Милијардерите со луксузни хотели инвестираат во бродови за крстосување

На јахтата „Риц-Карлтон“, која во октомври исплови од Барселона на своето прво патување, немаше шоуа на Бродвеј, мини-голф или аркадни игри. Наместо тоа, гостите ги забавуваа џез-музичари, уметничката колекција на бордот и продавница за чанти „биркин“ од 30.000 долари.

Добре дојдовте на крстосувањата за богатите.

„Мериот“ (Marriott International Inc.), најголемата светска хотелска групација и сопственик на „Риц-Карлтон“ (Ritz-Carlton), влегува во сферата на луксузни крстосувања како дел од новиот бран ексклузивни оператори насочени кон богатите. Додека постојните оператори се борат да ги отплатат долговите настанати за време на коронавирусот, а резервацијата на соби останува под нивото пред пандемијата, нови учесници се борат да заземат дел од премиум-пазарот.

„Аман ресортс“ (Aman Resorts), во сопственост на инвеститорот во недвижности Владислав Доронин, треба да стартува во 2025 година, во соработка со „Крус Сауди“ (Cruise Saudi), нов оператор во сопственост на Фондот за јавни инвестиции на Саудиска Арабија. „Фор сизонс“ (Four Seasons), чии сопственици милијардери Бил Гејтс и принцот Ал-Валид бин Талал имаат свои јахти, исто така планира да ја претстави својата понуда.

„Првиот брод во нашата идна флота ќе заплови во 2025 година, со 95 апартмани, чија изградба ќе чини 4,2 милиони долари по апартман“, рече Лари Пиментел, кој е ангажиран од „Фор сизонс“ да го води нивното проширување во индустријата. Собите ќе имаат прозорци од подот до таванот, тераси и, како што посочуваат од операторот, речиси 50 отсто повеќе простор по гостин во споредба со конкурентските оператори.

За хотелските оператори, воведувањето крстосувања на листата на можности значи дека постојните клиенти имаат повеќе места за користење на поените од нивните програми за лојалност - охрабрувајќи ги да трошат повеќе во рамките на компанијата.

Bloomberg

„Станува збор за освојување срца, умови и паричници“, вели Џенел Џонсон, партнер на PwC во сферата на угостителството и одморот.

Италијански милијардер

Новите учесници го привлекоа вниманието на ветераните во индустријата. Магнатот што се занимава со крстосувања, милијардерот Манфреди Лефевр, кој често пуши голем томпус, продаде луксузен оператор пред пет години, фрустриран што не може да ги обезбеди истите услови за задолжување како поголемите играчи.

Сега се врати, откако минатата година купи два „Кристал круз“ (Cristal Cruise брода) со „А енд К травел“ (A&K Travel Group), кои напредуваат во поглед на луксузните бродови.

„Размислувавме за партнерство со хотелски бренд, но на крајот решивме да одиме сами и да се позиционираме во ексклузивен сектор на луксузната индустрија“, рече тој неделава. „Едно крстосување чини 60 отсто од истиот тип на хотелски одмор, а денес дури и помалку од тоа“.

Манфреди Лефевр Bloomberg

„Луксузните патувања закрепнуваат побрзо од поширокиот пазар и се привлечни за операторите“, вели Патрик Сколс, управен директор за сместување и одмор во „Турист секјуритис“ (Truist Securities).

„Еден од најголемите двигатели во индустријата за крстосување или во патувањето во моментов е луксузот за супербогатите“, вели тој. „Сите се обидуваат да влезат во тој тренд“.

Дејвид Бернштајн, главен финансиски директор во „Карнивал“ (Carnival Corp), ги следи новите учесници со особен интерес. Тој прифаќа дека ќе има поголема конкуренција за да се привлечат клиенти што трошат повеќе.

„Сигурен сум дека ќе има луѓе што претходно крстосувале со нас, а кои исто така престојувале во хотелот 'Фор сизонс', кои ќе речат 'да, ќе го пробам овој производ'“.

Биланси

„Карнивал“ е еден од тековните оператори за крстосувања што се борат да ги обноват своите биланси, откако беа принудени да се насочат кон кредитните пазари за да ја преживеат пандемијата.

Поради превирањата на „Карнивал“, „Ројал карибијан“ (Royal Caribbean Cruises Ltd.) и „Норвиџан круз“ (Norwegian Cruise Line Holdings Ltd.) заедно имаат околу 74 милијарди долари долг, вклучувајќи ги и оперативните закупи. Трите компании додадоа околу 44 милијарди долари на својот долг од крајот на 2019 година, според декемвриската анализа на „Блумберг интелиџенс“.

Тие долгови ќе треба да се рефинансираат како што завршува ерата на евтини пари.

Крстосување на „Ројал карибијан“ Bloomberg

„Придобивките од нашите повеќекратни потези во изминатите неколку години за подобрување на маржите продолжуваат да се исплатат, бидејќи се фокусираме на извршување на нашата докажана формула за умерен раст на приносот и силна контрола на трошоците“, рече Нафтали Холц, финансиски директор на „Ројал карибијан“.

Влијание врз проширувањето

„Во ’Карнивал’ износот на долгот ја натера фирмата да ја забави експанзијата“, вели Бернштајн. Пред пандемијата, операторот градеше три или четири брода годишно. Денес очекува само еден брод во 2025 година и ниту еден во 2026 година  - потези за кои се надева дека ќе го вратат кредитниот рејтинг на компанијата и ќе му овозможат на операторот да продолжи со рефинансирање.

Операторите за крстосувања штотуку почнаа да се приближуваат до нивоата на интерес од пред пандемијата. „Карнивал“ очекува 90 отсто пополнетост во првиот квартал од оваа година, во споредба со само 54 отсто во првите три месеци од 2022 година, а се очекува во текот на летото да биде повеќе од 100 отсто.

Бавното темпо на закрепнување значи дека, барем засега, се достапни помалку приходи за операторите за плаќање камата.

Притисоци

Повисоките каматни стапки „навистина ги измешаа нивните планови за закрепнување, бидејќи тие сè уште зависат многу од пазарите на капитал за да можат да ги пополнат празнините во готовина и сè уште го прават тоа“, вели Џоди Лури, кредитен аналитичар во „Блумберг интелиџенс“.

Хеџ-фондот „Маршал Вејс“ (Marshall Wace), кој заработи пари во декември од краток облог на „Карнивал“, им порача на своите инвеститори дека влошувањето на трошоците може да предизвика профитабилноста на компанијата за крстосување да не ги исполни очекувањата.

Карим Мусалем, кој ја предводи стратегијата за капитал во „Селвуд“ (Selwood Asset Management), зазема кратка позиција.

Фирмата „се соочува со многу проблематична комбинација од три работи: потрошувач под притисок; билансите, кои остануваат многу растегнати; и без хеџ кога станува збор за цените на нафтата, што верувам дека ќе биде голем проблем за 2023 година“, рече менаџерот на пари, чиј фонд од 100 милиони долари започна во април и оттогаш доби околу 15,6 проценти.

Како одговор на тоа, операторот нагласи дека постојано ја демонстрира својата издржливост и дека луѓето им даваат приоритет на трошењата на искуства пред трошењата на предмети. „Нашата иднина изгледа многу светло“, се вели во соопштението.

„Карнивал“ има опции. Минатото лето се проширија гласини дека операторот ќе продаде еден од своите брендови.

„Некој ни се јави и рече дека е заинтересиран, а ние слушавме“, рече Бернштајн. „Отворени сме за тоа, размислуваме за тоа, но никој не чука на врата со жестока намера да го купи брендот“.

Патници се качуваат на крузер на „Карнивал“ Bloomberg

Спротивно на тоа, препознатливоста на брендот е една од предностите што ги имаат хотелските оператори кога влегуваат во индустријата. Покрај тоа, тие често имаат посилни канали за директна продажба кај редовните гости, кои можат да ги користат за полнење на бродовите.

На крстосувањето на „Риц-Карлтон“, околу две третини од резервациите дошле на тој начин, што е, како што им кажа на аналитичарите извршниот директор на „Мериот“, Тони Капуано, многупати повеќе од стапката на повеќето компании за крстосување.

Бернштајн одлучи да биде оптимист  - тој се надева дека походот на „Фор сизонс“ или „Риц-Карлтон“ во сферата на луксузни крстосувања ќе обезбеди повеќе идни клиенти за „Карнивал“.

„Ако добро се забавуваат, можат да кажат: 'Крстосувањето е прекрасен начин за патување. Можеби следниот пат ќе земам уште едно крстосување и ќе ги земам моите деца и внуци, а 'Фор сизонс' и 'Риц-Карлтон' можеби тогаш нема да бидат првиот избор“.