Колку заработуваат директорите на најголемите македонски банки?

За македонскиот банкарски сектор уште еднаш се покажа дека „топ не го бие“ и во кризни времиња, па и во 2024  година прокнижи рекордни добивки, вкупно речиси 283 милиони евра, што е за 22 отсто повеќе во однос на 2023 година.

Само трите најголеми банки – „Стопанска банка Скопје“, „Комерцијална банка“ и „НЛБ Банка“ имаа речиси 192 милиона евра чиста заработка. Проверивме во нивните годишни финансиски извештаи колку заработува топ менаџментот, но и секторските директори.

За тоа кој е најплатениот домашен банкар не може да кажеме со стопроцентна прецизност, затоа што и немаме докрај прецизни официјални податоци. Во годишните извештаи за работењето на банките има податоци за платите и надоместоците на членовите на управните одбори (УО), на надзорните одбори (НО) и другите високи менаџери, но не е кај сите еднакво детализирано.

Менаџерски трансфер од „Стопанска“ во НЛБ

Па така, кај „НЛБ банка“ и „Стопанска банка – Скопје“ е најтранспарентно прикажано колку заработил секој член на  највисокото раководство, при што највисока исплата  во 2024 година во НЛБ добил Петер Зелен, член на УО, кој имал 9,1 милиони денари бруто-плата, 1,2 милион денари варијабилен дел и 4,6 милиони денари по основ на други права, вкупно 14,9 милиони денари бруто-надоместоци на годишно ниво или околу 242 илјади евра. Само по основ на бруто-плата, Зелен заработил по 12,3 илјади евра месечно.

Втор по заработка во апсолутен износ бил Бранко Грегановиќ, кој всушност неколку години беше прв човек на „НЛБ банка“, односно претседател на УО и замина од челната позиција од септември 2024-та. Тој во 2024 година заработил 7,6 милиони денари бруто-плата, 1,2 милион варијабилен дел и 1,9 милион денари по други основи, што значи вкупно 10,7 милиони денари или 174 илјади евра. Но, со оглед дека тој практично одработил осум месеци, во просек неговата бруто-плата месечно е околу 15,4 илјади евра, што е повеќе од износот на Зелен, за околу три илјади евра во просек.

За негов наследник во банката беше назначен Тони Стојановски, претходно висок менаџер и член на УО во „Стопанска банка - Скопје“, кој на позицијата претседател на УО во НЛБ лани од септември до крајот на годината заработил околу 3,7 милиони денари или 60 илјади евра, главно во вид на бруто-плата. И на крајот, уште еден член на УО, Игор Давчевски, кој вкупно по сите основи лани заработил околу 197 илјади евра, бруто. Вкупната сума на заработка на сите членови на УО на НЛБ за 2024 година изнесува 41,4 милион денари или околу 673 илјади евра и е повисока за околу 9 отсто во однос на 2023 година. Тука треба да појасниме дека во 2023 година најголемата месечна бруто-плата ја имал највисокиот по функција, претседателот на УО Грегановиќ, од околу 12,9 илјади евра, за разлика од 2024 година, кога неговата бруто-плата била помала од таа на двата члена на УО, Зелен и Давчевски. Но, како што веќе споменавме, тоа е поради фактот што тој не ја извршуваше функцијата во текот на сите 12 месеци.

Во „Стопанска банка – Скопје“, пак, во 2024 година на членовите на УО им биле исплатени вкупно 29,4 милиони денари или 478 илјади евра. Управниот одбор на банката има четири члена, што значи секој во просек добил по речиси 120 илјади евра. Од оваа сума, 82 отсто е фиксен дел, или 98,4 илјади евра и 21,6 илјада евра варијабилен дел. Во просек, излегува дека секој член на УО добил по 8.200 евра бруто-плата месечно. Остатокот од по 1.800 евра месечно во бруто-износ е варијабилниот дел, на кој давачките зависат од видот на надоместокот.

„Стопанска банка - Скопје“ има наведено и колку има добиено секој член на УО поединечно како плата и надоместоци во 2024 година, па така, претседателот на УО и генерален извршен директор Диомидис Николетопулос има добиено 8,55 милиони денари фиксен дел, односно бруто-плата, и 2,52 милиони денари како варијабилен дел, што значи вкупно 11,07 милиони денари бруто. Оттука, Николетопулос, кој е на чело на банката од 2013 година, како бруто-плата месечно примал по околу 11,5 илјади евра, додека преостанатите членови на УО, генералната директорка за банкарство на мало Милица Чапаровска–Јовановска и генералниот директор за управување со ризици м-р Бојан Стојаноски сума сумарум заработиле речиси идентично, по околу 8,5 илјади евра бруто-плата месечно. За четвртиот член на УО, генералниот директор за корпоративно банкарство Тони Стојановски, кој на функцијата бил до средината на годината, односно поднел оставка во јуни, прикажана е заработката само до тој момент и таа изнесува три милиони денари како фиксна бруто-плата или речиси во просек месечно идентично како и претходно споменатите два члена на УО. Токму затоа и кога ќе се спореди со 2023 година излегува дека врвното раководство на „Стопанска банка – Скопје“ примило вкупна сума како фиксен плус варијабилен дел што е за 7,8 отсто помала. 

Четворицата од УО на „Комерцијална“ поделиле 2,2 милиона евра

Меѓутоа, топ менаџерите на НЛБ и на „Стопанска – Скопје“ не се оние што најмногу се офајдиле кај трите најголеми, познати и како системски банки во земјава. Највисока сума во апсолутна вредност им е исплатена како плата и надоместоци на членовите на УО на „Комерцијална банка“, односно 134,7 милиони денари или речиси 2,2 милиона евра. Банката има петмина членови на УО, што значи дека секој во просек примил по околу 440 илјади евра бруто. Покрај претседателот  и главен извршен директор Хари Костов, тука се и другите членови на УО: Илија Илоски, наедно  и главен оперативен директор, д-р Маја Стевкова Штериева, главна финансова директорка, Билјана Максимовска Поповиќ, главна директорка за корпоративно банкарство, и д-р Никола Џамбазовски, главен директор за продажба и развој. Од тие 2,2 милиона евра, 1,2 милион евра се фиксен дел, односно бруто-плата, и околу 980 илјади евра варијабилен дел. Во варијабилниот дел, како што објаснуваат од банката, влегуваат т.н. плати од деловна успешност или повеќе познати како менаџерски бонуси, регрес, новогодишен надоместок, стручно усовршување, менаџерско осигурување, приватно здравствено осигурување и евентуално уште некои ставки. Слична е структурата горе-долу и кај другите банки, според она што може да го видиме во извештаите.

Од „Комерцијална“ немаат наведено во годишниот ревидиран извештај точно кој член на УО колкава сума заработил, но според логиката на нештата, претседателот на бордот Хари Костов би требало да е најплатениот менаџер. Во просек, излегува дека секој член на УО заработил бруто-плата од 242 илјади евра или по околу 20 илјади евра месечно. Во извештајот за 2023 година не успеавме да најдеме податоци за примањата на највисоките менаџери во „Комерцијална“ за да споредиме колкава е разликата.

Инаку, банките наведуваат во годишните извештаи колкави се примањата и на преостанатиот дел од високиот менаџмент, односно менаџментот одговорен за материјални бизнис-делови, управување со ризици и контрола, како и други лица со посебни права и одговорности (секторски директори), како што е наведено.

Во „Комерцијална банка“ има вкупно 53 такви менаџери, кои заработиле вкупно 212,8 милиони денари во 2024 година или секој во просек по околу четири милиони денари. На месечно ниво тоа е исплата по околу 333,3 илјади денари или 5.420 евра во бруто-износ, што вклучува сѐ: плати, бонуси и сите други надоместоци. Ова е највисока просечна исплата меѓу трите најголеми банки.

Во НЛБ такви менаџери има вкупно 48, кои примиле 174,8 милиони денари или секој во просек по 3,64 милиони за цела година. На месечно ниво, тоа се околу 4.930 евра во просек месечно, значи нешто пониско од „Комерцијална“. 

Во „Стопанска банка – Скопје“ навеле дека имаат 37 директори од нивоата што се веднаш под управниот одбор, а тие заедно примиле вкупно 105,4 милиони денари во 2024 година, бруто-плата плус варијабилен дел. Тоа значи дека секој од нив во просек примил по 2,85 милиони денари за целата година или по 3.860 евра бруто месечно, плата плус сите додатоци.