дијаманти беше продадена за рекордна цена од 380.000 американски долари.

Инаку, престижната луксузна чанта е резултат на случајна средба на Жан-Луј Думас и неодамна починатата пејачка и актерка Џејн Биркин. Тие двајца заедно биле на лет Париз - Лондон, а токму нивниот разговор го навел Думас да ја дизајнира чантата. Биркин беше позната по својот ноншалантен стил, вешто комбинирајќи ги англиската едноставност и францускиот шик, а омилен придружник ѝ беше плетен цегер наместо класична чанта. Жалејќи се дека работите лесно ѝ паѓаат од него и дека не може да најде кожена чанта што одговара на нејзините потреби и вкус, Думас дошол на идеја да создаде чанта што донекаде ги следи формата и идејата на цегерот. Тој исто така користел и еден претходен дизајн на чанта, „хот а куроа“ (Haut a Courroies), создадена од „Хермес“ околу 1900 година.

Џејн Биркин, муза и инспирација за чантата „биркин“ / Depositphotos

Од нејзиното лансирање во 1984 година, се проценува дека во светот нема повеќе од 200 илјади чанти „биркин“ во оптек.

Се продаваат во различни големини: од 25, 30, 35 до 40 сантиметри, а патните торби се 50 и 55 сантиметри. Ги има во разни бои: црна, кафена, златножолта, темносина, маслинестозелена, портокалова, розова, пудресто сина, црвена и бела.

Металните детали (брава, клучеви, окови за тока итн.) се обложени со злато или со паладиум. Чантата има препознатлив детаљ на „Хермес“: брава и клучеви. Клучевите се спакувани во кожена лента позната како клошет. Чантата се заклучува со затворање на горните преклопи над јамките за токата, со замотување на лентата на токата или со затворање на предната брава. Бравите и клучевите се кодирани со броеви. Поранешните брави имаа само еден број на дното на бравата. Во последниве години „Хермес“ додаде втор број под својот печат. Чантата може да се изработи по нарачка со различни кожи, бои и цврсти елементи по избор на купувачот. Постојат и други индивидуални опции, како што е обложување со дијаманти.

Секоја чанта однатре е обложена со козја кожа, а бојата на внатрешноста одговара на бојата на надворешноста. За надворешноста се користат телешка кожа, кожа од гуштер и кожа од ној. Меѓу најскапите порано била крокодилската кожа, а чантите со помали крлушки биле поскапи од оние со поголеми крлушки. Во јули 2015 година, Биркин, вообичаено страсна за голем број хуманитарни иницијативи, вклучувајќи ја и благосостојбата на животните, го замоли „Хермес“ да престане да го користи нејзиното име за верзијата со крокодилска кожа поради етички причини. ПЕТА (здружение за етичко постапување со животните) ги обвини фармите за крокодили што му испорачуваа кожа на „Хермес“ дека применуваат суров третман убивајќи ги крокодилите на тој начин што тие сè уште можат да почувствуваат болка и ги фрлаат во бетонски јами. „Хермес“ набрзо потоа објави дека ја задоволил Биркин со нови гаранции во врска со споменатите практики.

Музата што ја инспирираше француската нација уште од својата бурна врска со Серж Генсбург, нормално, поседуваше само пет-шест модели и секогаш пред да земе нова чанта донираше по една во  хуманитарните организации.

И доколку, како Кери Бредшо, претпочитате „да ги чувате парите таму каде што можете да ги видите - во својот плакар“, можеби ќе ве интересира да знаете дека постои специјална услуга на „Хермес“, која е создадена за да ја одржи вашата инвестиција во „биркин“ што подолго „здрава“, а е наречена спа-третман. Просечната цена за третман на умерено оштетена чанта е околу 275 долари.

Во моментов нема коментари за веста. Биди прв да коментира...

Остави коментар