Алтман се врати во „Опен еј-ај“, но останува нејасно зошто беше разрешен

Помалку од пет дена по неговoто ненадејно разрешување, Сем Алтман се врати одново да го преземе раководството на „Опен еј-ај“ (Oper AI). Неочекуваната одлука предизвика борба за неговиот талент, ја остави компанијата во неред и ги разоткри длабоките поделби во oдборот на директори околу мисијата на еден од највредните стартапи во светот.

Новиот привремен одбор на „Опен еј-ај“, во кој првично нема да биде Алтман, ќе биде предводен од Брет Тејлор, поранешен коизвршен директор на „Сејлсфорс“ (Salesforce). Меѓу другите директори се Лери Самерс, поранешен министер за финансии на САД и сегашен член, и Адам Д'Анџело, коосновач и извршен директор на „Куора“ (Quora).

Алтман беше разрешен во петокот, по судирот со раководството за неговата иницијатива да го трансформира „Опен еј-ај“ од непрофитна организација фокусирана на научни истражувања за вештачка интелигенција (ВИ) во компанија што создава производи, привлекува клиенти и обезбедува финансирање потребно за напојување на алатките за вештачката интелигенција. Членовите на поранешниот одбор беа загрижени за потенцијалната штета што може да ја предизвика моќната нерегулирана вештачка интелигенција.

Првата задача на привремениот одбор ќе биде да најде нови директори што ќе можат да постигнат подобра рамнотежа помеѓу деловните императиви на „Опен еј-ај“ и потребата да се заштити јавноста од алатки што можат да создадат содржина што дезинформира, ја влошува нееднаквоста или им олеснува на криминалците да предизвикуваат насилство.

Реконструираниот одбор треба да одразува поголема разновидност, рекоа повеќе луѓе, вклучувајќи ја и Ешли Мајер, извршна директорка на фирмата за ризичен капитал „Коалишн оперејторс“ (Coalition Operators). „Возбудена сум што Сем се врати, но многу е типично за 2023 година што среќниот крај доаѓа во форма на тројца белци во одборот задолжени да ја осигурат користа од ВИ за целото човештво“, напиша таа на социјалната мрежа Х. „Се надевам дека наскоро ќе има повеќе вести“.

Лице упатено во преговорите рече дека неколку жени биле предложени за можни привремени директори, но не можело да се постигне договор. Лорен Пауел Џобс, вдовица на Стив Џобс, и поранешната извршна директорка на „Јаху“ (Yahoo), Мариса Мајер, биле предложени, но се сметало дека се премногу блиски со Алтман, рече изворот. Се разгледувала и опцијата за поранешната државна секретарка Кондолиза Рајс, но и нејзиното име било отфрлено. Изворот додаде дека одборот дефинитивно ќе вклучува жени.

Инвеститорите ќе очекуваат промени и во начинот на кој одборот комуницира со акционерите. Извршните директори на „Мајкрософт“ (Microsoft), кои изјавија дека ќе инвестираат до 13 милијарди долари во „Опен еј-ај“, биле огорчени што добиле само кратко предупредување за плановите на одборот да го разреши Алтман, велат изворите.

Некои инвеститори и директори на „Опен еј-ај“ исто така се пожалија дека одборот не ги објаснил доволно причините за разрешувањето. Членовите на одборот рекоа дека Алтман „не бил искрен во своите комуникации“.

Во деновите потоа, членови и вработени рекоа дека смената на извршниот директор не е поврзана со „злоупотреба“ или „безбедност“, оставајќи вакуум во информациите. Извршниот директор на „Мајкрософт“, Сатја Надела, јавно изјави дека не добил никакво објаснување.

Емет Шир, кој беше именуван за привремен извршен директор од страна на одборот во неделата, им кажал на луѓе блиски до „Опен еј-ај“ дека нема намера да остане на позицијата освен ако одборот не може јасно и писмено да му ги соопшти причините за ненадејното отпуштање на Алтман, тврдат упатени извори.

„Мајкрософт“, чија стратегија за вештачка интелигенција се потпира на технологијата на стартапот, најверојатно ќе има претставник во новиот одбор, или како набљудувач или евентуално со едно или повеќе места, вели изворот. Иако Алтман првично рече дека нема да заземе место во одборот со цел да се постигне договор, тој најверојатно ќе се приклучи, вели втор извор.  

Алтман исто така се согласи на внатрешна истрага за однесувањето што доведе до негово отпуштање, рече друг извор. Претходните членови на одборот беа Д'Анџело, коосновач на „Опен еј-ај“, и главниот научник Илја Сутскевер, Таша Меколи од „Геосим системс“ (GeoSim Systems) и Хелена Тонер, директорка на Центарот за безбедност и развојни технологии на универзитетот „Џорџтаун“.

И други инвеститори покрај „Мајкрософт“ исто така беа огорчени од потезите на одборот. Меѓу нив е и Винод Косла од „Косла венчрс“ (Khosla Ventures).

„Не сум разговарал со членовите на одборот што учествуваа во одлуката за разрешување на Алтман“, рече Косла во интервју за „Блумберг технолоџи“ во средата. „Мислам дека тоа е погрешно однесување од нивна страна“.

Винод Косла Bloomberg

Меколи и Тонер одбија да коментираат за отказот и за неговите последици. Алтман исто така одби да коментира.

Сутскевер, кој е добропознат во областа на вештачката интелигенција уште од неговите истражувачки денови на Универзитетот во Торонто, подоцна се извини за неговата улога во отпуштањето на Алтман и отиде дотаму што потпиша писмо во кое се заканува дека ќе го напушти „Опен еј-ај“ доколку одборот не поднесе оставка. 

Револуционерно истражување за кое придонесе Сутскевер е одговорно за почетокот на модерната доба на вештачката интелигенција. Адвокатот на Сутскевер рече дека директорот е „воодушевен што го вратил Сем како извршен директор“ и дека тој останува вработен во компанијата.

„Имам голема почит кон Илја бидејќи тој се премисли“, вели Косла. „Апсолутно заслужува втора шанса“, додаде тој.

Едно од големите прашања за Опен еј-ај“ е до кој степен Алтман може да се занимава со надворешни потфати. Во месеците пред да биде разрешен, тој патувал низ светот за да собере милијарди долари од некои од најголемите светски инвеститори за нов проект за чипови, со кодно име „Тигрис“, велат извори.

Идејата била да се основа компанија фокусирана на вештачка интелигенција што би можела да произведува полупроводници за да се натпреварува со оние на „Енвидија“ (Nvidia), која моментално доминира на пазарот на процесори за вештачка интелигенција, посочуваат истите извори. Алтман исто така се обидува да собере пари за хардверски уред фокусиран на вештачка интелигенција, кој го развива со поранешниот главен дизајнер на „Епл“ (Apple), Џони Ајв.

Тие проекти ќе бидат уште едно прашање што одборот ќе треба да го разгледа кога Алтман ќе се врати како извршен директор.

„Сем има широки интереси и инвестиции“, рече Надела.

Во моментов нема коментари за веста. Биди прв да коментира...

Остави коментар