.webp){kind=icon}
Намалување на цените на храната и зголемување на квалитетот на производите се очекува од имплементацијата на Законот за забрана на нефер трговски практики во синџирот на снабдување на земјоделски и прехранбени производи. Со Законот се уредуваат условите и начинот како ќе се врши трговијата.
Добро утро! Ова се петте вести што треба да ги знаете на почетокот од денот.
Ќе ја запустиме ли земјоделската земја за енергетски цели: Веќе почнавме
Како да се постигне рамнотежа меѓу производството на енергенти и храна? Ова е клучното прашање пред кое се исправени еколозите, кои од една страна предупредуваат на неопходноста од остварувањето на климатските цели за нулта емисија на стакленички гасови до 2050 година, а од друга страна бараат заштита на земјоделското земјиште за цените на храната да се задржат под контрола.
Состојбата ескалира, што ги натера еколозите да бараат ограничување на употребата на горива што се произведуваат од земјоделски култури. Биогоривата најчесто се произведуваат од маслото од соја, кое во исто време е и главен производ за готвење. Научниците тврдат дека е неопходно да се добие гаранција дека нема да се влоши состојбата со гладот.
Пет мали македонски винарници што треба да ги посетите во 2024-та
Речиси нема туристичка тура што не вклучува посета на винарница и дегустација на локални вина. Малите македонски винарници сè почесто се нудат како автентично доживување од страна на водечките туроператори, а еднодневни посети со дегустација се нудат и на „Вајн туризам“ (Wine tourism), најголемиот онлајн водич за вински туризам. Токму креаторите на оваа платформа направија листа со најдобрите македонски винарници што треба да ги посетите.
По измените на Законот за вино во 2020 година, бројот на мали македонски винарници во континуитет се зголемува. Само лани биле регистрирани нови 95, а освен во Тиквешко како познат вински регион, изминативе четири години својата дејност ја формализирале и производители од Охрид, Битола, Прилеп, Скопје и од Куманово.
Кога слаткото станува горчливо
Доколку користите какао или кафе како суровина во производството, тогаш сигурно ве боли глава од растот на нивните цени. Сепак, активните учесници на пазарот на капитал тука гледаат можност за профит. Големите институционални инвеститори вложуваат во суровини преку фјучерси или термински договори, како и во компании што се заштитуваат со купување такви договори.
Од друга страна, најлесниот начин за малите инвеститори да им се придружат на големите играчи е да купат ЕТФ-ови (од англиски: exchange-traded funds) што ги следат движењата на цените на овие термински договори.Ако инвестиравте во ЕТФ-ови што ги следат цените на шеќерот, кафето и на какаото во почетокот на 2019 година, досега можевте да заработите 52 процента.
Научната фантастика станува реалност: Стартап развива мозок за роботи
Уште од најраните научнофантастични книги и филмови, компјутерите со вештачка интелигенција речиси секогаш биле придружени со еднакво паметни машини за движење, како андроиди и други роботи. Роботите можат да градат автомобили во фабрики и да чистат низ дома, но се способни да извршуваат релативно мал опсег на задачи во споредба со четботовите.
Стартапот наречен „Физикал интелиџенс“ се обидува да ја промени оваа ситуација. Формирана годинава од тим експерти за роботика и вештачка интелигенција, компанијата планира да создаде софтвер што може да додаде интелигенција на високо ниво во широк спектар на роботи и машини.
ЕУ гласа за нови правила за вештачката интелигенција
Актот за вештачка интелигенција има цел да одговори на загриженоста за пристрасност, приватност и други ризици од технологијата што брзо се развива. Нацрт-законот ќе ја забрани употребата на вештачка интелигенција за откривање емоции на работните места и во училиштата и ќе постави ограничувања за тоа како може да се користи во ситуации со високи влогови, како што е сортирањето апликации за работа.
Исто така, ќе ги постави првите ограничувања за генеративните алатки за вештачка интелигенција, кои го привлекоа вниманието на светот минатата година со популарноста на ЧетГПТ.Сепак, нацрт-законот предизвика загриженост три месеци откако официјалните лица постигнаа пробен договор по маратонската преговарачка седница, која траеше речиси 24 часа.
