Германската „Веј“ (Vay) стана првата компанија што испрати возило без луѓе на европски јавен пат, подвиг за кој стартапот вели дека ќе овозможи воведување далечински управуван сервис за автомобили во рок од неколку месеци.
Ова треба да биде клучен чекор за да се започне со нудење услуги за мобилност на клиентите преку возење на долги растојанија.
Германскиот стартап објави дека организирал таканаречено телевозење на однапред селектирани улици во Хамбург, откако властите во пристанишниот град го одобриле тоа.
„Веј“ ја тестира технологијата за далечинско управување на автомобили повеќе од три години, но досега беше задолжително да имаат возач во електричните возила на „Киа“ што ги користат заради безбедност.
Прочитајте повеќе: Ќе ја одбрани ли Германија својата индустрија во ерата на електрични возила?
Услугата за телевозење треба да биде преодна фаза кон т.н. робовозила.
Иако инвеститорите досега имаат инвестирано околу 100 милијарди долари во развој на робовозила, засега се намалени очекувањата дека вакви автомобили наскоро ќе се појават на патиштата.
Но тоа што го нуди „Веј“ би можело да има потенцијал, а од компанијата наведуваат дека не станува збор за години, туку за месеци.
„Сега ќе работиме со властите на следните чекори, а тоа е да им се понудат услуги на клиентите. Зборуваме за месеци, а не за години“, рече извршниот директор на компанијата, Томас фон дер Охе.
Услугата се состои во тоа што телевозачи по далечински пат го испорачуваат електричното возило до клиент што сака да го користи. Потоа, клиентот го презема управувањето со автомобилот до саканата дестинација. Таму, телевозачите повторно го преземаат и го пренасочуваат до нов клиент. „Веј“ собра околу 100 милиони долари за проектот од инвеститори како што се поранешниот финансиски директор на „Гугл“ (Google), Патрик Пишет, „Киневик“ (Kinnevik AB) и компанијата „Атомико“ (Atomico).
.webp){kind=icon}