Стогодишна традиција на рачно изработени чадори го преживува модерното време

Во денешниот свет, каде што предметите брзо се фрлаат и заменуваат, а брзата мода доминира на пазарот, ретко се среќава бизнис што негува традиција и квалитет. Малите бизниси, како „Чадори Церовечки“ (Kišobrana Cerovečki) во Загреб, се исклучок во светот на масовното производство, нудејќи производи што се направени со грижа и посветеност.

„Чадори Церовечки“ е семеен бизнис, кој е основан во 1912 година во Вараждин. Нивната приказна започнува со Мија Цепанец, кој го започнал бизнисот и своето знаење му го пренел на својот внук Габријел Церовечки. Габријел ја продолжи традицијата и отвори продавница во Загреб, каде што бизнисот преживеа многу предизвици.

Денес четвртата генерација, предводена од Томислав Церовечки, ја продолжува оваа долга традиција на рачно изработени чадори. Тој е и последниот изработувач на чадори во Хрватска.

Го посетивме Томислав Церовечки во неговиот дуќан во Загреб, каде што детално го опиша процесот на изработка на чадори.

Bloomberg Adria

„Процесот на производство на чадор ’церовечки’ се состои од неколку внимателно изведени фази. Најпрво се започнува со идејата и одлуката за моделот на чадорот. Потоа следува кроење на материјалот, кој може да опфати и до 12 парчиња материјал. Потоа дрвеното стапче се поврзува со жиците, по што доаѓа фазата на шиење на материјалот. Кога материјалот е сошиен, се облекува на метален костур. Завршните чекори вклучуваат монтирање на држачот, додавање ситен прибор и пеглање на чадорот за да се постигнат совршен изглед и функционалност“, вели Церовечки за неговите чадори, кои се продаваат по цена од 70 до 250 евра во зависност од моделот. Покрај производството, тој во својата продавница врши и поправки.

Најпознат производ од овој занает е чадорот „шестински“, кој потекнува од средината на 18 век и е препознатлив сувенир на Загреб. „’Шестински’ е симбол на градот Загреб. Посебен е затоа што е дел од националната носија“, објаснува Церовечки. Тој се карактеризира со црвено памучно платно со разнобојни риги, дебел дрвен стап и природно свиткана рачка од костен. Тој чадор стана незаменлив сувенир за туристите, кои го препознаваат како автентичен и функционален дел од наследството на Загреб.

Bloomberg Adria

Чадорите „церовечки“ привлекуваат клиенти од целиот свет, вклучувајќи ја и Америка, кои се посебно воодушевени од квалитетот  и изработката на овие уникатни чадори. „Нашите клиенти најчесто доаѓаат намерно кај нас, иако има и такви што лежерно доаѓаат од љубопитност“, посочува Церовечки и додава дека клиентите ги ценат рачно изработените и долготрајни производи, што е реткост во денешната ера на брза мода.

Бизнисот се соочува со предизвиците на модерната економија и конкуренцијата од поевтините производи, но опстојува благодарение на посветеноста на квалитетот и изработката. „Во денешната поплава од брза мода и поевтини производи, секогаш се фокусираме на квалитетот. За малите претприемачи е тешко, но сè зависи од работата што ја работите“, вели Церовечки, додавајќи дека во работата учествува целото семејство, што е клуч за опстанокот на семејниот бизнис.

Bloomberg Adria

Покрај производството на чадори за секојдневна употреба, „Церовечки“ изработува и чадори за филмска и театарска продукција. Нивните чадори се користени во голем број серии и претстави, а се нарачувани од домашни и странски телевизиски куќи. Еден од најпознатите проекти беше „Видс оф вор“ (Winds of War).

За стогодишната работа на семејството Церовечки дознајте повеќе во видеото.

Во моментов нема коментари за веста. Биди прв да коментира...

Остави коментар