Македонски стартап преку инвестициски самит во Абу Даби го освојува светот

Еден од најголемите предизвици на стартап-компаниите во Македонија и воопшто во светот е како по првичната реализација на својата идеја да обезбедат финансии за проширување, развој и пробив на глобално ниво. Вообичаено, финансии и соработка се бараат на Запад од различни инвестициски компании, фондови и бизнис-ангели. Меѓутоа, се чини дека работите полека географски се поместуваат и дека сѐ поголем потенцијал да се најдат инвеститори има во некои од развиените арапски земји, каде што финансии има повеќе од доволно и постои глад за нови стартап-проекти.

За тоа сведочи и искуството на сестрите Верица и Надица Горгиеви, кои стојат зад стартап-проектот „ЧиаДиа“ (ChiaDia) и се занимаваат со производство на здрави пијалаци базирани на чиа. Нивната стартап -започна пред речиси две години, кога за идејата добија поддршка од Фондот за иновации и технолошки развој, а патот до развој неодамна ги однесе на меѓународниот инвестициски самит во Абу Даби.

На прашањето од каде идејата да отпатуваат во Абу Даби, Верица Горгиева, соосновачка и главна извршна директорка во „ЧиаДиа“, вели дека често ги следат и анализираат меѓународните саеми и настани, особено оние што се поврзани со индустријата за производство на функционални и здрави пијалаци.

„Овој самит во Абу Даби, како и саемот во Дубаи, претставува одлична можност за нашите производи ‚ЧиаДиа‘ да се презентираат пред глобалната публика и потенцијални инвеститори“, вели Горгиева.

Таа информира дека претходно направиле истражување за тој пазар и дека еднаш веќе присуствувале на „Галфуд експо Дубаи“ (Gulfood Expo Dubai), каде што биле излагачи со штанд и воспоставиле одлични контакти.

Кога станува збор за процедурите за учество, Горгиева посочува дека тие не се премногу сложени.

„Може самостојно да се финансирате за да присуствувате на вакви саеми и самити, но исто така постојат и други можности. Често, стопанските комори организираат групни учества, а Министерството за земјоделство или други институции може да обезбедат учества или субвенции за локални компании. Учеството во вакви настани е одлична инвестиција за проширување на пазарите и презентирање на производите пред поширока публика“, вели Горгиева.

Таа додава дека, дополнително, самите организатори на саемите често нудат водичи и поддршка за пријавување и учество, што го олеснува целиот процес.

„Важно е да се биде добро подготвен со промотивни материјали и јасна визија за тоа што сакате да постигнете на таквите настани“, вели Горгиева.

Верица Горгиева/Приватна архива

Значителен интерес од инвеститорите

Нивните впечатоци од патувањето во Абу Даби се исклучително позитивни со оглед на тоа што, покрај учеството на саем за храна, биле дел и од најголемиот инвестициски настан во Абу Даби.

„Тоа беше фантастична можност за нашата компанија ‚ЧиаДиа‘. Остваривме голем број контакти, особено од Индија и од САД, со кои веќе водевме иницијални разговори за соработка. Исто така, имавме чест да ги презентираме нашата визија и производи пред публика од над 500 луѓе, што беше гoлем момент за нас“, вели Горгиева.

Моментално „ЧиаДиа“ е во фаза на преговори за потенцијални партнерства и соработки. Оттаму веруваат дека Обединетите Арапски Емирати би можеле да станат нивниот следен голем пазар, бидејќи потрошувачите таму имаат висока свесност за тоа што консумираат и често им посветуваат внимание на квалитетот и на изгледот на производите.

„На самитот забележавме значителен интерес од инвеститори, особено во секторите за храна, технологија и финтек. Тоа дополнително ни дава поттик да продолжиме со нашата работа и да го прошириме нашето присуство на GCC-пазарот“, вели Горгиева.

На Запад се бара брз поврат, во Абу Даби се гледа на долгорочен раст

На прашањето што го разликува самитот во Абу Даби во однос на сличните инвестициски настани во западните земји, таа вели дека станува збор за уникатен инвестициски настан, бидејќи Обединетите Арапски Емирати веќе ја надминуваат Силициумската Долина во одредени аспекти.

„Тоа е најбогатиот регион во светот, со огромни финансиски ресурси, но и еден од најдигитализираните, нудејќи модерни можности за иновации и технолошки развој.

Она што го прави овој самит посебен е фокусот на долгорочни инвестиции и развој, поддржан од визија за одржливост и глобално влијание. За разлика од многу западни инвестициски настани, каде што често се бара брз поврат на инвестициите, Абу Даби промовира интегративни стратегии за поддршка на стартапи што се фокусирани на долгорочен раст“, објаснува Горгиева.

Таа посочува дека, дополнително, регионот има широка мрежа на инвеститори од различни индустрии, како што се технологијата, здравството, финтекот и храната.

„Важна предност е и фактот што пазарот е отворен и подготвен да прифати нови иновации, со посебен акцент на производи што промовираат здравје и одржливост. Присуството на таков самит овозможува директен пристап до инвеститори што не само што располагаат со значителни средства туку имаат и желба да поддржат идеи што имаат глобален потенцијал. Абу Даби, со својата стратегија и ресурси, претставува извонредна можност за стартапите да го најдат својот пат кон успехот“, вели Горгиева.

Надица Горгиева/Приватна архива

Нови пазари

Во однос на нивните планови за понатамошен развој, Горгиева вели дека нивната визија е „ЧиаДиа“ да стане препознатлив интернационален бренд.

„Планираме да ги сертифицираме нашите производи со највисоки стандарди, вклучувајќи органски сертификати и други значајни меѓународни сертификати што ќе ја потврдат нашата посветеност на квалитет и одржливост. Дополнително, работиме на развој на нови вкусови, кои ќе ги задоволат различните преференции на потрошувачите“, вели Горгиева.

Во „ЧиаДиа“ гледаат голем потенцијал во проширувањето на присуството на нови пазари како Обединетите Арапски Емирати, Велика Британија, Скандинавија и остатокот од Европа.

„Тие пазари нудат идеални можности за производи како нашиот, бидејќи потрошувачите таму се сѐ посвесни за здравјето и квалитетот на производите што ги консумираат. Нашата цел е да продолжиме да иновираме и да создадеме производи што не само што ќе се издвојуваат по квалитетот туку ќе инспирираат и начин на живот што промовира здравје, енергија и добросостојба“, вели Горгиева.