НБС ја зголеми основната камата на пет проценти

Извршниот одбор на Народната банка на Србија на денешната седница донесе одлука за зголемување на референтната каматна стапка за 50 базични поени, на пет проценти. Во иста мера е зголемена и стапката на депозитните средства која сега изнесува четири проценти, како и стапката на кредитните олеснувања, којашто се зголеми на шест проценти.

„Со донесувањето на ваквата одлука, Народната банка на Србија продолжува да ги заострува монетарните услови и да влијае врз ограничувањето на секундарните ефекти од растот на цените преку инфлаторните очекувања, притоа придонесувајќи инфлацијата во Србија да има надолна патека и да се врати во границите на дозволеното отстапување од целта зацртана до крајот на периодот на проекцијата“, соопшти Народната банка на Србија.

Оттаму објаснуваат дека денешното зголемување на референтната каматна стапка претставува нејзино деветто последователно зголемување, со кое од април годинава таа е зголемена за вкупно 400 базични поени.

„Пренесувањето на ефектите од претходното заострување на монетарната политика на каматните стапки на пазарот на пари, кредити и штедење укажува на ефективноста на механизмот за пренос преку каматниот канал. Истовремено, Народната банка на Србија значително придонесува за ограничување на прелевачките ефекти од растот на увозните цени врз домашните цени, како и на макроекономската стабилност во услови на зголемена глобална неизвесност, преку одржување на релативната стабилност на девизниот курс на динарот во однос на еврото“, велат од НБС.

Извршниот одбор истакна дека економијата на Србија сè уште се соочува со значителни притисоци од меѓународната средина во однос на трошоците, иако има знаци за нивно олабавување.

„Истовремено, сè уште изразените геополитички тензии и нестабилното движење на светските цени на енергијата и храната во претходните месеци под влијание на бројни фактори на страната на понудата и побарувачката упатуваат на претпазливост на монетарната политика на Народната банка на Србија“, додаваат од НБС.

Српската монетарна власт укажува дека според првите проценки за ноември, инфлацијата во еврозоната, која е најважен економски партнер на Србија, се намалила за прв пат во последните 17 месеци на ниво од 10 проценти, што е подобар исход од очекуваниот. Намалувањето е благодарение на забавувањето на растот на цените на енергијата, додека инфлацијата на храната и основните цени сè уште не го забави растот.

„Показателите за економската активност на еврозоната се исто така подобри од очекуваното, и покрај наглото зголемување на каматните стапки и изразената геополитичка неизвесност, со тоа што и во 2023 година се очекува рецесија. Во наредниот период се очекува продолжување на заострувањето на монетарните политики на Европската централна банка и Федералниот резервен систем, но се оценува дека стапката на пораст на каматните стапки ќе забави, т.е. дека висината на нивното зголемување ќе биде помала од претходните“, велат од НБС.

Извршниот одбор посочи дека пореметувањата во глобалните синџири на снабдување стануваат се помалку изразени, а намалени се и светските цени на примарните производи, особено на енергетските производи, што исто така треба да придонесе за намалување на инфлаторните притисоци во наредниот период.

„Така, цената на природниот гас на европскиот пазар, која предизвика најголема загриженост, од почетокот на септември е значително намалена, а доволни количини гас ќе го ограничат неговиот драматичен раст оваа зима, што првично се очекуваше.

Продолжувањето на затегнувањето на монетарните услови е неопходно и во амбиент на преовладувачкото влијание на факторите на страната на понудата врз инфлацијата, со цел решително да се влијае на неа за да не стане постабилна во подолг период и да да не се прошири понатаму“, велат од НБС.

Оттаму прогнозираат дека инфлацијата во Србија ќе остане покачена до крајот на оваа година и почетокот на следната година, но потоа ќе биде на надолна траекторија, со позначителен пад во втората половина на 2023 година и враќање на целта до крајот на проекцискиот период. 

Во моментов нема коментари за веста. Биди прв да коментира...

Остави коментар