Владата на новата британска премиерка Лиз Трас би можела да стави крај на репресијата против брзата храна како дел од обидот да се намали притисокот врз бизнисите и потрошувачите кои се борат со ефектите од зголемените цени.
Министерството за финансии наредило повторна анализа на мерките за борба против дебелината, oбјави „Гардијан“ (Guardian). Ова вклучува нови правила за тоа каде може да биде изложена нездравата храна во продавниците, кои требаше да стапат на сила во октомври. Официјални лица, исто така, ја преиспитуваат забраната за промоции „два за еден“, како и за телевизиски реклами за производи со многу шеќери и маснотии пред 21 часот.
Нејзиниот претходник, Борис Џонсон, ја започна оваа иницијатива откако беше хоспитализиран поради Ковид-19 во април 2020 година. Џонсон тогаш изјави дека боледува од „многу честа болест“ наречена „прекумерна тежина“. Истражувањата покажаа дека дебелите луѓе имаат поголем ризик од компликации и смрт предизвикани од болеста.
Многу од неговите предлози беа одложени поради притисокот од конзервативците во парламентот, како и поради потребата да им се даде време на компаниите да се подготват.
Лиз Трас во август изјави дека има намера да ги укине дополнителните даноци за брзата храна бидејќи „луѓето не сакаат владата да им кажува што да јадат“.
Bloomberg Mercury
Министрите ќе ги преиспитаат и мерките со кои се регулира бројот на дозволени калории во големите ресторани. Данокот за слатки безалкохолни пијалоци, кој беше воведен во 2018 година и оттогаш беше поздравен како клучна алатка во борбата против дебелината, може повторно да се најде под лупа.
Според мајскиот извештај на Светската здравствена организација (СЗО), Британија го има четвртиот најголем процент на дебела возрасна популација во Европа. Повеќето возрасни луѓе во Англија имаат проблем со вишокот килограми, а податоците на Националната здравствена служба (NHS) покажуваат дека 35 милиони луѓе, или 67 отсто од мажите и 60 отсто од жените, имаат проблем со дебелината. Растот на бројот на дебели луѓе е најбрз кај посиромашните слоеви, што создаде јаз меѓу богатите и сиромашните.
„Лошата исхрана, надополнета со затворањето, доведе до зголемување на дебелината кај децата и ги прошири постоечките разлики“, рече Кетрин Џенер, директорка на Сојузот за заштита од дебелина. Таа додаде дека организацијата е „длабоко загрижена“ за извештајот. „Ова нема да помогне да се намалат ефектите од инфлаторната криза на краток рок, но долгорочно може да доведе до сериозни последици за нашето здравје, економијата и здравствениот систем“, посочи таа.
Дебелината е товар и за Националната здравствена служба (NHS), која потроши 6,1 милијарди фунти за болести поврзани со дебелината во 2014 и 2015 година. Оваа бројка ќе се зголеми на 9,7 милијарди фунти до 2050 година, според Канцеларијата за јавно здравје на Англија.
.webp){kind=icon}
Во моментов нема коментари за веста. Биди прв да коментира...