Јусуф Камбер купи 10,76 проценти од акциите во „Македонијатурист“

Јусуф Камбер купи 48.671 односно 10,76 проценти од вкупниот број обични акции издадени од „Македонијатурист“, соопшти компанијата преку Македонската берза.

Оттаму истовремено информираа дека акционерот Симеон Павлов продал 47.366 акции односно 10,47 проценти од вкупниот број обични акции издадени од „Македонијатурист“ и сега не поседува акции во друштвото, како и дека акционерот „Чезакомерц“ продал 29.998 акции односно 6,63 проценти од вкупниот број обични акции и сега не поседува акции во друштвото.

„Блумберг Адрија“ минатата недела објави дека во четири блок-трансакции со вкупна вредност од околу милијарда денари (16,5 милиони евра) на Македонската берза се истргуваа вкупно 77.364 акции од „Македонијатурист“ коишто претставуваат 17,1 проценти од основната главнина на друштвото.

Блоковите се истргуваа по цена од 13.142 денари по акција. Акционерскиот капитал на „Македонијатурист“ е поделен на 452.247 акции, секоја со номинална вредност од 25,56 евра.