Како Кина ги победи сите и стана лидер за електрични возила

Во трката за намалување на емисиите на јаглерод, земјите низ светот даваат стимулации за да ја поттикнат продажбата на електрични возила - тактика што Кина ја користеше со години додека прерасна во најголем пазар за електрични возила на планетата.

Успехот на Пекинг го одзема здивот. Минатата година електричните возила сочинуваа четвртина од сите продадени патнички автомобили во Кина, што е многу повеќе од приближно еден од седум продадени автомобили во САД и еден од осум во Европа. И темпото се забрзува. ХСБЦ (HSBC) очекува стапката на електрични возила во втората по големина економија во светот да достигне 90 отсто до 2030 година.

Вклучувајќи ги и плагин-хибридите, продажбата на „зелени“ автомобили во Кина достигна 5,67 милиони во 2022 година, повеќе од половина од сите глобални испораки. Земјата ќе учествува со околу 60 отсто од продажбата на нови 14,1 милиони патнички електрични возила во светот оваа година, предвидува „Блумберг НЕФ“ (BloombergNEF).

Но не се само купувачите. Производството исто така цвета - кинеските брендови сочинуваат околу половина од сите продадени електрични возила на глобално ниво, наведуваат аналитичарите на ХСБЦ во неодамнешната белешка.

Добрата инфраструктура очигледно помага при имплементацијата на овие возила. Кина, која ја има најголемата мрежа за полнење во светот, додаде 649.000 јавни полначи само во 2022 година, што е повеќе од 70 отсто од сите инсталации направени на глобално ниво во текот на ланската година.

Охрабрени од постигнатиот напредок, производителите на ЕВ ја преполнија Кина со нови модели, а ценовната војна се разгоре оваа година додека компаниите се обидуваат да се позиционираат пред ривалите. Аналитичарите очекуваат одредена консолидација на индустријата во Кина.

Кинескиот пазар за возила на нова енергија се консолидира

БЈД, „Тесла“ и САИК-ГМ поставија цврста основа по пандемијата Bloomberg

Подетален поглед на кинескиот пристап на „морков и стап“ во однос на електричните возила:

Моркови

Субвенции за потрошувачите: Програма што траеше цела деценија им надоместуваше на купувачите на ЕВ дури 60.000 јуани (8.375 долари). Иако националните субвенции завршија во 2022 година, локалните самоуправи во места како Шангај продолжуваат да исплатуваат надоместоци до 10.000 јуани.

Даночни олеснувања: Стандардната даночна давачка од 10 отсто е укината за набавки на „зелени“ автомобили под 300.000 јуани до 2025 година, а ќе се врати на 5 отсто во 2026 и 2027 година. Во САД, Законот за намалување на инфлацијата, кој беше усвоен минатата година, вклучува даночни олеснувања од 270 милијарди американски долари за купување електрични возила и чисто производство и речиси 12 милијарди долари заеми за проекти за чиста енергија.

Субвенции на производителите: Директната владина поддршка за производителите на ЕВ им помогна на многумина да почнат со работа. Се појавија големи компании, при што има повеќе од 500 бренда на ЕВ што го преполнија пазарот во 2019 година, а од таквите напори произлегоа успешни приказни, како БЈД (BYD Co.). Компанијата со седиште во Шенжен стана најпродаваниот бренд во Кина, ставајќи му крај на повеќедецениското владеење на „Фолксваген“ (Volkswagen AG).

Инфраструктура: Широкодостапните станици за полнење субвенционирани од владата ги намалуваат трошоците на возачите и ја олеснуваат секоја загриженост во однос на опсегот на електричните возила. Стандардите за полнење се унифицирани, благодарение на договорите со производителите, така што сите ги користат истите приклучоци. Кина имаше 6,36 милиони електрични полначи на крајот на мај, повеќе од кое било друго место на планетата. Значителен дел е од државната мрежа, четвртиот најголем провајдер зад приватните компании како „Ванбенг“ (Wanbang New Energy Investment Group Co.) и „Ти гуд“ (TGood New Energy Co).

Стапови

Пречка за бензинци: Купувањето и поседувањето автомобили на бензин се сè помалку привлечни. Градовите се борат со метежот со ограничување на бројот на автомобили на патиштата со мерки како што се лотарии за нови регистарски таблички во Пекинг и систем за аукција во Шангај. На аукциите во Шангај во првите пет месеци минатата година табличките беа во просек по 92.780 јуани. Возачите на ЕВ во меѓувреме лесно можат да добијат зелена регистарска табличка, покажувајќи ги своите еколошки акредитиви. Зелените таблички сè повеќе се истакнуваат на градските улици.

Казни за производство: Кина воведе двоен кредит-систем за автомобилската индустрија во 2017 година, кој доделува поени за правење зелени автомобили и казни за оние со висока потрошувачка на гориво. Автомобилите од производителите со негативни оценки може да се повлечат од пазарот. За да избегнат казна, производителите можат да купат кредити од ривали со позитивни оценки, како „Тесла“ или БЈД. Но тоа може скапо да ги чини. Државната компанија „Чонгкинг Чанган“ (Chongqing Changan Automobile Co.) изгуби 4.000 јуани во добивка за секој продаден автомобил во 2020 година бидејќи купуваше кредити за да ја избегне казната.

Продажба

Државни набавки: Некои локални самоуправи ги трансформираа своите возни паркови во јавниот превоз и такси-службите во 100 отсто електрични и ги охрабрија локалните агенции да набавуваат електрични или плагин-хибриди. Резултатот беше стабилен бизнис за производителите на електрични возила, како што се БЈД, кој исто така произведува автобуси, и „Гуангжу“ (Guangzhou Automobile Group Co).

Во моментов нема коментари за веста. Биди прв да коментира...

Остави коментар