Европа создава вселенски гигант: „Ербас“ и „Голдман Сакс“ против Маск

„Ербас“ (Airbus SE)  ја ангажираше „Голдман Сакс“ (Goldman Sachs Group Inc.) за совет во напорите да се создаде нова европска вселенска и сателитска компанија која може подобро да се натпреварува со доминантниот „Спејс Икс“ (SpaceX) на Илон Маск, според луѓе запознаени со ова прашање. 

Разговорите за создавање вселенски и сателитски бизнис со француската воздухопловна компанија „Талес“ (Thales) и италијанската „Леонардо“ (Leonardo SpA) се во фаза на истражување и нејзиното целосно портфолио на услуги не е поставено, велат луѓето, барајќи да не бидат идентификувани бидејќи дискусиите се доверливи.

Римскиот „Леонардо“ ја ангажираше „Банката на Америка“ (Bank of America Inc.) за планот, кој беше наречен „Проект Бромо“ (Project Bromo), додаваат изворите. Парискиот „Талес“ исто така разговара со советници. Двете компании веќе имаат заеднички вложувања во производи за сателити и вселенски телекомуникации.

Ангажирањето водечки советници за спојувања и преземања  претставува конкретен чекор за формализирање на долго дискутираните планови за таков потфат. Фирмите ги разгледуваат прашањата како што се трошоците, сложеноста, регулаторните пречки, антимонополските импликации, а исто така и можностите за воведување различни цивилни и воени договори под таков ентитет.

Претставниците на „Ербас“, „Леонардо“, „Голдман“ и „Банката на Америка“ одбија да коментираат. „Талес“ повтори дека имало рани дискусии, без да коментира за советниците.

Потегот да се донесат врвни советодавни фирми за спојување и преземање е дополнителен доказ за обидот на компаниите да ги надминат политичките и финансиските пречки за формирање европски шампион.

„Спејс Икс“ се етаблираше како истакнат провајдер за лансирање ракети во индустријата, испраќајќи сателити, товар и луѓе во вселената за НАСА, Пентагон и комерцијалните партнери. Нејзината единица за интернет од вселената „Старлинк“ управува со најголемата и најнапредната сателитска мрежа во ниската орбита на Земјата. Европските фирми, вклучително и „Ербас“, проголтаа значителни загуби обидувајќи се да го здражат чекорот.

Итноста се зголеми по реизборот на американскиот претседател Доналд Трамп, кој го постави Маск - основачот на „Спејс Икс“, прв човек на „Тесла“ и најголемиот донатор на неговите изборни напори – за задолжен за намалување на федералниот буџет и модернизирање на информатичката технологија.

Лидерите на Европската унија се состанаа во понеделникот во Брисел за да разговараат за трошоците за одбрана во контекст на тековната војна на Русија против Украина и барањата на Трамп блокот да троши повеќе за одбраната.

Акциите на „Ербас“ се зголемија за дури 0,9 проценти на тргувањето во Париз, додека „Талес“ напредуваше дури 1,8 проценти во вторникот. „Леонардо“ доби дури 1,9 проценти.

Деталите за тринасочниот потфат сè уште се тајна, а антимонополските размислувања веројатно ќе ја обликуваат структурата на секој договор, велат изворите. Главниот извршен директор на „Леонардо“, Роберто Чинголани, на 28 јануари рече дека се состанал со колегата од „Ербас“, Гијом Фаури, за да разговараат за европската соработка и дека е постигнат напредок во новата алијанса за вселената и сателитите.

Гијом Фаури, извшрен директор на „Ербас“/Извор: Блумберг

„Ла Трибјун“ (La Tribune) во средината на 2024 година извести за раните разговори за создавање заедничка вселенска компанија. Оттогаш, директорите разговараа за создавање на потфат по моделот на ракетната компанија МБДА (MBDA), која е во косопственост на „Ербас“, „БАЕ системс“ и „Леонардо“.

Извршниот директор на „Ербас“, Фаури во септември изјави дека на европските одбранбени и вселенски компании им е потребна консолидација за подобро да се натпреваруваат со големите глобални сили. Ракетниот потфат на европскиот производител на авиони „Ариан груп“ (ArianeGroup) со „Сафран“ (Safran SA) забележа некои неуспеси со своето најново возило „Ариан 6“.

Водачите на европските воздушни и одбранбени простори долго време повикуваат на консолидација за насочување на ресурсите на скапи проекти како воени авиони. Самата „Ербас“, составен пред неколку децении од производители во неколку земји, е примарен пример за тоа како може да работи.

Во вселената, американските фирми како „Спејс Икс“ ја нарушуваат конкуренцијата за лансирање ракети и сателитски комуникации. Во меѓувреме, во одбраната, Европа има конкурентни програми за напредни борбени авиони.

На Европа и треба размер во двете области за да се натпреварува со американските фирми, рече тогаш Фаури.

„Ербас“ во октомври соопшти дека ќе елиминира дури 2.500 позиции во својата одбранбена и вселенска дивизија, бидејќи европскиот производител на авиони се обидува да ги намали трошоците во бизнисот кој постојано ги зголемува сметководствените трошоци и страда од силната конкуренција.

Фаури започна ревизија на вселенската единица на „Ербас“ во јули, откако пријави загуби од  милијарда долари во првата половина на 2024 година.

Повиците за поголема соработка во вселената и одбраната во Европа се зголемија во текот на изминатата година. Големите системски интегратори, како што се „Ербас“ и „Талес Алениа Спејс САС“ (Thales Alenia Space SAS), губат пари на големи комерцијални сателитски проекти, а профитабилноста мора да се воспостави како прашање на итност, изјави во мај Јозеф Ашбахер, генерален директор на Европската вселенска агенција.

„Талес“ има за цел да ја врати профитабилноста во вселенскиот сектор, рече главниот финансиски директор Паскал Бушиат во декември. „Талес Аленија“, која настана како заедничко вложување на француската компанија со „Леонардо“ имаше приход од околу 2,2 милијарди евра (2,26 милијарди долари) во 2023 година, според веб-страницата. Тие исто така се сосопственици на потфатот за сателитски услуги „Телеспацио“ (Telespazio), кој имаше приход од 700 милиони евра во 2023 година.

Недоамна, веќе имаше преземања во европската вселенска индустрија. Шпанската одбранбена компанија „Индра Системас“ (Indra Sistemas SA) минатата недела се согласи да стекне мнозинство во сателитскиот оператор и давател на услуги „Хиспасат“ како дел од нејзините напори да го прошири својот вселенски бизнис.

Компаниите на Маск исто така се пробиваат во Европа. Италија е во преговори со „Спејс Икс“за договор од 1,5 милијарди евра (1,6 милијарди долари) за шифрирани комуникациски системи, што би бил најголемиот ваков проект во Европа.

- Со помош од Ејк Хенинг

Во моментов нема коментари за веста. Биди прв да коментира...

Остави коментар